Thursday 14 April 2011

ലണ്ടനും മണ്ടനും കണ്ടതും കേട്ടതും ...! / Londonum Mandanum Kantathum Kettathum...!

പുതിയ ജോലിയായ ചാരപ്പണിയുടെ ട്രെയിനിങ്ങ് കഴിഞ്ഞാൽ , പഴയതുപോലെ ബൂലോഗത്ത് സജീവമാകുവാൻ സാധിക്കുകയില്ലായെന്ന കാര്യം , ഓടുന്ന നായക്ക് ഒരു മുഴം മുന്നേ...എന്ന പോലെ ഇപ്പോഴുള്ള ഈ പണിതിരക്കുകളെ കുറിച്ച് ഞാൻ മൂന്നാലുമാസം മുമ്പേ പറഞ്ഞിട്ടുണ്ടായിരുന്നുവല്ലോ...
എന്നാലും ബൂലോഗജ്വരം,  ഒരു ആഡിക്റ്റായി എന്റെയൊപ്പം കൂടിയത് കൊണ്ട് , എന്തെങ്കിലും കുത്തിക്കുറിച്ചില്ലെങ്കിൽ ഈ രോഗം വല്ലാതെ മൂർഛിച്ചുപോകും എന്നുള്ള കാരണം , വീണ്ടും ജസ്റ്റ് ഒന്ന് വന്ന് മിണ്ടി പോകുന്നുവെന്ന് മത്രം...!
ഇവിടെയിപ്പോൾ എഴുതിപ്പിടിപ്പിക്കുവൻ കണ്ടതും കേട്ടതുമായി നിരവധി സംഗതികൾ ഉണ്ടെങ്കിലും ഈ കുറച്ചുസമയത്തിനുള്ളിൽ എന്തെഴുതണമെന്നുള്ള കൺഫ്യൂഷനിലാണിപ്പോൾ ഞാൻ...


എന്നാൽ ബ്ലോഗേഴ്സ് മീറ്റിൽ നിന്നും ആരംഭിക്കാം അല്ലേ... ബൂലോകർക്കെല്ലാം ഏറ്റവും ആവേശമുണർത്തുന്ന കൂട്ടായ്മകളാണ് ബൂലോഗ സംഗമങ്ങൾ..!
പരസ്പരം കണ്ടും,കാണാതെയും അടുത്തറിഞ്ഞവർ നേരിട്ട് സൗഹൃദം പങ്കുവെക്കുമ്പോഴുണ്ടാകുന്ന ആ അനുഭൂതികളുടെ സൌഖ്യം  ഒന്ന് വേറെ തന്നെ ആണല്ലോ...
ഭൂലോകത്തിന്റെ നാ‍നാഭാഗത്ത് നിന്നുള്ള ബൂലോഗരുടെ ഇത്തരം കൂടിച്ചേരലുകൾ തന്നെയാണ് നമ്മുടെയെല്ലാം ഈ മിത്രക്കൂട്ടായ്മകളുടെ കെട്ടുറപ്പുകൾ കേട്ടൊ...
അതുകൊണ്ടൊക്കെ തന്നെ ഏതൊരു ബൂലോകമീറ്റുകളും വിജയിപ്പിക്കേണ്ടത് നമ്മുടെയൊക്കെ ചുമതല തന്നെയാണ്...!

കഴിഞ്ഞാഴ്ച്ച നാലഞ്ച് ദിവസം സഞ്ചാരപ്രിയനായ എനിക്ക് ജോലിസംബന്ധമായി ലണ്ടനുപുറത്തുള്ള നോർത്താപ്മ്ട്ടനിലും , ഹാർലോയിലും,വെസ്റ്റ് തെറോക്കിലുമൊക്കെയായി കറങ്ങിതിരിയേണ്ടിവന്നത് കൊണ്ട്,യാത്രകളെല്ലാം കഴിഞ്ഞ് വന്ന്,  മെയിൽ നോക്കിയപ്പോൾ , ഇൻ-ബോക്സിനുള്ളിൽ ന്നൂറ്റിപത്ത് ബൂലോക രചനായറിയിപ്പുകളാണ് വന്ന് കിടന്നിരുന്നത്....!

അതിൽ ഒരു ബൂലോഗമിത്രത്തിന്റെ ഏഴ് മെയിലോർമ്മപ്പെടുത്തലുകളാണ്
സ്വന്തം പേരിലും, ബ്ലോഗ്ഗിന്റെ പേരിലും എനിക്ക് കിട്ടിയിരുന്നത്...
വേറോരാളുടേത് വായിച്ചിട്ടഭിപ്രായം കുറിച്ചിട്ടും , ആയത് വീണ്ടും പുന:പ്രസിദ്ധീകരിച്ച് വീണ്ടും നമ്മുടെ സമയം പാഴപ്പിക്കുന്ന തരത്തിലുള്ളതും...
ഇതുപോലെ വെറും അഞ്ചുദിവസം കൊണ്ട് പത്തമ്പത് പേരുടെ ഒന്നും, രണ്ടും,മൂന്നുമോർമ്മപ്പെടുത്തലുകളായി ആകെ 110 മെയിലഭ്യാസങ്ങൾ...!

വെറും നാല് വരിയോ,മറ്റോ എഴുതിയിട്ട് നാലാളെ അറിയിച്ചിട്ട് അഭിപ്രായപ്പെട്ടി നിറക്കുന്ന ഈ നവീനമായ പരസ്യ പരിപാടി കൊള്ളാം അല്ലേ കൂട്ടരെ.....
വേറെ ചിലരൊക്കെ സ്വന്തം ഗ്രൂപ്പിലുള്ളവരെ മാത്രം മാനിക്കുന്നവരും , തിരക്കുകാരണം മറ്റുള്ളവരുടെ പോസ്റ്റ്കൾ വായിക്കാത്തവരും, പുതിയതായി സ്വന്തം പോസ്റ്റെഴുതുമ്പോൾ  മറ്റ് ബൂലോകർക്കെല്ലാം മെയിലറിയിപ്പ് കൊടുക്കുന്നതിന്...
തിരക്ക് ഒട്ടും ഭാവിക്കാത്തവരുമാണെന്നതും ഒരു പ്രത്യേകത തന്നെയാണ് കേട്ടൊ.

ഇ-എഴുത്തുകളിൽ പുതിയതായി രംഗപ്രവേശം നടത്തുന്നവരെ ...
നല്ലോണം ഇ-വായനക്കാരൊക്കെ അറിയുന്നതുവരെയൊക്കെ ...
ഈ പ്രമോഷൻ കൊള്ളാം...അല്ലേ.
പക്ഷേ ബൂലോഗത്തിൽ നന്നായി എസ്റ്റാബ്ലിഷ്  ചെയ്തവർ പോലും ഇതിന്റെ പിന്നാലെ പോകുന്നതെതുകൊണ്ടാണെന്നറിഞ്ഞ് കൂടാട്ടാ...


പോസ്റ്റെഴുതിയറിയിപ്പ് കൊടുത്തില്ലെങ്കിൽ, ആരുമത് വായിക്കില്ലെന്നും, അഭിപ്രായിക്കില്ലെന്നും തോന്നുന്നതുകൊണ്ടാണോ , പല തറവാടി ബ്ലോഗ്ഗേഴ്സടക്കം ഈ ‘മെയിലയക്കൽ എടവാട് ‘
ഒരു ശീലമാക്കിയിരിക്കുകയാണെന്ന് തോന്നുന്നു...
അവരെ സ്ഥിരം പിന്തുടരുന്നവരെ ,വായിച്ചഭിപ്രായം കുറിക്കുന്നവരെയെങ്കിലും ഇതിൽ നിന്നും ഒഴിവാക്കിയാൽ മെയിൽ വരുമ്പോഴുണ്ടാകുന്ന ‘മൊബൈൽ ഞെട്ടലുകലിൽ‘ നിന്നും ഒരു മോചനം കിട്ടിയേനെ...!
പിന്നെ ചില പ്രമുഖ ബൂലോകരെല്ലാമിപ്പോൾ  ക്ഷണിതാക്കളായി കിട്ടുന്ന പോസ്റ്റുകൾ മാത്രം വായിക്കുന്ന പ്രവണതയിലേക്കും ഒതുങ്ങിയിട്ടുമുണ്ടെന്നുള്ളതും ഒരു വാസ്തവമാണ്...

എന്തിനാ ഞാൻ വെറുതെ ഇതെല്ലാം പറഞ്ഞ്
സ്വന്തം കഞ്ഞിയിൽ മണ്ണുവാരി ഇടുന്നത് അല്ലേ..?

വേറെയിപ്പോൾ ക്രിക്കറ്റിനെ കുറിച്ച് പറയുകയാണെങ്കിൽ...
ഇന്ത്യ വീണ്ടും ക്രിക്കറ്റിൽ ലോകകപ്പെടുത്തപ്പോൾ ലണ്ടൻ തെരുവുകളിൽ മുഴുവൻ ട്രാഫിക് ബ്ലോക്കുണ്ടാക്കി മലയാളത്തനിമയോടെ ആടി തിമർത്ത ആരാധകരെ കുറിച്ച് പറയാമെന്ന് വെച്ചാലും  അതെല്ലാം പഴകിപ്പോയല്ലൊ... അല്ലേ.

ഇനിപ്പ്യോ തെരെഞ്ഞെടുപ്പിനേ പറ്റി പറയാമെന്ന് വെച്ചാൽ... ആ വോട്ടുകളും പെട്ടീലായി...
ഇനി പെട്ടി പൊട്ടിക്കുന്ന വരെ നമ്മുടെ സ്വന്തം പാർട്ടിയെ പുകഴ്ത്തിയും...
ശേഷം ജയിക്കുന്നവരെ പിന്താങ്ങിയും അവർക്ക് അഞ്ചുകൊല്ലം ‘സേവി’ക്കുവാൻ സുഖമമായി നിന്നുകൊടുക്കുകയും ചെയ്താൽ നമ്മുടെ ആ ഡ്യൂട്ടിയും തീർന്നു...!

പിന്നെ ഇപ്പോഴുള്ള ചാ(ജാ)രപ്പണിയെ
കുറിച്ച് പറയാനാണെങ്കിൽ  ഇമ്മണിയുണ്ട് ...
പക്ഷേ അതിനെകുറിച്ചൊന്നും പുറത്ത് പറയാൻ
പാടില്ല  എന്നതാണ് അതിന്റെ രഹസ്യ സ്വഭാവം...!
 സമദ് വക്കീലിനും യാത്രയയപ്പ്..!
പിന്നെ നമ്മുടെ ബിലാത്തിബൂലോഗനായ സമദ് വക്കീൽ ഇവിടത്തെ 'കോപ്പി'ലെ പണി വേണ്ടെന്ന് വെച്ച് നാട്ടിൽ പബ്ലിക് പ്രോസിക്യൂട്ടറുടെ കുപ്പായമണിയുവാൻ പോകുന്നതിന് മുമ്പ്...
ആ യാത്രയയപ്പിനോടനുബന്ധിച്ച് ഞങ്ങൾ നടത്തിയ ബിലാത്തിയിലെ പല മഹാന്മാരയവരുടേയും ശവകുടീരങ്ങൾ സന്ദർശിച്ചതിന്റെയൊക്കെ പകർപ്പാവകാശം സമദ്ഭായിക്ക് മാത്രമായി തീറെഴുതികൊടുത്തിരിക്കുന്നത് കൊണ്ട് അതിനെകുറിച്ചെഴുതാനും നിർവ്വാഹമില്ല...

ഡാ‍ർവിനും,ഷേക്സ്പിയറും, കാറൽ മാർക്സ്സുമൊക്കെ അന്തിയുറങ്ങുന്നയിടങ്ങളെ കുറിച്ച് സമദ് ഭായ് എഴുതികൊണ്ടിരിക്കുകയാണിപ്പോൾ...!
മുതലാളിത്ത രാഷ്ട്രത്തിലായതുകൊണ്ടാകാം മാർക്സിനേയും അദ്ദേഹത്തിന്റെ ഇസത്തേയും പറ്റി അത്ര വലിയ അറിവൊന്നുമില്ലാത്ത, ഇവിടത്തെ ഇളം തലമുറക്കാരൊക്കെ... മറ്റ് മഹാരഥന്മാരുടേത് പോലെ ഈ കല്ലറക്ക് വലിയ ടൂറിസ്റ്റ് പരിവേഷമൊന്നും കൊടുക്കാത്തകാരണം...
വല്ലാതെ അവഗണിച്ചുകിടക്കുന്ന ഇദ്ദേഹത്തിന്റെ ബലികുടീരത്തിൽ ബാഷ്പാജ്ഞലികൾ അർപ്പിക്കുവാൻ എത്തുന്നത്  ആ മഹാന്റെ വ്യക്തിത്വത്തെ വായിച്ചറിഞ്ഞ നമ്മളെപ്പോലെയുള്ളവർമാത്രമാണ്.. കേട്ടൊ !
ഇനിയുള്ളത്  ഒരു നോവെലെഴുതാൻ പറ്റിയ ഒറിജിനൽ കഥയാണ് ..!
ഒരു മലയാളി കുടുംബത്തിലെ ഒരു അമ്മയും കൊച്ചും ഇവിടെനിന്നും നാട്ടിൽ ലീവിന് പോയി തിരിച്ചുവന്നപ്പോൾ ...
സ്വന്തം ഭർത്താവിന്റെ അടുത്ത് പോകാതെ, അദ്ദേഹത്തിന്റെ ബിസിനെസ്സ് പാർട്ടണറുടെ കൂടെ പൊറുപ്പ് തുടങ്ങിയപ്പോൾ... സമവായത്തിന് ശ്രമിച്ച ഭർത്താവിന്, കൊച്ചിന്റെ ഡി.എൻ.എ. ടെസ്റ്റ്പേപ്പർ കാണിച്ച് , കൊച്ചിന്റെ പിതാവ് മറ്റേ പാർട്ട്നർ തന്നെയാണെന്ന് തെളിയിച്ച കഥയാണ് ഇവിടെ ഒരു മലയാളി പത്രത്തിലൂടെ മല്ലൂസ്സെല്ലാം ഏറെ വയിച്ച് രസിച്ച വാർത്ത കേട്ടൊ.

പകരം തൽക്കാലം വിരഹിയായ ഭർത്താവിന് വേണമെങ്കിൽ, മറ്റേ പാർട്ട്നറുടെ പഴയ ഭാര്യയുമായി പാർട്നർഷിപ്പ് കൂടാമെന്നാണ് ഇവിടത്തെ രീതി കേട്ടൊ.
എന്തായാലും നല്ല പത്രധർമ്മം അല്ലേ...
ഈ സുന്ദരിമരായ അമ്മമാരുടെയൊക്കെ ഓരോ കാര്യങ്ങളേ...!

അതേ സമയം ...
2001 പൌണ്ടിനുപകരം മാസ ശമ്പളം20001 പൌണ്ട് (15 ലക്ഷം രൂപ)തന്റെ എക്കൌണ്ടിൽ വന്ന ഒരു മലയാളി നേഴ്സ് സത്യസന്ധതയോടെ ആ പണം തന്റെ സ്ഥാപനത്തിലേക്ക് തിരികെ കൊടുത്തും മാതൃക  കാട്ടിയതും മല്ലൂസ്സിന് അഭിമാനിക്കാൻ വകയേകിയ മറ്റൊരു  വാർത്തയാണ് കേട്ടൊ.
അവസാനായിട്ട് പറയാനുള്ളത് ഇമ്മടെ വിഷൂനെ പറ്റിയാണ്... മലയാളികൾക്കൊക്കെ ഈ വെള്ളക്കാരുടെ നാട്ടിൽ വിഷുവൊരു പൊട്ടാത്ത പടക്കം പോലെയാണ്...!
എങ്കിലും കണിക്കൊന്നക്ക് പകരം എല്ലായിടത്തും ബഹുവർണ്ണപുഷ്പങ്ങൾ നിറഞ്ഞു നിൽക്കുന്ന ഉദ്യാനങ്ങളും,മലർവിടർന്ന് പഞ്ചവർണ്ണ കുടകളേപ്പോൽ പൂത്തുനിൽക്കുന്ന മരങ്ങളുമൊക്കെയായി വസന്തകലം ഉല്ലസിച്ചു നിൽക്കുന്നത് കാണുമ്പോഴുള്ള ആനന്ദാനുഭൂതികൾ വളരെ നിര്‍വൃതി  തരുന്ന സംഗതിയാണ് തന്നെയാണ് ...!
ഒപ്പം കണ്ണിനിമ്പമായ കാഴ്ച്ചകളായി കണികാണുവാൻ അല്പവസ്ത്രധാരികളും ...!
പിന്നെ ക്യൂ നിൽക്കതെ തന്നെ ഏത് പെട്ടിക്കടയിലും സുലഭമായി ലഭിക്കുന്ന മധുപാനിയങ്ങളും...!
എന്നെപ്പോലെയുള്ള ഒരു ശരാശരി മലയാളിക്ക് ഇത് തന്നെ ധാരാളം അല്ലേ ഒരു വിഷുക്കണിക്കും പിന്നീടുള്ളഗ്രൻ സദ്യയ്ക്കും...
അതെ...
ഇവിടെ വിഷു കഴിഞ്ഞ കൊല്ലത്തെ പോലെ തന്നെ ഇക്കൊല്ലവും...


“വിഷുക്കൊന്നയില്ല ,കണിവെള്ളരിയും
കമലാനേത്രനും ...
വിഷുപ്പക്ഷിയില്ലിവിടെ
കള്ളന്‍ ചക്കയിട്ടത് പാടുവാൻ...
വിഷുക്കൈനീട്ടം കൊടുക്കുവാന്‍
വെള്ളിപണങ്ങളും ഇല്ലല്ലോ ...
വിഷുഫലമായി നേര്‍ന്നുകൊള്ളുന്നൂ
വിഷു വിഷെസ് മാത്രം !“






ലേബൽ :-
ലവക .

കാലാവസ്ഥ വ്യതിയാനവും ചില ചിന്തകളും ...! / Kalavastha Vyathiyanavum Chila Chinthakalum... !

ആഗോളതലത്തിൽ  കാലാവസ്ഥാ വ്യതിയാനം മൂലം പരിസ്ഥിതിക്ക് വല്ലാത്ത മാറ്റം വന്നു കൊണ്ടിരിക്കുന്ന ഒരു കാലഘട്ടത്തിലൂടെയാണ്  നാം ഇപ്പോൾ കടന്നുപോയി  കൊ...