Friday, 29 November 2019

പതിനൊന്നിൻ നിറവിൽ ഒരു ബൂലോഗ പട്ടണം...! / Pathinonnin Niravil Oru Boologa Pattanam.. !

ഒന്നൊര പതിറ്റാണ്ട് മുമ്പ് ഭൂമിമലയാളത്തിൽ ബ്ലോഗുകൾ പിറന്നു വീണതിന് ശേഷം നാല്കൊല്ലം പിന്നിട്ടപ്പോഴാണ് എനിക്ക് മലയാളം  ബ്ലോഗുലകത്തിൽ  ഈ  ബിലാത്തിപട്ടണം എന്ന തട്ടകം പതിച്ചു കിട്ടിയത് ....
അതിന്‌ ശേഷം എന്റെ ബ്ലോഗിന്റെ ഓരൊ വാർഷികത്തിനും എഴുതിയിട്ടിരുന്ന വാർഷിക   പോസ്റ്റുകളുടെ ലഘു വിവരണങ്ങളും ആയതിന്റെ ലിങ്കുകളുമാണ് ഈ പതിനൊന്നാം വാർഷിക പോസ്റ്റായി ഞാൻ ചമച്ചു വിടുന്നത്  ...   
എന്റെ ബൂലോഗ പ്രവേശനത്തിന് ശേഷം കഴിഞ്ഞ പതിനൊന്ന് വർഷങ്ങളിലും പത്രപാരായണം പോലെയെങ്കിലും എത്ര സമയക്കുറവുണ്ടെങ്കിലും ബൂലോഗ സഞ്ചാരത്തിൽ കൂടി ആഗോളതലത്തിൽ ആഴ്ച്ചയിൽ ഒരു തവണയെങ്കിലും യാത്ര ചെയ്യാറുള്ള ഒരു ബൂലോക പ്രജയാണ് ഈയ്യുള്ളവൻ ...

അന്നും ഇന്നും കണിമംഗലത്തും ,ലണ്ടനിലുമായി ഞാൻ കണ്ടതും കേട്ടതുമായ  കാഴ്ച്ചവട്ടങ്ങൾ അനുഭവത്തിന്റെ മേമ്പൊടി ചാലിച്ച്  എന്റേതായ ശൈലിയിൽ കഴിഞ്ഞ 11  കൊല്ലമായി ഈ തട്ടകത്തിൽ പല പല രചനകളായി കുത്തി കുറിച്ചിടുന്ന വെറും ബ്ലോഗർ മാത്രമാണ്  ഞാൻ ...

തൻ കാര്യം പറഞ്ഞും ; വായനക്കാരോട് സല്ലപിച്ചും ;
സ്വയം പുകഴ്ത്തിയും , ഇകഴ്ത്തിയും  ; ഒന്നും ഒളിച്ചു വെക്കാനില്ലാതെ ;
മറ്റാരും അധികം അറിയാത്ത ; കണ്ടതും കേട്ടതുമായ കാര്യങ്ങളെല്ലം നേരെചൊവ്വേ ,സ്വയമൊരു കഥാപാത്രമായി ചൊല്ലിയാടി ഈ ബൂലോകത്ത് ..
എന്റെ  കളിയാട്ടങ്ങൾക്ക് തുടക്കം കുറിച്ചിട്ട് ...ഇന്നീ നവമ്പർ 30 ന്,  പതിനൊന്ന്  വർഷങ്ങൾ കഴിഞ്ഞു...!

പിന്നെ ബിലാത്തി വെറും ലാത്തിയടിക്കുകയാണെന്നും ;
വെടി പൊട്ടിക്കുകയാണെന്നും , അലക്കുകയാണെന്നും;
പുളുവടിക്കുകയാണെന്നുമൊക്കെയാണ് പലരുടേയും ഭാഷ്യം ...?

ഈ ‘അലക്കും’, 'ലാത്തി'യും ‘ വെടി’ 
പൊട്ടിക്കലുമൊന്നില്ലെങ്കിൽ പിന്നെന്ത്  ന്തുട്ട് 
ബി ’ലാത്തി’ അല്ലേ...കൂട്ടരേ ...

ദാ ...കഴിഞ്ഞ പത്ത് വർഷങ്ങളിലായി  
ഞാൻ പടച്ചുവിട്ട ആനിവേഴ്‌സറി പോസ്റ്റുകൾ 

  1. ബിലാത്തിപട്ടണം എന്റെ ബൂലോഗ തട്ടകം / 01 - 11 - 2008 
  2. .ബിലാത്തിപട്ടണം ഒരു മായക്കാഴ്ച്ച / 30 -11 -2009.
  3. ഒരു പ്രണയത്തിൻ വർണ്ണപ്പകിട്ടുകൾ / 30 -11 -2010.
  4. മാജിക്കിന്റെ ഒരു വിസ്മയലോകം / 29 -11 -2011
  5. ബ്ലോഗ്ഗിങ്ങ് ആഡിക്ഷനും ഇന്റെർനെറ്റ് അടിമത്വവും / 30 -11 -2012.
  6. ഭൂമിമലയാളത്തിലെ ബൂലോകവും പിന്നെ ഞാനും / 30 -11-2013.
  7. ഒരിക്കലും വറ്റി വരളാത്ത ബൂലോക സൗഹൃദങ്ങൾ / 27 -11-2014.
  8. സപ്ത വർഷ സമ്പൂർണ്ണ ബൂലോഗന : / 26 -11 -2015.
  9. 'സ്‌മൃതി' ഉണർത്തുന്ന 'ഛായ' / 29 -11 -201
  10. ആംഗലേയ നാട്ടിലെ ഭാഷാസ്നേഹികളായ മല്ലു വല്ലഭർ / 15 - 11 -2017
  11. ഒരു ദശകം പിന്നിട്ട ബൂലോക പ്രവേശം / 01 -11 -2018 

ബിലാത്തിപട്ടണം എന്റെ ബൂലോഗ തട്ടകം 
അതെ ശീമ അല്ലെങ്കില്‍ ബിലാത്തി എന്ന് നമ്മള്‍ പണ്ടേ വിളിച്ചു പോന്നിരുന്ന ഇംഗ്ലണ്ടിലെ ഏറ്റവുംവലിയ പട്ടണം ആകുന്നു ലണ്ടന്‍ അഥവാ ബിലാത്തിയിലെ ഏറ്റവുംവലിയ പട്ടണം...
സാക്ഷാൽ ബിലാത്തിപട്ടണം ...!
ഇവിടെയിരുന്നു ഞാന്‍

വീണ്ടും എഴുതാന്‍ തുടങ്ങുകയാണ് ...
അതും ലണ്ടനിലെ ഒരു തനി മണ്ടൻ ആയിട്ടാണ് എന്ന് വേണമെങ്കിൽ പറയാം...

ബിലാത്തിപട്ടണം ഒരു മായക്കാഴ്ച്ച 

കാലങ്ങള്‍ക്ഷം അത്തരം ഒരു പ്രേമലേഖനം എഡിറ്റു ചെയത് എഡിറ്റ്
ചെയ്തൊരുവള്‍  , പിന്നീടെന്റെ ഭാര്യ പദവി അലങ്കരിച്ചപ്പോള്‍ എഴുത്തിന്റെ ഗതി
അധോഗതിയായി... !
പ്രിയ പെണ്ണൊരുത്തിയവള്‍
എന്‍റെ ജീവിതം  മുഴുവന്‍ എഡിറ്റ് ചെയ്തുകളഞ്ഞു... !
പിന്നെ കുറെ കൊല്ലങ്ങളായിട്ടുണ്ടായത്  എന്‍റെ രണ്ടുമക്കളുടെ സൃഷ്ടികള്‍ മാത്രം ...

എല്ലാത്തിനും ഒരു നിമിത്തം എന്ന് പറയാറില്ലേ...


.
 എന്തിന് പറയുന്നു വെറും ആറുമാസം കൊണ്ട് ഞങ്ങൾ പിരിയാനാകാത്തവിധം അടുത്തുപോയി...!

വയസ്സാങ്കാലത്തുണ്ടായ ഈ പ്രേമം മൂത്ത് മുരടിച്ച് വേറെ കുഴപ്പങ്ങളൊന്നുമുണ്ടാക്കില്ല
എന്ന ഉറപ്പിൻ മേൽ ഭാര്യയും, മകളും അവർക്കീബന്ധത്തിന് പൂർണ്ണസമ്മതമല്ലെങ്കിലും,
ഒരു ചിന്ന വീടായി കുറച്ചുകാലം കൊണ്ടുനടന്നുകൊള്ളുവാൻ മൌനാനുവാദം കൂടി തന്നതോടെ പൊട്ടന് ഓണേഷ് കിട്ടിയ പോലെയായി എന്റെ കോപ്രായങ്ങൾ...!

തന്നില്ലെങ്കിൽ അവർക്കറിയാം ഇത് നാടല്ല...
ബിലാത്തിയാണ് ... ആർക്കും സ്വന്തം ഇഷ്ട്ടം പോലെ
ആരുമായിട്ടും ഏതുപോലെയും രമിച്ച് മതിച്ച് ജീവിക്കാമെന്ന് ...!

അങ്ങിനെ 2008-ലെ ; കേരളപ്പിറവിദിനമായ നവംബർ ഒന്നിന്
ഞാനുമീസുന്ദരിയും കൂടി അനൌദ്യോഗികമായ ഒരു എൻഗേജ്മെന്റ്
ഉണ്ടായെങ്കിലും, ആദ്യസമാഗമമുണ്ടായത് ദിവസങ്ങൾക്ക് ശേഷമാണ്....

മറ്റുള്ളവരെ അഭിമുഖീകരിക്കുവാനുള്ള ഒരു ചെറിയ വിമുഖത കാരണം ,
മാസാവസാനം നവംബർ മുപ്പതിനാണ്  ഞങ്ങൾ രണ്ടുപേരും കൂടി ഒന്നിച്ച് പാർപ്പ് തുടങ്ങിയത്...!

ഈ മലയാളി ബൂലോഗമങ്കയുമായുള്ള ഈ സുന്ദര
ദാമ്പത്യത്തിന് ഇന്ന് രണ്ടുവർഷം തികഞ്ഞിരിക്കുകയാണ് കേട്ടൊ.
യെസ്സ്...
ദി  സെക്കന്റ് ഹാപ്പി ബ്ലോഗ് ആനിവേഴ്സറി ...!


തൻ കാര്യം പറഞ്ഞും ; വായനക്കാരോട് സല്ലപിച്ചും ;
സ്വയം പുകഴ്ത്തിയും , ഇകഴ്ത്തിയും  ; ഒന്നും ഒളിച്ചുവെക്കാനില്ലാതെ ;
മറ്റാരും അധികം അറിയാത്ത ; കണ്ടതും കേട്ടതുമായ കാര്യങ്ങളെല്ലം നേരെചൊവ്വേ ,
സ്വയമൊരു കഥാപാത്രമായി ചൊല്ലിയാടി ഈ ബൂലോകത്ത് ...

എൻ കളിയാട്ടങ്ങൾക്ക് തുടക്കം കുറിച്ചിട്ട് ...ഇന്നീ നവമ്പർ 30 ന്,  മൂന്ന് വർഷങ്ങൾ കഴിഞ്ഞു...!

പിന്നെ ബിലാത്തി വെറും ലാത്തിയടിക്കുകയാണെന്നും ;
വെടി പൊട്ടിക്കുകയാണെന്നും , അലക്കുകയാണെന്നും;
പുളുവടിക്കുകയാണെന്നുമൊക്കെയാണ് പലരുടേയും ഭാഷ്യം ...?

ഈ ‘അലക്കും’, ‘ വെടി’ പൊട്ടിക്കലുമൊന്നില്ലെങ്കിൽ
പിന്നെന്ത്  ബി ’ലാത്തി’ അല്ലേ...!

ബ്ലോഗ്ഗിങ്ങ് അഡിക് ഷനും ഇന്റെർനെറ്റ് അടിമത്വവും


പക്ഷേ ബൂലോഗ പ്രവേശം നടത്തി
മാസങ്ങൾക്ക്  ശേഷം , സ്ഥിരമായുള്ള ബൂലോക സഞ്ചാരങ്ങൾ ഒരു ശീല ഗുണമായതോടെ ഒന്നെനിക്ക് മനസ്സിലായി  ...

അന്നത്തെ ആ നഷ്ട്ടബോധങ്ങളൊക്കെ
അലിഞ്ഞലിഞ്ഞ് ഇല്ലാതായി കൊണ്ടിരിക്കുകയാണെന്ന്...!

അതെ നമ്മളൊക്കെ ഏകാന്തതയിൽ അകപ്പെടുമ്പോൾ , ദു:ഖങ്ങളിലും ,സങ്കടങ്ങളിലുമൊക്കെ പെട്ടുഴലുമ്പോൾ ഈ ‘സൈബർ ലോക‘ത്തേക്കിറങ്ങി വരുമ്പോഴുള്ള ആശ്വാസവും, സന്തോഷവുമൊക്കെ ഈ ഭൂലോകത്തിൽ വേറെ എവിടെനിന്നും കിട്ടില്ലാ എന്നും നമുക്കെല്ലാം വളരെയധികം നിശ്ചയമുള്ള കാര്യങ്ങളാണല്ലോ ... അല്ലേ കൂട്ടരേ

അതുമാത്രമല്ല ഈ ബൂലോക വായനയിലൂടെ പരസ്പരം തിരിച്ചറിഞ്ഞ് കെട്ടിപ്പടുത്ത ഒരു  സൗഹൃദ  സമ്പാദ്യമാണെന്ന് തോന്നുന്നു എന്റെ ഇതുവരെയുള്ള അസെറ്റുകളിൽ ഏറ്റവും ഉയർന്നതും മേന്മയുള്ളതുമായ ഒരു സമ്പാദ്യം...!

ഭൂമി മലയാളത്തിലെ ബൂലോകവും പിന്നെ ഞാനും


ഗുണത്തേക്കാൽ ഉപരി ദോഷ വശങ്ങളുള്ള സോഷ്യൽ
മീഡിയകളിൽ ആക്റ്റീവായിട്ടുള്ള പലരുടേയും ജീവിതത്തിന്റെ
കാൽഭാഗം സമയം  , കഴിഞ്ഞ അഞ്ച് കൊല്ലമായി സൈബർ ഇടങ്ങളിൽ
പാഴാക്കി കളഞ്ഞു കൊണ്ടിരിക്കുകയാണെന്നാണ് അതിൽ കണ്ടെത്തിയ ഒരു വസ്തുത...!

പക്ഷേ ബ്ലോഗുകൾ കാലങ്ങളോളം നിലനിൽക്കുമെന്നും ,
അവയൊക്കെ പാരമ്പര്യമായി വ്യക്തികൾക്കൊ , സ്ഥാപനങ്ങൾക്കോ നിലനിറുത്തി കൊണ്ടുപോകാനാവും എന്നതാണെത്രെ ഈ പോർട്ടലുകളുടെ പ്രത്യേകത ...!
എഴുത്തുകാരന്റെ  യഥാർത്ഥ കൈയ്യെഴുത്ത് കോപ്പിയാണ്
അവന്റെ സ്വന്തം ബ്ലോഗെന്നാണ് ആ പഠനങ്ങൾ  വ്യക്തമാക്കിയ വേറൊരു കാര്യം.
ഭാവിയിൽ മാധ്യമ രംഗത്തൊക്കെ ബ്ലോഗേഴ്സിനും ,
വോൾഗേഴ്സിനും (വീഡിയോ ബ്ലോഗേഴ്സ് ‌ ഈ ലിങ്കിൽ പോയി നോക്കൂ )
സ്വയം തൊഴിലായി വരുമാനമാർഗ്ഗം ഉണ്ടാകുന്ന അനേകം തൊഴിലവസരങ്ങൾ ..! 


ഒരിക്കലും വറ്റി വരളാത്ത സൈബർ - ബൂലോഗ സൗഹൃദങ്ങൾ

അപ്പോൾ പുലി മടയിൽ ചെന്ന ചെന്നായയുടെ കഥ പോലെയായി എന്റെ സ്ഥിതി വിശേഷങ്ങൾ...

തൊഴുതും, നമിച്ചും പല ബൂലോക പുലികളുടേയും , പുലിച്ചികളുടേയും
അനുഗ്രഹാശീർവാദങ്ങൾ വാങ്ങുവാൻ വണങ്ങി നിന്ന , എന്നെയോ - എന്റെ
തട്ടകട്ടേയൊ അവരിൽ ഒട്ടുമിക്കവരും ഒരു പൂച്ചക്കണ്ണോണ്ട് പോലും  തിരിഞ്ഞ് നോക്കിയില്ല...!

കഴുതക്കാൽ പിടിക്കുവാൻ നോക്കിയിട്ട് ,കഴുത സ്വന്തം കാലിൽ പിടിച്ച എന്ന അവസ്ഥയിലായി ഞാൻ..!
മല മമ്മദിനടുത്തെത്തിയില്ലെങ്കിൽ...
മമ്മദ് മലയുടെ അടുത്തേക്ക് പോകും എന്ന പോലെ
ഒരോ മലയും , ഒട്ടും മടുപ്പില്ലാതെ കയറിയിറങ്ങി കണ്ടും , കേട്ടുമൊക്കെ ആ മലയഴകുകൾ നോക്കിയിട്ടും , പല ആംഗലേയ ബ്ലോഗ് പർവ്വതങ്ങളിലെ പകിട്ടുകൾ കണ്ടിട്ടും അതു പോലെ  ഞാനും ഒരു കുന്നുണ്ടാക്കി ..
വെറും മൊട്ട കുന്ന് ... , ‘ബിലാത്തി പട്ടണ‘മെന്ന മൊട്ടക്കുന്ന് ...!

സപ്ത വർഷ ശ്രീ സമ്പൂർണ്ണ ബൂലോഗന :



അമേരിക്കൻസൈക്കോളജി അസോസ്സിയേഷൻ ഈയിടെ കണ്ടെത്തി ,വ്യക്തമാക്കിയ ഒരു സംഗതിയുണ്ട് - 'ഓൺ ലൈനി'ൽ അനേകം മിത്രങ്ങളുള്ള
ഒരാൾ ‘ഓഫ് ലൈനിൽ ‘ , 
തനി ഏകാന്ത പഥികനായി മാറികൊണ്ടിരിക്കും എന്നതാണ്  ...
അതായത് അത്തരത്തിലുള്ളവരൊക്കെ ആൾക്കൂട്ടങ്ങളിൽ തനിയെ ആയിക്കുമെന്ന് .. !
അന്തർദ്ദേശീയ ആരോഗ്യ സംഘടനയുടെ പുതിയ പ്രബന്ധത്തിലും
പറയുന്നതിതാണ് 'സോഷ്യൽ നെറ്റ് വർക്ക് സൈറ്റുകൾ' മനുഷ്യനെ ‘സോഷ്യൽ ലെസ്സ്’ ആക്കികൊണ്ടിരിക്കുന്നു എന്ന സത്യമാണ് ...

ഇന്ന് നാം ഓരോ‍രുത്തർക്കും തമ്മിൽ തമ്മിൽ ഇതുവരെ കാണാത്ത ,
ഒന്ന് പരസ്പരം  മിണ്ടാത്ത നൂറുകണക്കിന് മിത്രങ്ങൾ , ഇത്തരം പല നെറ്റ് വർക്ക് തട്ടകങ്ങളിലും , അതിനകത്തുള്ള കൂട്ടായ്മകളിലുമായി  അണികളായി എപ്പോഴും കൂടെ ഉണ്ട് ...
ഏതെങ്കിലും അവസരത്തിൽ നേരിട്ട് കണ്ടാൽ പോലും
അങ്ങോട്ടുമിങ്ങോട്ടും തിരിച്ചറിയുവാൻ പോലും പറ്റാത്തവരായ കൂട്ടുകാർ ...

'സ്‌മൃതി' ഉണർത്തുന്ന 'ഛായ '

അതായത് പഴയ വീഞ്ഞ് പുതിയ കുപ്പിയിലാക്കി  വീര്യം വർദ്ധിപ്പിച്ചു കിട്ടുന്ന 'ഒരു ജ്യാതി' ലഹരികളാണ് ഓരോ ബൂലോക തട്ടകങ്ങളിലും ഇന്നുള്ളത് ... !
എന്റെ  സ്വന്തം തട്ടകം ബിലാത്തിപട്ടണത്തിന്റെ എട്ടാം വാർഷികമാണിന്ന് ...
ദേ ..ഇവിടെ എട്ട് നിലയിൽ വർണ്ണാമിട്ടുകൾ പൊട്ടുന്നത് കണ്ടില്ലേ ...
സാഹിത്യത്തിലൊന്നും എട്ടും പൊട്ടും തിരിയാതെയാണെങ്കിലും  ഞാൻ ഇവിടെ കൊട്ടിഘോഷിക്കുന്ന പൊട്ടത്തരങ്ങളെല്ലാം ലോകത്തിന്റെ എട്ട് ദിക്കുകളിൽ നിന്നും  , കഴിഞ്ഞ എട്ട് വർഷങ്ങളായി പ്രോത്സാഹിപ്പിച്ച്‌ കൊണ്ടിരിക്കുന്നനിങ്ങൾ ഓരോരുത്തർക്കും  ..... കൊട്ടപ്പറ നന്ദി കേട്ടോ കൂട്ടരേ ...

ആംഗലേയ നാട്ടിലെ ഭാഷാ സ്നേഹികളായ മല്ലു വല്ലഭർ


തനി തൃശൂർക്കാരനായ ഒരുവൻ കാൽ നൂറ്റാണ്ട് മുമ്പ് നാട്ടിലെ 
വായനശാല കൈയെഴുത്ത് പതിപ്പുകളിലും , കോളേജ് മാഗസിനുകളിലും , 
പൂരം സുവനീയറുകളിലും , മാതൃഭൂമി ബാലപംക്തി , എക്സ്പ്രസ് പത്രത്തിന്റെ 
വരാന്ത പതിപ്പ് എന്നീ മാദ്ധ്യമങ്ങളിൽ വൃത്തവും , പ്രാസവും ചേർത്ത കവിതകളും , 
പ്രണയ കഥകളുമൊക്കെ എഴുതി , സാഹിത്യ അക്കാദമിയുടെയും മറ്റും ഉമ്മറത്തുള്ള സകലമാന പരിപാടികളിലും പങ്കെടുത്തും , തെരുവ് നാടകങ്ങൾ കളിച്ച് , ശാസ്ത്ര സാഹിത്യ പരിഷത്തിന്റെ കലാ ജാഥകളിൽ അണിചേർന്ന് നാട്ടിൽ ബുദ്ധിജീവി പട്ടം വരുത്തുവാൻ  ജുബ്ബയും , കാലൻ കുടയുമൊക്കെയായി നടന്നിരുന്നവൻ ധാരാളം വായിച്ചു  തുടങ്ങിയപ്പോൾ , തന്റെ കഥകളിലെ  കഥയില്ലായ്മയും , കവിതകളിലെ  കവിത ഇല്ലായ്മയുമൊക്കെ കണ്ട് ,

ആയ പരിപാടികളെല്ലാം   സ്വയം നിറുത്തി വെച്ച് , പിന്നീട് പന്തടിച്ച പോലെ ബിലാത്തിയിൽ വന്ന് , ലണ്ടനിലെ ഒരു മണ്ടനായി തീർന്നു ...! 

പിന്നീട് പല    മണ്ടത്തരങ്ങളെല്ലാം 
കൂട്ടിപ്പറുക്കി എഴുതിയിട്ട് ഒരു ബ്ലോഗ് തുടങ്ങി വെച്ചു . 
ആയതിന് 'ബിലാത്തി പട്ടണം' എന്ന പേരും ഇട്ടു .  അന്ന് മുതൽ 
ഇന്ന് വരെ വായിൽ തോന്നുന്നത് കോതക്ക് പാട്ടെന്ന പോലെ എഴുതി 
കൂട്ടുന്ന  ഈ 'ബിലാത്തി പട്ടണത്തിൽ' ലണ്ടനിലെ തനിയൊരു  മണ്ടനായി 
എഴുതുന്നവനാണ്  ഈ സാക്ഷാൽ മുരളീ  മുകുന്ദൻ  ...

ഈ ആർട്ടിക്കിൾ 'ബിലാത്തി പട്ടണം ബ്ലോഗിന്റെ
ഒന്പതാം വാർഷിക കുറിപ്പുകളാണ് കേട്ടോ കൂട്ടരേ 

ഒരു ദശകം പിന്നിട്ട ബൂലോഗ പ്രവേശം

ഇപ്പോൾ  ബ്ലോഗുലകത്തിൽ എന്റെ ബാല്യം വിട്ട് കൗമാരത്തിലേക്ക് പ്രവേശിക്കുകയാണ് ഞാൻ ...!
ഇനി ഒരു നല്ലൊരു യൗവ്വനമോ , വാർദ്ധ്യകമോ കൊണ്ടാടുവാൻ എനിക്കാവില്ല എന്ന സത്യം മനസ്സിലാക്കിക്കൊണ്ട് തന്നെ -
തനി കൗമാര ലീലകളുമായി ഞാൻ ചുമ്മാ മുന്നോട്ട് ഗമിക്കുവാൻ ശ്രമിക്കുകയാണ് ...

ഇതുവരെ സ്നേഹനിധികളായ നിങ്ങൾ ഓരോ മിത്രങ്ങളും എനിക്ക് തന്നുകൊണ്ടിരിക്കുന്ന പ്രോത്സാഹനങ്ങൾക്ക് ഒത്തിരിയൊത്തിരി നന്ദി ...
അപ്പപ്പോൾ മാത്രം പ്രതികരണം ലഭിക്കുന്ന
മറ്റനേകം സോഷ്യൽ മീഡിയകളേക്കാളും നമ്മുടെ
കാലം കഴിഞ്ഞാലും കാലാകാലം നിലനിൽക്കുന്നവയാണ്
നമ്മൾ ഓരോരുത്തരുടെയും 'ബ്ലോഗ് തട്ടക'ങ്ങളിൽ ഉണ്ടാക്കുന്ന
ഓരോ സൃഷ്ട്ടികളും ...!
അതുകൊണ്ട് എഴുതുവാനും, വരയ്ക്കാനും ,ഫോട്ടോഗ്രാഫിക്കും എന്ന്
വേണ്ടാ ഇന്ന് ലോകത്തുള്ള സകലമാന 'പ്രൊഡക്ടുകൾക്ക് വരെ ആയതിന്റെ റിവ്യൂയും മറ്റെല്ലാം വസ്തുവകകൾ അറിയാനും വരെ അതിന്റെയൊക്കെ ബ്ലോഗുകൾ
ഉള്ള കാലമാണിത് ..!   

ഇന്ന് പല പഴയ കാല ബൂലോക മിത്രങ്ങളും അപ്പപ്പോൾ മാത്രം പ്രതികരണം കിട്ടുന്ന 'മുഖപുസ്തക ബ്ലോഗുകളിലും , ഇൻസ്റ്റാഗ്രാമിലും , ടംബ്ലറിലും , ട്വിറ്ററിലു'മൊക്കെ റോന്ത് ചുറ്റുന്നത് കാണം . ആയതിൽ കുറിച്ചിടുന്ന രചനകളൊക്കെ - അവരവരുടെ ബ്ലോഗുകളിൽ കൂടി പതിച്ചിട്ടാൽ അവയെല്ലാം കാലാകാലം നിലനിൽക്കുകതന്നെ ചെയ്യും ...കേട്ടോ .


അങ്ങിനെ പതിനൊന്നിൻ നിറവിൽ 
ഒരു ബൂലോഗ പട്ടണം അതായത് പതിനൊന്നാം 
പിറന്നാൾ പിന്നിട്ട എന്റെ സ്വന്തം ബിലാത്തിപട്ടണം ...
നിങ്ങളുടേയും സ്വന്തം തന്നെയാണ് കേട്ടോ കൂട്ടരെ 

Monday, 30 September 2019

അമ്മ ചിന്തുകൾ ...! / Amma Chinthukal ...!

എല്ലാ മക്കളുടേയും മരുമക്കളുടേയും, പേര കുട്ടികളുടേയും അവസാന പരിചരണം ഏറ്റുവാങ്ങി - അടുത്ത എല്ലാ ബന്ധു മിത്രാധികളോടും മിണ്ടിപ്പറഞ്ഞ്, ആരോടും ഒരു യാത്ര പോലും പറയാതെ എട്ട് പതിറ്റാണ്ട് കാലം പിന്നിട്ട ജീവിതത്തിൽ നിന്നും എന്നന്നേക്കുമായി വിടപറഞ്ഞ് 2019 സെപ്തംബർ മാസം 19 - ന് അമ്മ പോയി...! 

അച്ഛന്റെ ചാരത്ത് വീണ്ടും വർഷങ്ങൾക്കു ശേഷം തറവാട്ടു വീടിന്റെ 
തെക്കേപ്പുറത്ത് പേരക്ക മാവിന്റെ ചുവട്ടിൽ, ഒരു പിടി ചാരമായി അന്ത്യവിശ്രമം കൊള്ളുകയാണിപ്പോൾ അമ്മ..!


കരുവന്നൂർ പുഴയുടെ തീരത്തുള്ള എട്ടുമുനയിൽ ജനിച്ചു വളർന്ന്, പൊട്ടുചിറ
സ്കൂളിൽ ടീച്ചറായിരുന്ന അമ്മയുടെ യൗവ്വന കാലം ഓർമ്മിപ്പിക്കുന്നത് പണ്ടത്തെ ബ്ലാക്ക് & വൈറ്റ് സിനിമകളിലെ ചില നായികമാരുടെ മുഖവും പ്രസരിപ്പുമൊക്കെയാണ്...
അതേ പ്രസരിപ്പും ഉന്മേഷവുമായി കാലം ചെല്ലും തോറും കണിമംഗലത്തെ
തറവാട്ടിലെ നാലു പുത്രവധുക്കളിൽ മരുമകളായും, അമ്മയായും, അമ്മായിയമ്മയായും , അമ്മൂമ്മയായും, ഒരു ഉത്തമ തറവാട്ടമ്മയായും ഏറ്റവും നന്നായി കൂടുതൽ കാലം നിറഞ്ഞാടിയത് അമ്മ തന്നെയായിരുന്നു എന്നത് യാഥാർഥ്യമാണ് ...
കഴിഞ്ഞ നൂറ്റാണ്ടിലും ഈ നൂറ്റാണ്ടിലുമായി അമ്മയുടെ അമ്മ മുതൽ മകളുടെ
പേരക്കുട്ടിയടക്കം അഞ്ച് തലമുറകളെ വരെ പരിപാലിക്കുവാനുള്ള സൗഭാഗ്യം കൂടി കിട്ടിയിട്ടാണ് അമ്മ പോയത്... 
അമ്മക്ക് പ്രണാമം..

ഞങ്ങൾ മക്കളെല്ലാം കുടുംബസമേതം അമ്മയോടോപ്പമുള്ള ഒത്തുകൂടലുകൾ കഴിഞ്ഞ രണ്ട് ദശകങ്ങളായി കൊല്ലത്തിൽ ഒന്നോ രണ്ടോ തവണ മാത്രമെ സംഭവിക്കാറുള്ളൂ .

ഇക്കാലങ്ങളത്രയും നേരിട്ട് കാണാറില്ലെങ്കിലും ആഴ്ച്ചയിൽ ഒരുവട്ടമെങ്കിലും അമ്മയുമായി ഫോണിൽ കൂടി സംസാരിക്കുകയൊ , ഇന്റർനെറ്റ് മുഖാന്തിരം കാണുകയൊ ചെയ്യാത്ത അവസരങ്ങൾ ഇല്ലെന്ന് തന്നെ പറയാം .


അനുജനും കുടുംബവും  തൊട്ടപ്പുറത്ത് താമസിക്കുന്നുണ്ടെങ്കിലും കഴിഞ്ഞ ഒന്നൊര പതിറ്റാണ്ടായി തറവാട്ടുവീട്ടിൽ ഒറ്റക്ക് അമ്മയുടേതായ ചിട്ടവട്ടങ്ങളോടെ ഒരു തറവാട്ടമ്മയായി വാഴുകയായിരുന്നു ഈ സ്ത്രീരത്നം. എന്റെ സഹോദരിമാർ രണ്ടും കുടുംബാംഗങ്ങളുമായി  ഇടക്കിടക്ക് മാതാശ്രീയോടൊപ്പം വന്നുനിന്നും പോകാറുണ്ടായിരുന്നു.

പക്ഷെ മൂനാലുകൊല്ലമായി അമ്മയുടെ ഇഷ്ടപ്രകാരം എല്ലാ ഓണക്കാലങ്ങളിലും നാലുമക്കളും മരുമക്കളും പേരക്കുട്ടികളുമെല്ലാം തറവാട്ടിലെത്തി ഒത്തുകൂടി കുറച്ച് ദിവസം അടിപൊളിയായി ഓണാഘോഷങ്ങളിൽ പങ്കെടുത്തെ പിരിഞ്ഞുപോകാറുള്ളൂ


അമ്മയുടെ ഓണത്തിന് മാധുര്യം ഏറെയാണ് . അര നൂറ്റാണ്ടിലേറെയായി വീട്ടമ്മയായും തറവാട്ടമ്മയായും ഒരുമയുടെയും ഒത്തു ചേരലിന്റെയും പൊന്നോണ നാളുകൾ കൊണ്ടാടുന്ന അമ്മക്ക് എട്ട് പതിറ്റാണ്ടിൽ മേലെയുള്ള ഓണം ഓർമ്മകൾ ഉണ്ട്...
സന്തോഷവും, ദു:ഖവും, സങ്കടവുമൊക്കെ ഇഴപിരിഞ്ഞുള്ള എത്രയെത്ര ഓണക്കഥകളാണ് അമ്മ ഞങ്ങളെയൊക്കെ അപ്പോൾ ചൊല്ലി കേൾപ്പിച്ചിട്ടുള്ളത്... 

ഇതുമാത്രമല്ല സ്വാതന്ത്യ്രത്തിനു മുമ്പുള്ള  ഭാരത്തിന്റെ കഥയും , മലയാള നാടുകളുടെ കഥയും പിന്നീട് അവയൊക്കെ ഒന്നായി പുതു കേരളം ഉടലെടുത്ത അനുഭവ ചരിതവുമൊക്കെ പല പുരാണ കഥകൾക്കൊപ്പം ഇത്തിരി പൊടിപ്പും തൊങ്ങലും വെച്ച് ബാല്യകാലത്തൊക്കെ ഞങ്ങൾക്ക് വിളമ്പിത്തന്നിട്ടുള്ളതും ഈ ടീച്ചറമ്മ തന്നെയായിരുന്നു ...!

ഇതൊന്നും പോരാത്തതിന് എനിക്ക് ഇരുപത് തികയുന്നതിന് മുമ്പ് ഞങ്ങളുടെ അച്ഛൻ അകാലത്തിൽ ഞങ്ങളെ വിട്ട് പോയതിന് ശേഷം സ്വന്തം താലി മാലയടക്കം ,പുരയിടത്തിലെ പ്ലാവും  തേക്കുമൊക്കെ വിറ്റിട്ട് വരെ തന്റെ നാലുമക്കളേയും നല്ല ചൊല്ലുള്ളിയോടെ പഠിപ്പിച്ച് വളർത്തി വലുതാക്കി സ്വന്തം കാലിൽ ഉയർന്ന് നിൽക്കുവാൻ പ്രാപ്തരാക്കിയതിന്റെ ഫുൾ ക്രെഡിറ്റും അമ്മക്ക് മാത്രം അവകാശപ്പെട്ടതാണ് ...

അതിനുശേഷം  അതാതുസമയത്ത് നാട്ടുനടപ്പനുസരിച്ച് നാലുമക്കളുടെ കല്യാണവും  പിന്നീട്  കാലക്രമേണ  എട്ട് പേരക്കുട്ടികളും ജനനവും കഴിഞ്ഞപ്പോൾ അമ്മായിയമ്മയും മുത്തശ്ശിയുമായി കൂടുമാറ്റം നടത്തി അവസാനം പെങ്ങളുടെ മകൾക്ക് കുട്ടിയുണ്ടായപ്പോൾ മുതുമുത്തശ്ശി  പട്ടവും വരെ അലങ്കരിക്കുവാൻ ഭാഗ്യം സിദ്ധിച്ചവളാണ് -  ഇപ്പോൾ ഞങ്ങളുടെ അച്ഛന്റെ തറവാട്ടിലെ കാരണവത്തിയായിരുന്ന ഈ ആയമ്മ .

ഷഷ്ടിപൂർത്തിയും ,സപ്തതിയുമെല്ലാം വെറും ചെറിയ ആഘോഷങ്ങളിൽ ഒതുക്കിയ ഈ തറവാട്ടമ്മയുടെ  നവതിക്ക് മുമ്പ് കൊണ്ടാടുന്ന ആയിരം പൂർണ്ണ ചന്ദ്രമാരെ ദർശിക്കുന്ന ദിനം വളരെ കെങ്കേമമായി കൊണ്ടാടുവാൻ തീരുമാനിച്ച  ഞങ്ങൾ തറവാട്ടിലെ ഇളംമുറക്കാരെ ദു:ഖത്തിലാഴ്ത്തിയാണ് അമ്മയുടെ വേർപ്പാട് ഇപ്പോൾ പെട്ടെന്നുണ്ടായത് .
ആയിരം പോയിട്ട് നൂറല്ല ഒരു ഫുൾ മൂണിനെ പോലും പത്ത് മിനുട്ടിൽ  കൂടുതൽ നോക്കിനിന്നിട്ടില്ല  എന്നാണ് ഇതിനെ കുറിച്ച് അമ്മയോട് പറഞ്ഞപ്പോൾ കിട്ടിയ ഉത്തരം.
ആയതിന് ബാല്യം തൊട്ട് ഇതുവരെയുണ്ടായിരുന്ന മുതുമുത്തശ്ശിയടക്കം തറവാട്ടമ്മപ്പട്ടം ചാർത്തി കിട്ടുന്ന വരെ മാന:സമാധാനത്തോടെ അര നാഴിക പോലും ഒന്ന് കുത്തിയിരിക്കുവാൻ സാധിച്ചിട്ടില്ലാത്തവളായിരുന്നുവല്ലോ ഈ പുണ്യവതി   .



വീട്ടിലെയും മറ്റും പല തീരുമാനങ്ങൾ എടുക്കേണ്ടി വരുമ്പോഴും  വല്ലാത്ത ധൈര്യത്തോടെ ആയത് ഏറ്റെടുത്ത്  നടപ്പിലാക്കുവാനുള്ള ഒരു പ്രത്യേക പ്രാവീണ്യം അമ്മക്കുണ്ടായിരുന്നു .  പണ്ട് ചെറുപ്പകാലങ്ങളിൽ പൂർണ്ണ നിലാവുള്ളപ്പോൾ പോലും ഓലകൊണ്ട് മറച്ചുണ്ടാക്കിയ മറപ്പുരയിലേക്ക് പോകുവാനൊ , തൊടിയിലെ കുളത്തിൽ പോയി കുളിക്കുവാനോ വരെ അമ്മയ്ക്കും സോദരിമാർക്കുമൊക്കെ ഒരു വല്ലാത്ത പേടിയായിരുന്നു എന്നാണ് 'അമ്മ പറയാറ് .അന്നത്തെ ആ പേടിത്തൊണ്ടിയായ ഒരു പെണ്ണിൽ നിന്നും അപാര ധൈര്യവതിയായി മാറിയതിന് ഏറ്റവും നല്ല ഒരു  ഉദാഹരമാണ് മൂനാലുകൊല്ലം മുമ്പ്  പാതിരാവിൽ വീട് പൊളിക്കുവാൻ വന്ന ഒരു കള്ളനെ  ഒറ്റക്ക് താമസിക്കുന്ന അമ്മ ഓടിച്ചു വിട്ടത് .




അമ്മയുടെ ജീവിതാനുഭങ്ങൾ വർണ്ണിക്കുകയാണെങ്കിൽ ഇതുപോലെ എത്രയെത്ര പറഞ്ഞാലും തീരാത്ത കാര്യങ്ങളുണ്ട് .അതെ നമ്മൾ ഓരോരുത്തരും എത്ര വലുതായി ഏത് ഉന്നത സ്ഥാനങ്ങൾ കരസ്ഥമാക്കിയതിന് പിന്നിലും ഇത്തരം കാര്യക്ഷമമായി പ്രവർത്തിച്ച അമ്മക്കരങ്ങളുണ്ടാകും ..!

അവർ ജീവിച്ചിരിക്കുന്ന കാലം 
വരെ അവരുടെ കുഞ്ഞുങ്ങളായി നമ്മളും . 
അതെ നമ്മുടെ  അമ്മയുടെ വേർപ്പാടിനോളം 
അനാഥത്വം ഉള്ളത് വേറെ എന്തിനാണ് ഉള്ളത് അല്ലെ 









അമ്മ ചിന്തുകൾ ...

Thursday, 29 August 2019

സൈബർ ഉലകത്തിൽ വാഴും മിത്രങ്ങൾ ...! / Cyber Ulakatthil Vazhum Mithrangal ...!

ഇന്ന്  ഇത്തിരി വായനയും എഴുത്തും അറിയാവുന്ന ഒരാൾക്ക് ആയിരത്തിലധികം  സൈബർ മിത്രങ്ങൾ ഉണ്ടെന്നാണ് പറയപ്പെടുന്നത് .
ആഗോളതലത്തിൽ എടുത്ത് നോക്കുകയാണെങ്കിൽ ഇന്ന് ലോക
ജനസംഖ്യയുടെ 43% ആളുകൾ ഇന്റെർനെറ്റ് ഉപയോഗിക്കുന്നവരും,  
ഇവരിൽ മുക്കാൽ ഭാഗം പേരും സോഷ്യൽ നെറ്റ് വർക്ക് ഉപഭോക്താക്കളും ആണെത്രെ ...

ഇന്നത്തെ ഡിജിറ്റൽ ലോകത്ത് ഏതാണ്ട് 170 ൽ പരം ആക്റ്റീവായ സോഷ്യൽ മീഡിയ നെറ്റ് വർക്ക് സൈറ്റുകൾ ഉണ്ട് . അവയിൽ ചിലവയെല്ലാം അന്തർദ്ദേശീയമായി വളരെ പേരും പെരുമയും  ഉള്ളവയും , മറ്റ് ചിലത് അതാതിടങ്ങളിലെ ദേശീയ പെരുമയിൽ , അവരവരുടെ ഭാഷാ തലത്തിൽ മാത്രം ഒതുങ്ങി നിൽക്കുന്നവയും ആ‍ണെന്ന്  മാത്രം ...

ഇതോടൊപ്പം എന്നുമെന്നോണം സൈബർ ലോകത്തേക്ക് കൂടുതൽ കൂടുതൽ ആളുകൾ തിക്കി തിരക്കി വന്നു കൊണ്ടിരിക്കുന്നു എന്നുമാത്രമല്ല , അവരെല്ലാവരും തന്നെ വിവിധ വിവര സാങ്കേതികത വിദ്യാ തട്ടകങ്ങളിൽഅവരവരുടെ സാനിദ്ധ്യങ്ങൾ കൊട്ടിഘോഷിക്കുകയും ചെയ്തുകൊണ്ടിരിക്കുന്ന ഒരു അവസ്ഥാവിശേഷം കൂടിയാണ്  ഇപ്പോൾ നടമാടികൊണ്ടിരിക്കുന്നത് ...

ഇന്ന് സോഷ്യൽ മീഡിയ നെറ്റ് വർക്ക് സൈറ്റുകളിൽ
അഭിരമിക്കുന്ന ഏറെ പേർക്കും ഇമ്മിണിയിമ്മിണി മിത്രങ്ങളുണ്ടായിരിക്കാം ...

ചാറ്റിങ്ങും , ചീറ്റിങ്ങും , സല്ലാപവും , ഒത്തുചേരലുകളുമൊക്കെയായി ഇത്തരം ‘ഫ്രെൻണ്ട് സർക്കിളുകൾ‘ എന്നുമെന്നോണം  വർദ്ധിച്ച് കൊണ്ടിരിക്കുകയും ചെയ്യുന്നു ...
അമേരിക്കൻ സൈക്കോളജി അസോസ്സിയേഷൻ ഈയിടെ കണ്ടെത്തി ,
വ്യക്തമാക്കിയ ഒരു സംഗതിയുണ്ട് - 'ഓൺ ലൈനി'ൽ അനേകം മിത്രങ്ങളുള്ള ഒരാൾ ‘ഓഫ് ലൈനിൽ ‘ , തനി ഏകാന്ത പഥികനായി മാറികൊണ്ടിരിക്കും എന്നതാണ്  ...
അതായത് അത്തരത്തിലുള്ളവരൊക്കെ ആൾക്കൂട്ടങ്ങളിൽ തനിയെ ആയിക്കുമെന്ന് .. !

അന്തർദ്ദേശീയ ആരോഗ്യ സംഘടനയുടെ പുതിയ പ്രബന്ധത്തിലും
പറയുന്നതിതാണ് 'സോഷ്യൽ നെറ്റ് വർക്ക് സൈറ്റുകൾ' മനുഷ്യനെ ‘സോഷ്യൽ ലെസ്സ്’ ആക്കികൊണ്ടിരിക്കുന്നു എന്ന സത്യമാണ് ...!

വിവര വിജ്ഞാന മേഖലയിലെ മേന്മകൾക്കൊപ്പം മനുഷ്യനുണ്ടാകുന്ന
 ഇത്തരം ഏകാന്തതയെ കുറിച്ചൊക്കെ വ്യക്തമാക്കിത്തരികയും , പോംവഴികൾ പറഞ്ഞുതരികയും ചെയ്യുന്ന , M I T യിലെ ‘പ്രൊഫ: ഷെറി ടർക്ലി‘ന്റെ ഈയിടെയായി പ്രസിദ്ധീകരിച്ച വളരെ പ്രസിദ്ധമായ  Alone Together  എന്ന പുസ്തകകമോ , ‘ടോക് ഷോ‘യൊ താല്പര്യമുള്ളവർക്ക് പോയി എത്തി നോക്കാവുന്നതാണ്...


ഇന്ന് നാം ഓരോ‍രുത്തർക്കും തമ്മിൽ തമ്മിൽ ഇതുവരെ കാണാത്ത ,
ഒന്ന് പരസ്പരം  മിണ്ടാത്ത നൂറുകണക്കിന് മിത്രങ്ങൾ , ഇത്തരം പല നെറ്റ് വർക്ക് തട്ടകങ്ങളിലും , അതിനകത്തുള്ള കൂട്ടായ്മകളിലുമായി  അണികളായി എപ്പോഴും കൂടെ ഉണ്ട് ...

ഏതെങ്കിലും അവസരത്തിൽ നേരിട്ട് കണ്ടാൽ പോലും
അങ്ങോട്ടുമിങ്ങോട്ടും തിരിച്ചറിയുവാൻ പോലും പറ്റാത്തവരായ കൂട്ടുകാർ ...!

അതായത് ഒരു കാര്യമെങ്കിലും നാം അറിഞ്ഞിരിക്കേണ്ടതുണ്ട് - 


ശരാശരി ഒരു മനുഷ്യന് ഒരേ സമയം മാക്സിമം  500 ൽ പരം ആളുകളുമായി

ആശയവിനിമയങ്ങൾ ; പരസ്പരം , സ്ഥിരമായി നടത്തികൊണ്ടു പോകുവാൻ
സാധിക്കില്ല എന്ന വസ്തുത നാം ഒരോരുത്തരും മനസ്സിലാ‍ാക്കിയിരിക്കണമെന്ന് മാത്രം ...

പക്ഷെ എന്റെ കഴിഞ്ഞ ഒന്നൊരപതിറ്റാണ്ടിനിടയിലുള്ള സൈബർ കൂട്ടാളികളിൽ ഇന്നും ഉത്തമമിത്രങ്ങളായിട്ടുള്ള  അഞ്ഞൂറോളം പേരുമായി ഇപ്പോഴും സൗഹൃദം പങ്കിട്ടുകൊണ്ടിരിക്കുന്നത് ബ്ലോഗ് എന്ന നവ  മാധ്യമം കാരണമാണ് .
ഓർക്കുട്ട് മുതൽ ഇൻസ്റ്റഗ്രാം വരെയുള്ള പത്തോളം സോഷ്യൽ  മീഡിയ സൈറ്റുകളിൽ കൂടി  എനിക്ക് ആഗോളതലത്തിലുള്ള അനേകം മിത്രങ്ങളെ സമ്പാദിക്കുവാൻ  കഴിഞ്ഞെങ്കിലും ഇന്നും ഏറ്റവും അടുത്ത സൗഹൃദമുള്ളവർ ഈ ബ്ലോഗ് മിത്രങ്ങൾ തന്നെയാണ് ...!
ആയതിന്റെ ഉത്തമ ഉദാഹരണമാണ് താഴെ എഴുതിയിട്ടിരിക്കുന്ന എന്റെ ഒരു പഴയകാല ബ്ലോഗ് കുറിപ്പുകളായ 'ചില  കൊച്ചുകൊച്ച്  ബൂലോക  സഞ്ചാരങ്ങൾ'





ചില  കൊച്ചുകൊച്ച്  ബൂലോക  സഞ്ചാരങ്ങൾ  


ചക്ക ഉപ്പേരി മുതൽ കൂർക്ക വരെയുള്ള പലചരക്കുകൾ, ‘ഇട്ടിക്കോര‘ മുതൽ ‘കുമാരസംഭവങ്ങൾ‘ വരെയുള്ള ഒരടുക്ക് പുസ്തകങ്ങൾ , ഓണപ്പതിപ്പുകൾ തൊട്ട് തീണ്ടാരിക്കോണം വരെയുള്ള ലൊട്ട് ലൊടുക്ക് സാധനങ്ങൾ,..,..ഇങ്ങിനെ ഏതാണ്ട് ഒരു ടിക്കറ്റിൽ കൊണ്ടുപോകവുന്നതിനിരട്ടി  സാധനങ്ങളുമായി മടക്കയാത്രക്കൊരുങ്ങുമ്പോൾ , എയർപോർട്ടിൽ വെച്ച് എത്രസാധനങ്ങൾ മടക്കും /എത്ര പിഴയടക്കേണ്ടി വരും എന്ന ചിന്തയിലായിരുന്നു ഞാൻ...
ബോർഡിങ്ങ് പാസ് കിട്ടുവാൻ ചെക്കിങ്ങ് ചെയ്തിരുന്ന
പയ്യൻസ് പാസ്പോർട്ടും, ടിക്കറ്റുമെല്ലാം പരിശോധിച്ച്
“ബിലാത്തി പട്ടണം... മുരളിയേട്ടനാണോ.. സാർ..? “  എന്നൊരു ചോദ്യം.
എന്തിന് പറയാൻ എന്റെ ഹാന്റ് ക്യാരിയടക്കം 4 പെട്ടിയും ആ പയ്യൻസ് ലഗ്ഗേജിൽ വിട്ടു..
എക്കണോമി ക്ലാസ്  ടിക്കറ്റ് , ദുബ്ബായ് വരെ അപ്ഗ്രേഡ് ചെയ്ത് ബിസിനസ്സ് ക്ലാസാക്കി തന്നു..!
ലണ്ടൻ ഡ്രീമുമായി നടക്കുന്ന സോണി എന്ന ആ പയ്യൻ  ,
ബ്ലോഗ്ഗിങ്ങ് രംഗത്തേക്ക് കാലെടുത്ത് വെച്ചശേഷം,  എന്റെ
ബ്ലോഗിലെ പല പോസ്റ്റ്കളും വായിച്ചിട്ടുള്ളവനാണേത്രെ..! ! ? ?


നമ്പറുകളും, മെയ്ലയിഡിയും കൈമാറിയ ശേഷം , സോണിയെ ; ഞാനിതുവരെ നേരിട്ട് പരിചയപ്പെട്ട നാനൂറ്റിനാലാം  നമ്പർ ബൂലോകനായി എഴുതിച്ചേർത്തു...!

എന്നാലും ബൂലോഗരെകൊണ്ടുള്ള
ഓരോരൊ ഉപകാരങ്ങൾ നോക്കണേ ... !

ബൂലോഗരോടുള്ള പ്രണയാവേശം മൂത്തുമൂത്ത് ആയതൊന്ന് ആറിത്തണുപ്പിക്കുവാൻ പത്തിരുപത് ദിവസം നാട്ടിൽ‌പ്പോയി വന്നിട്ട് അതിലും വലിയ ആവേശത്തോടെ നാട്ടിൽ വെച്ചുണ്ടായ
ബൂലോഗസംഗമങ്ങളായ  കണ്ണൂർ സൈബർ മീറ്റിനേയും , ഒരു കൊച്ചു വലിയ തൃശ്ശൂര്‍  മീറ്റിനേയും  ഓണത്തേയും, പുലിക്കളിയേയും, തോരാത്ത മഴയേയുമൊക്കെ ഒന്ന് വർണ്ണിക്കാമെന്ന് ചിന്തിച്ച് ബിലാത്തിപട്ടണത്തിൽ വന്ന് എല്ലാമൊന്ന് പൊടിതട്ടിക്കളഞ്ഞ് എഴുതാനിരുന്നപ്പോഴുണ്ട്...
ഈ സംഭവവികാസങ്ങളെ കുറിച്ചെല്ലാം , എന്നേക്കാളും വിവരമുള്ളവർ അസ്സലായിട്ട് ഫോട്ടോകൾ സഹിതം ഉഗ്രൻ കിണ്ണങ്കാച്ചിയായി പോസ്റ്റുകൾ ചമച്ച് , അഭിപ്രായവലകൾ വിരിച്ച് കാത്തിരിക്കുന്ന കാഴ്ച്ചകളാണെനിക്കിപ്പോൾ കാണാൻ പറ്റുന്നത്..!

പശുവും ചത്തു... മോരിലെ പുളിയും പോയി എന്ന് പറഞ്ഞ പോലെ ഞാനിതിനെ കുറിച്ചൊക്കെ ഇനി ഉന്തുട്ട് എഴുതാനാ അല്ലേ..?

എന്തൊക്കെ പറഞ്ഞാലും കുറെ കൊല്ലങ്ങളായുള്ള ലണ്ടനിലെ യാന്ത്രികജീവിതത്തിനിടയിൽ ബൂലോകപ്രവേശം നടത്തിയതിന്  ശേഷം നേരിട്ട് കണ്ടിട്ടും , കേട്ടിട്ടും ഇല്ലാതെ വളർന്നു വന്ന നല്ലൊരു മിത്രകൂട്ടായ്മയാണ് ,  ഈ ബൂലോകത്തിൽ മറ്റുള്ള ബ്ലോഗ്ഗേഴ്സിനേപ്പോലെ എനിക്കും ഈ ഭൂലോകത്തിൽ ഇന്നുള്ളത് ...!

ഓൺ-ലൈൻ ബന്ധങ്ങളിൽ മാത്രം ഒതുങ്ങിനിന്നിരുന്ന ഈ സൌഹൃദങ്ങള്‍ക്ക്  വളരെയധികം മാറ്റും ഉറപ്പും കൈവരുമെന്ന് ബിലാത്തിയിലെ പ്രഥമ ബൂലോകസംഗമത്തിലൂടെ ആയത് മനസ്സിലാക്കുവാനും മറ്റും , അന്നുമുതൽക്കേ  ഞങ്ങൾക്ക്  സാധിച്ചിരുന്നൂ..

ഇവിടെ നിന്നും അന്നത്തെ പല ബൂലോഗരും പലവഴിക്കും പിരിഞ്ഞുപോയെങ്കിലും ഇന്നും പ്രായ-ലിംഗ ഭേദമന്യേ ആ സ്നേഹബന്ധങ്ങൾ   ഞങ്ങളോരോരുത്തരുടേയും ഉള്ളിന്റെയുള്ളിൽ ആഴത്തിലിപ്പോഴും വേരോടിയിരിക്കുകയാണെന്ന് നിസംശയം പറയാം കേട്ടൊ.
അതുകൊണ്ടാണല്ലോ നാട്ടിലെത്തിയപ്പോൾ ബ്ലോഗർ അരുണിന്റെ പ്രണയസാക്ഷ്ക്കാരമായി നടന്ന കല്ല്യാണ തലേന്ന് ഒരു ബ്ലോഗ്മീറ്റായാതും ...!

വേറൊരു ദിനം കോട്ടയം കരിമ്പിങ്കാല ഷാപ്പിൽ വെച്ച് പ്രദീപ്,വിഷ്ണു,സമദ്,മേരി കുട്ടി ,അശോക്,ഷിഗിൻ,ബാലു,..,...,..., എന്നിവരൊക്കെയായി ബ്ലോഗീറ്റ് നടത്തിയതുമൊക്കെ...!

ഇത് ബിലാത്തിയിലുണ്ടായിരുന്ന ബൂലോഗരുടെ മാത്രം സ്ഥിതിയല്ലല്ലോ...
ഭൂലോകം മുഴുവനുമുള്ള പരസ്പരം നേരിട്ട് പരിചയം പുതുക്കിയ ഒട്ടുമിക്ക ബൂലോഗർക്കും അനുഭവജ്ഞാനം ഉണ്ടായിട്ടുള്ള  കാര്യങ്ങൾ  തന്നെയാണല്ലോ..അല്ലേ !

ബൂലോകത്തിലൂടെ മാത്രം പരിചയമുണ്ടായിരുന്ന പലരേയും
കണ്ടും, കേട്ടും അറിയുമ്പോഴുള്ള ആ സന്തോഷം ഒന്ന് വേറെ തന്നെ...!

ഏതാണ്ടൊരു മൂന്നുകൊല്ലത്തോളമായി എനിക്ക് ഏറ്റവും കൂടുതൽ
സന്തോഷം നൽകുന്ന സംഗതികളായി പരിണമിച്ചിരിക്കുന്ന വസ്തുതകൾ
എന്തെന്ന് വെച്ചാൽ ഇതുവരേയുണ്ടായിരുന്ന മറ്റു പല കൂട്ടുകെട്ടുകളേക്കാളും ,
മാനസികമായി പ്രത്യേകമായി ഒരു നല്ലൊരുരീതിയിലുള്ള ഒരടുപ്പമാണ് ഇത്തരം
പുത്തൻ ബൂലോഗകൂട്ടായ്മകൾ മൂലം കൈവന്നിരിക്കുന്നെതെന്ന് , ഇതുവരെയുള്ള
അനുഭവങ്ങൾ വെച്ച് എനിക്ക് വളരെ വ്യക്തമായി തന്നെ  ഉറപ്പിച്ചു പറയാൻ കഴിയും.

അതുകൊണ്ട് അന്നുമുതൽ ഇന്നുവരെ കണ്ടും കേട്ടും പരിചയപ്പെടുന്ന എല്ലാബൂലോഗമിത്രങ്ങളുടേയും ഡാറ്റകൾ എന്റേതായ രീതിയിൽ ഞാൻ ഒരു ഡയറിയിൽ കുറിച്ചിടുന്നൂ...
ഇപ്പോൾ അതിൽ 404 പേരുകളായി..!

ബൂലോഗത്ത് എന്നും സജീവമായിട്ടുള്ളവർ തൊട്ട് , പഴയ കാല ബൂലോക തലതൊട്ടപ്പന്മാർ വരെ ഈ ലിസ്റ്റിലുണ്ട് കേട്ടൊ.

മറുപേരുള്ള ബ്ലോഗ് നാമധേയങ്ങളാൽ മാത്രം അറിയപ്പെടുന്ന  അതി പ്രശസ്തരായ തിലകൻ , നസുറുദീൻ, ഡോ: സുജിത്ത്, ബാലൻ, സുനിൽ , ഡാലി ജോസഫ്, സുനിൽ,..മുതൽ വിമർശനങ്ങളാലും,ആക്ഷേപ ഹാസ്യങ്ങളാലും പേരെടുത്ത ഗവർമേന്റ് ഉദ്യോഗസ്ഥർ തൊട്ട് , ഇന്നും ബൂലോകത്ത് നിന്നും സ്വയം മറഞ്ഞുനിൽക്കുന്ന ചേർക്കോണം സ്വാമികൾ, കൊല്ലേരി തറവാടി (പാവം എന്നെ പേടിച്ചിട്ടാണേന്ന് തോന്നുന്നു, എന്നെ തറവാട്ടിൽ കയറ്റിയില്ല ), കാർമേഘം, നന്ദന, ഇടിവാൾ...വരെയുള്ളവർ  ഇത്തവണ ഞാൻ നേരിട്ട് പോയി മീറ്റിയീറ്റിയവരാണ് കേട്ടൊ.

ഇതേപോൽ  സ്വന്തം പേര്  പുറത്തറിയിക്കാത്ത
കുറെ യുവതുർക്കികളായ ബ്ലോഗേഴ്സും , ബ്ലോഗിണിമാരും തൊട്ട്

എന്റെ കളികൂട്ടുകാരിയായ ഈയിടെ പേരെടുത്ത ബ്ലോഗിണിയടക്കം ,  നാട്ടിൽ പരിസരങ്ങളിലുള്ള പല പ്രശസ്ത ബ്ലോഗിണിമാരുമൊക്കെയായി ഞാനിത്തിവണ നാട്ടിൽ പോയപ്പോൾ  കണ്ടും, കേട്ടും പരിചയം പുതുക്കി.
ഒപ്പം നമ്മുടെ ഗീതാജിക്കും,സുകന്യാജിക്കുമൊക്കെ ഞാനവരുടെ വീ‍ട്ടിൽ വിരുന്നെത്താത്തതിന്റെ പരിഭവവും എനിക്ക് കൈകൊള്ളേണ്ടി വന്നു.

രാത്രിയിലും , പകലുമൊക്കെയായി മഴയും വെയിലും വകവെക്കാതെ  ,തട്ടുകടകളിലും മറ്റും നാടൻ രുചികൾ തൊട്ടറിഞ്ഞ് ,വിരുന്നുണ്ട് ,വിരുന്നിന് വിളിച്ച് കണ്ടും , കേട്ടും , സല്ലപിച്ചും കുറെ ബൂലോഗരുമായുള്ള  നല്ലൊരു അവുധിക്കാലമായിരുന്നു ഇത്തവണത്തെ എന്റെ നാട്ടുപര്യടനം...

മലായാളത്തിൽ ഇ-എഴുത്തുകൾക്ക് തുടക്കം കുറിച്ച് ഇപ്പോൾ വിക്കിപീഡിയയിൽ എത്തിനിൽക്കുന്ന വിശ്വപ്രഭയും , ശീഷ്യനായ 11 വയസ്സുകാരൻ വിഷ്ണു എന്ന സബ്ജൂനിയർ ബ്ലോഗറും , ഭൂലോകത്തെ സകലമാന സംഗതികളിലും കൈവെച്ച് ബൂലോകത്തെത്തിക്കുന്ന സുകുമാരൻ  സാറും, നാട്ടിലെ ഒരു സിറ്റിസൺ ജേർണലിസ്റ്റിനേപ്പോലെ പലകാര്യങ്ങളും വിമർശിച്ചെഴുതുന്ന ചിത്രകാരനും, വളരെ ആഴത്തിൽ പലകാര്യങ്ങളും ചിന്തിച്ചെഴുതുന്ന നാമൂസും , വർത്തമാനം പത്രത്തിന്റെ അധിപൻ മുക്താറും, സിനിമാലോകം കൈയ്യടക്കാൻ പോകുന്ന മുരളീമേനോൻ,മാർജാരൻ,അംജിത് മുതൽ പേരും, കഥകളുടെ തമ്പുരാക്കന്മാരായ ഘനഗാംഭീര്യ ശബ്ദത്തിൽ സംസാരിക്കുന്ന റാംജിയും , പിന്നെ  മഹേഷ് വിജയനും,കുട്ടന്മേനോനും,
 ഉള്ളുപൊരിയുന്ന എഴുത്തുകളോടെ കഥകൾ ചമക്കുന്ന കിളികൊഞ്ചലാൽ ഉരിയാടുന്ന എച്ച്മുകുട്ടിയും, ഏത് വിഷയവും ബ്ലോഗ്ഗിൽ ആവാഹിക്കുന്ന ജെ.പിയും , ഭാവിയിലെ ഒരു മന്ത്രിയാകുവാൻ സാധ്യതയുള്ള സമദ് വക്കീലും ,
ഒട്ടും കൂതറയല്ലത്ത ഹഷീമും , ക്യാമറ കൊണ്ട് മാജിക് കാണിക്കുന്നനൌഷാദും, റെജിയും,ബ്ലോഗ് മീറ്റുകളിലെ സ്ഥിരം ഡെലിഗേറ്റുകളായ സജിമാഷും,പൊന്മളക്കാരനും,ഷെറിഫ് ഭായിയും, മർമ്മം നോക്കി നർമ്മം കാച്ചുന്ന ചേലേരിമാണിക്യമായ അനിൽകുമാരനും,മിനിടീച്ചറും,പ്രസാധകയായ ലീല ടീച്ചറും, ബൂലോഗത്താൽ ജന്മസുഹൃതം  നേടിയ ശാന്ത ടീച്ചറും, മലയാളം ഗാനരചനാരംഗത്തെ വാഗ്ദാനമായ ഖാദർ പട്ടേപ്പാടം ഭായിയും , ബ്ലോഗക്കാദമികളിൽ എന്നും സജീവ സാനിദ്ധ്യം പുലർത്തുന്ന ആകാശവാണി ഡയറക്റ്റർ പ്രദീപ് ഭായിയും, വിനുവേട്ടനേയും,നീലത്താമരയേയും പോലെ യുവമിഥുനങ്ങളായ ബൂലോഗ ദമ്പതികളും...,...,...,..
ഒക്കെ അവരവരുടെ ഫീൽഡിൽ മാത്രമല്ല കേട്ടൊ മികവ് തെളിയിക്കുന്നത് , മറ്റുപല കാര്യങ്ങളിലും മികവുറ്റ പ്രതിഭകൾ തന്നെയാണെന്ന് ഇവരെയെല്ലാം കണ്ടും , കേട്ടും കഴിഞ്ഞപ്പോൾ മനസ്സിലായ സംഗതികളാണ്...!

നല്ലൊരു ബ്ലോഗ് പ്രണയകാലം വീണ്ടും എനിക്ക് സമ്മാനിച്ച
എന്റെ  എല്ലാ നല്ലവരായ ബൂലോഗ മിത്രങ്ങൾക്കും  ഒരുപാട് നന്ദി കേട്ടൊ.

കണിമംഗലവും , ലണ്ടനുമായി വെറും രണ്ട് ചെറിയ സർക്കിളുകളിൽ ഒതുങ്ങികൂടേണ്ടിയിരുന്ന ഞാനിപ്പോൾ  അമേരിക്കയിലും, ആഫ്രിക്കയിലും, ആസ്ത്രേലിയയിലും, കാനഡയിലും, ന്യൂസിലാന്റിലും , ചൈനയിലും , ജപ്പാനിലും, ഗൾഫ് രാജ്യങ്ങളിലും,ഭാരതത്തിന്റെ വിവിധ ഭാഗങ്ങളിലും, അങ്ങിനെയങ്ങിനെ ആഗോളതലത്തിൽ വ്യാപിച്ചു കിടക്കുന്ന  പല ബൂലോകമിത്രങ്ങളുടെ അടുത്തും മിക്കവാറും ദിവസങ്ങളിൽ  പോയിവരാറുണ്ട്...
അതേപോൽ അവർ തിരിച്ചും എന്നേയും സന്ദർശിച്ചുകൊണ്ടിരിക്കുന്നു..



ബൂലോഗ പ്രണയത്തിന്റെ, സ്നേഹത്തിന്റെ,  മാധുര്യത്തിന്റെ ഓളം
തള്ളുന്ന ആഗോള  ഭൂലോക ബൂലോക സഞ്ചാരങ്ങൾ എന്നുമെന്നും നടത്തുവാൻ വളരെ ഈസിയായി സാധിക്കുന്നതുകൊണ്ട്...
അതെ..
ലോകത്തുള്ള ഓരോരൊ ബ്ലോഗേഴ്സും
ഭാഗ്യം ചെയ്തവർ തന്നെ ...!

എന്തുകൊണ്ടെന്നാൽ അവരവരുടെ ഭാഷയുള്ളിടത്തോളം ബ്ലോഗുകൾ കാലാകാലം നിലനിൽക്കും ,എന്നാൽ മറ്റുള്ള സോഷ്യൽ മീഡിയ തട്ടകങ്ങൾ അവരവരുടെ കാലശേഷം നിലനിൽക്കില്ല എന്ന സംഗതിയാണിതിന് കാരണം...!

അതായത് ഇന്ന് സോഷ്യൽ അല്ലാതാകുകയാണ് ഇപ്പോൾ ഒരുവിധം സോഷ്യൽ മീഡിയ തട്ടകങ്ങൾ എന്നാണ് പുതിയ റിസേർച്ചുകൾ കണ്ടെത്തുന്നത് ...!

ഒരു സാമൂഹ്യ ജീവി എന്ന നിലയിലുള്ള മനുഷ്യന്റെ 
അധഃപതനത്തിന്റെ പുത്തൻ കാഴ്ച്ചകളാണിതൊക്കെ ... !

അധികമായാൽ അമൃതും വിഷം എന്നാണല്ലൊ 
ചൊല്ല് അത് കൊണ്ട് സൂക്ഷിച്ചാൽ നാം ദുഃഖിക്കേണ്ട ...!


അതിനാൽ ആർക്കുമെപ്പോഴും ഇന്നിപ്പോൾ എന്നുമെവിടേയും 
ഏറെ സുലഭമായി കിട്ടിക്കൊണ്ടിരിക്കുന്ന ഇന്റർനെറ്റും ഉളം കൈയിൽ കൊണ്ടുനടക്കാവുന്ന അത്യാധുനിക ഇലക്ട്രോണിക് ഉപകരണങ്ങളും അവരവരുടെ നിഴൽ  പോലെ കൂടെയുണ്ട് ...

ആയവ മുഖാന്തിരം  സോഷ്യൽ മീഡിയ സൈറ്റുകൾ മാത്രം അല്ലാതെ  ആമസോണിലെ നല്ല ഹോട്ട് മൂവികളും , നെറ്റ്‌സ്‌ഫിക്‌സിലെ പുതുപുത്തൻ ആഗോള സിനിമകളും , ബി.ബി.സി ഐ-പ്ളേയറിലെയും ,ഐ .ടി .വി. ഹബ്ബിലേയും ആനിമൽ  പ്ലാനറ്റടക്കമുള്ള കിണ്ണൻങ്കാച്ചി ഡോക്യമെന്ററികളും , യൂ ട്യൂബിലെ ഇഷ്ട്ടകാഴ്ച്ചകളും ഉള്ളിടത്തോളം കാലം മ്മ് ..ക്കൊക്കെ എന്തൂട്ട് പ്രശ്നം ...ല്ലേ ....






പതിനൊന്നിൻ നിറവിൽ ഒരു ബൂലോഗ പട്ടണം...! / Pathinonnin Niravil Oru Boologa Pattanam.. !

ഒന്നൊര പതിറ്റാണ്ട് മുമ്പ്  ഭൂമിമലയാളത്തിൽ  ബ്ലോഗുകൾ പിറന്നു വീണതിന് ശേഷം നാല്കൊല്ലം പിന്നിട്ടപ്പോഴാണ് എനിക്ക് മലയാളം   ബ്ലോഗുലകത്തിൽ  ഈ ...