Wednesday, 30 September 2020

ഒരു പുതിയ അമ്മൂമ്മയും മുത്തശ്ശനും ...! / Oru Puthiya Ammoommayum Mutthasshanum ...!

ഒരു മഹാമാരിയായ വ്യാപനവ്യാപ്‌തിയോടെ  പടർന്നുപിടിച്ച 'കോവിഡ് -19'  എന്ന കൊറോണ വൈറസുകൾ കാരണം ലോക ജനത മുഴുവൻ  ഇക്കൊല്ലം തുടക്കം മുതൽ ഇന്നുവരേക്കും ആഗോളതലമായി വല്ലാത്ത ദുരിതങ്ങൾ അനുഭവിച്ചു കൊണ്ടിരിക്കുന്ന സമയത്തിലൂടെയാണ് നാം ഏവരും ഇപ്പോൾ കടന്നുപോയി കൊണ്ടിരിക്കുന്നത് ...

നാഴിക കല്ലുകൾ കണക്കെ  ഓരൊ വർഷവും നമ്മുടെയൊക്കെ ജീവിതത്തിൽ നിന്നും പിന്നിട്ടുപോകുമ്പോഴും ,  അനേകം ദു:ഖങ്ങൾക്കൊപ്പം ഓർത്തുവെക്കുവാൻ വളരെ കുറച്ച് സന്തോഷം നൽകുന്ന അനുഭവങ്ങളും അക്കൊല്ലം നമ്മൾക്ക് നല്കിയിട്ടുണ്ടാകും ...

ഈ കൊറോണക്കാലം  വരുത്തിവെച്ച ദുരിതങ്ങൾക്കും, വിഷാദ രോഗത്തിനും ഇടയിൽ അത്തരത്തിലുള്ള ആനന്ദം നൽകിയ
ഒരു സംഗതിയെ കുറിച്ച് ചുമ്മാ എഴുതിയിടുകയാണ് ഞാനിവിടെയിപ്പോൾ ...

എന്റെയും ഭാര്യയുടേയും കഴിഞ്ഞ മൂന്നു പതിറ്റാണ്ടിന്റെ  ഒന്നിച്ചുള്ള പ്രണയജീവിതം  പിന്നിട്ടപ്പോൾ ഒരു അമ്മൂമ്മ പട്ടവും 
 മുത്തശ്ശൻ സ്ഥാനവും ഈ 
ജീവിതപാന്ഥാവിൽ കരസ്ഥമാക്കിയ   സന്തോഷത്തിലാണ് ഞങ്ങളിപ്പോൾ...!

രണ്ടുമാസങ്ങൾക്ക്  മുമ്പ് ഞങ്ങളെ അമ്മൂമ്മയും മുത്തശ്ശനുമാക്കി പേരകുട്ടിയായി ഇക്കഴിഞ്ഞ ആഗസ്റ്റ് മാസം  ആദ്യത്തെ   തിങ്കളാഴ്ച്ച , ആവണി അവിട്ടത്തിന്, കുടുംബത്തിലെ അനന്തരാവകാശിയായി പിറന്നുവീണ സാന്മയി(Sanmayi)ക്ക് സ്നേഹാശംസകൾ നേരുകയാണ് ഈ അവസരത്തിൽ ...


കുഞ്ഞുവായിൽ കരച്ചിലുമായി ഒരു ചോര കുഞ്ഞ് 
മോളുടേയും മരുമോന്റെയും ജീവിതത്തിലേക്ക് അന്ന് കടന്നുവന്നപ്പോൾ ആയതൊരു സന്തോഷത്തിന്റേയും, നിർവൃതിയുടേയും നിമിഷങ്ങൾ തന്നെയായിരുന്നു...!

ഇനി  താണ്ടാനുള്ള വാനപ്രസ്ഥവും, സന്യാസവും പൂർത്തീകരിക്കുവാൻ സാധിക്കുമൊ എന്നൊന്നും നിശ്ചയുമില്ലാത്ത ഒരു അവസ്ഥാവിശേഷം കൂടിയാണ്  ഇപ്പോൾ  കോവിഡ് എന്ന മഹാമാരിയായി താണ്ഡവമാടുന്ന ഈ പരമാണു സൃഷ്ടിച്ചിരിക്കുന്ന പ്രതിഭാസം ...!

ബ്രിട്ടണിൽ വീണ്ടും കൊറോണയുടെ രണ്ടാം തരംഗം അലയടിച്ചുകൊണ്ടിരിക്കുന്ന സ്ഥിതിവിശേഷത്തിൽ കൂടിയാണ് ഞങ്ങൾക്ക് ചുറ്റും ഇപ്പോൾ കാണപ്പെടുന്ന വസ്‌തുതകൾ ...
സ്വന്തം വീടും നാടുമൊക്കെ  വിട്ട് എത്ര ഉന്നതമായതൊ , അല്ലാത്തതൊ ആയ പ്രവാസ ജീവിതം അനുഷ്ഠിക്കുമ്പോഴും അവരവരുടേതായ പല ഗൃഹാതുരത്വ സ്മരണകളാൽ സമ്പുഷ്ടമായാണ് ഓരോ പ്രവാസികളും ജീവിതം മുന്നോട്ട് കൊണ്ടുപോകാറുള്ളത് ...!

കഴിഞ്ഞ മാസം ഉത്രാട പാച്ചിലിനിടയിൽ ഈ കൊ'റോണ'ക്കാലത്ത് ഞങ്ങൾ സകുടുംബം മാത്രം പങ്കെടുത്ത ചടങ്ങായിരുന്നു ആദ്യത്തെ പേരക്കുട്ടിയായ 'സാന്മയി'യുടെ ഇരുപത്തെട്ടിലെ ചരടുകെട്ടും , പേരിടൽ കർമ്മവും ... !

നവാതിഥിയായി  ഞങ്ങളുടെ കുടുംബത്തിൽ ഇടം പിടിച്ച പേരക്ടാവും ,കെങ്കേമമായി വിഭവ സമൃദ്ധമായ സദ്യ വെച്ചുവിളമ്പിയ അവളുടെ അമ്മൂമ്മയും തന്നെയായിരുന്നു അന്നത്തെ ചടങ്ങിലെ  താരങ്ങൾ...  

ജീവിതത്തിൽ കിട്ടുന്ന അമൂല്യമായ സന്തോഷങ്ങളിൽ നിന്നും മാഞ്ഞുപോകാത്ത സ്‌മരണകളായി  അങ്ങനെ ഒരു ആമോദത്തിൻ ദിനം കൂടിയായിരുന്നു ആ പേരകുട്ടിയുടെ ഇരുപത്തെട്ട് കെട്ടും പേരിടൽ ചടങ്ങും .  

ഇപ്പോൾ പാൽ പുഞ്ചിരിയുമായി കൈകാലുകൾ ഇളക്കിയുള്ള ആ പൊന്നോമനയുടെ കളിവിളയാട്ടങ്ങൾ കാണുമ്പോൾ ഞങ്ങളുടെ കുടുംബത്തിൽ ഏവർക്കും അനുഭവപ്പെടുന്ന  ആമോദങ്ങൾ തീർത്തും പറഞ്ഞറിയുക്കുവാൻ സാധിക്കാത്ത ഒരു പ്രത്യേക ആനന്ദങ്ങൾ തന്നെയാണ്...!
ഏതാണ്ട് രണ്ട് പതിറ്റാണ്ടുകൾക്ക് മുമ്പ് മോളും ,
പിന്നീട് മോനും ജനിച്ചു വീണ ശേഷം ഞങ്ങൾക്ക് കിട്ടിയ 
ആ കൊച്ചുകൊച്ചു സന്തോഷങ്ങൾ ഇപ്പോൾ , ആ മോളും മരുമകനും കൂടി പങ്കിടുന്നത്  കണ്ടിരിക്കുമ്പോൾ തന്നെ ഒരു സുഖമുള്ള നിർവൃതിയാണ് ഉണ്ടാകുന്നത് ... 
നമ്മുടെ മക്കൾ ആദ്യമായി പുഞ്ചിരിക്കുന്നത് ,  
കമഴ്ന്നു കിടക്കുന്നത് ,മുട്ടുകുത്തി നടക്കുന്നത്  , ഇരിക്കുന്നത്,  കിന്നരി പല്ലുകൾ മുളച്ചുവരുന്നത് , പിച്ചവെച്ച് നടക്കുന്നത് എന്നിങ്ങനെ എത്രയെത്ര സന്തോഷത്തിന്റെ മുഹൂർത്തങ്ങളാണ് ഓരൊ ദമ്പതികളുടെ  ജീവിതത്തിലും ഇതുപോലെ 'സൈക്കിളിക്കാ'യി അരങ്ങേറിക്കൊണ്ടിരിക്കുക ..അല്ലെ ..? 

ഞങ്ങളുടെ കഴിഞ്ഞകാല  ജീവിതത്തിൽ 
മക്കളായ കടിഞ്ഞൂൽ പുത്രിയും പിന്നീടുണ്ടായ അവളുടെ കുഞ്ഞനിയനും കൂടി അങ്ങിനെയങ്ങനെ  സുന്ദരമായ എത്ര നിമിഷങ്ങളാണ് അവർ  ഞങ്ങൾക്ക് സമ്മാനിച്ചിട്ടുള്ളത് ...!

കൊച്ചായിരിക്കുമ്പോളവരെ താരാട്ടുപാടിയും 
നെഞ്ചിൽ കിടത്തിയും ഉറക്കുവാനും  കൊഞ്ചിക്കുവാനും കൊതിക്കുന്ന  മാതാപിതാക്കളുടേയും അമ്മൂമ്മമാരുടേയും  മുത്തശ്ശന്മാരുടേയുമൊക്കെ ഇടയിലേക്കാണ് ലോകത്തിലെ ഭൂരിഭാഗം പിഞ്ചോമനകളും എന്നുമെന്നോണം പിറന്നു വീണുകൊണ്ടിരിക്കുന്നത് ...

കുഞ്ഞായിരിക്കുമ്പോൾ അവർ നിറുത്താതെ കരഞ്ഞുകൊണ്ടിരിക്കുമ്പോൾ , കുട്ടികൾ  അടിതെറ്റി 
വീഴുമ്പോൾ ,അവർക്കൊക്കെ കൊച്ചപകടങ്ങൾ പറ്റുമ്പോൾ എന്നിങ്ങനെ മക്കൾക്കൊക്കെ വല്ല അസുഖങ്ങളൊക്കെ
വരുമ്പോഴായിരിക്കും നമ്മൾ ദു:ഖങ്ങൾ ശരിക്കും ഉള്ളിൽ തട്ടിയറിയുക.

അതെ ഓരൊ കുട്ടികളുടേയും  വളർച്ചയുടെ ഓരൊ കാല ഘട്ടങ്ങളിലും,
ജീവിതത്തിന്റെ പല പല സന്തോഷങ്ങളും  ദു:ഖങ്ങളും നമ്മളെല്ലാം നേരിട്ട് തൊട്ടറിയുക തന്നെയാണല്ലൊ എന്നുള്ള ഒരു യാഥാർത്ഥ്യവും ഏവരുടെയും ജീവിത പന്ഥാവിൽ അനുഭവിക്കേണ്ട വസ്തുതകൾ തന്നെയാണ്...

ഈ താരാട്ടിനും കൊഞ്ചിക്കലിനും ,വളർത്തി വലുതാക്കുന്നതിനുമൊക്കെ ഉപകാരമായി , അവർ വളർന്ന 
ശേഷം മാതാപിതാക്കൾക്കും മറ്റും ബഹുമനോഹരമായ ആട്ടുകളും അവഗണനയും കിട്ടുന്ന സ്ഥിതിവിശേഷങ്ങളും നാട്ടുനടപ്പായ ഒരു കാലഘട്ടത്തിൽ കൂടിയാണ് നാം ഇപ്പോൾ പ്രയാണം നടത്തികൊണ്ടിരിക്കുന്നത് . 

ഇത്തരം സംഗതികൾ  ചിലരുടെയെല്ലാം ജീവിതത്തിൽ 
ഒരു വിരോധപസമായി തീരുകയും ചെയ്യാറുണ്ട് എന്നതും വാസ്തവമാണ് .

ചുള്ളാനിറ്റി നഷ്ട്ടപ്പെട്ട ഒരു പുതിയ
അമ്മൂമ്മയും മുത്തശ്ശനും
💔 !
എന്തായാലും ഉടുക്കുവാനും ,പുതക്കുവാനും 
അനേകം രോഗപീഠകളുള്ള അമ്മൂമ്മക്കും മുത്തശ്ശനും കൊറോണക്കാലത്തെ ഒരു സന്തോഷമായി ഒരു പേരക്കുട്ടിയെ സമ്മാനിച്ച മോൾ മയൂഖക്കും, മരുമോൻ സായുജിനും അഭിനന്ദനങ്ങൾ... 

വേണമെങ്കിൽ നാലഞ്ചുകൊല്ലം മുമ്പ് തന്നെ തകർത്തെറിയാമായിരുന്ന ഞങ്ങളുടെ 'ചുള്ളാനിറ്റി' ഇത്രയും നീട്ടി തന്നതിനും കൂടിയാണ് മക്കൾക്കുള്ള ഈ ആശംസകൾ ... 




 





Monday, 31 August 2020

കൊ'റോണ'ക്കാലത്ത് അമ്മയില്ലാതെ ഒരോണം ...! / Koronakkaalaatthu Ammayillathe Oronam ...!

അമ്മയില്ലാത്ത ആദ്യത്തെ ഓണമാണ് ഈ കൊ'റോണ'ക്കാലത്ത് വളരെ ദു:ഖകരമായി ഞങ്ങൾക്കിടയിലേക്ക് ഇത്തവണ കയറി വന്നിരിക്കുന്നത് ...
അമ്മയുടെ ഓണത്തിന്
മാധുര്യം ഏറെയായിരുന്നു...!
അര നൂറ്റാണ്ടിലേറെയായി വീട്ടമ്മയായും തറവാട്ടമ്മയായും ഒരുമയുടെയും ഒത്തു ചേരലിന്റെയും പൊന്നോണ നാളുകൾ കൊണ്ടാടിയിരുന്ന അമ്മക്ക് എട്ട് പതിറ്റാണ്ടിൽ മേലെയുള്ള ഓണം ഓർമ്മകൾ ഉണ്ടായിരുന്നു...
സന്തോഷവും, ദു:ഖവും, സങ്കടവുമൊക്കെ ഇഴപിരിഞ്ഞുള്ള എത്രയെത്ര ഓണക്കഥകളാണ് അമ്മ ഞങ്ങളെയൊക്കെ ചൊല്ലി കേൾപ്പിച്ചിട്ടുള്ളത്...
അതെ
ഓണത്തിനെന്നും അമ്മയുടെ മുഖവും, രുചിയുമാണ് എപ്പോഴും അനുഭവപ്പെടാറുള്ളത് ...
ഓരൊ വീടുകളിലും ഓണം വിപുലമാകുന്നതും ,
നിറപ്പകിട്ടാർന്നതും ആകുന്നത് ആ വീട്ടിലുള്ള പെണ്ണുങ്ങളുടെ പ്രയത്നമാണെന്നു പറഞ്ഞാൽ , ആയത് ഒട്ടും അതിശയോക്തിയില്ലാത്ത സംഗതിയാണ് ...
അതുകൊണ്ട് ഓരൊ
ഓണങ്ങളും പെണ്ണോണങ്ങളാണ്...

അതെ ഏത് വീട്ടിലെ എന്ത്  ആഘോഷങ്ങളും കെങ്കേമമാകണമെങ്കിൽ  പെണ്ണൊരുമ്പെട്ടാൽ മാത്രമെ പൂർണ്ണമാകൂ ...!

മേടമാസത്തിലെ കൊയ്‌ത്തുകഴിഞ്ഞാൽ മുതൽ അമ്മയെന്നും ഓണത്തിനുള്ള ഒരുക്കൂട്ടലുകൾ നടത്തി തുടങ്ങും .അതിന് മുന്നെ തന്നെ  ഞാറ്റുകണ്ടകളിൽ മുതിരയും, എള്ളും , കൂർക്കയും മറ്റുമൊക്കെ നട്ടുകഴിഞ്ഞിരിക്കും . 


ഒപ്പം തന്നെ അമ്മയും അയൽക്കൂട്ടത്തെ പെണ്ണുങ്ങളെല്ലാം കൂടി അവരവരുടെ പറമ്പുകളിൽ  ഓണക്കാലത്തേക്കുള്ള നാനാതരം വാഴകളും , ചേനയും ,കാച്ചിലും ,ചേമ്പും ,മഞ്ഞളും ,ഇഞ്ചിയുമടക്കം ,പടവലം ,അമര ,പാവയ്ക്ക പന്തലുകളും അതിനടിയിൽ മത്തനും കുമ്പളവും നട്ടുനനച്ച് വളർത്തി തുടങ്ങിയിട്ടുണ്ടാകും ...

ഇതിനിടയിൽ  വിറകുപുര മേഞ്ഞു വിറകുകൊള്ളികൾ അടക്കിവെക്കലും  പാടത്തുനിന്നും കൊയ്തെടുത്ത നെല്ലുണക്കി പുഴുങ്ങിയുണക്കി പത്തായം നിറച്ചിട്ടുണ്ടാകും . 

പിന്നീട് മാമ്പഴക്കാലമായാൽ  ചക്ക വരട്ടലും ,പച്ചമാങ്ങ അരിഞ്ഞു ഉണക്കി വെക്കലും ,കൊണ്ടാട്ടം വറുക്കുവാനുള്ള പാവക്ക ,ചേന ,പയർ ,തൈര് മുളക് എന്നിവയൊക്കെ ഉണക്കിയെടുത്ത വറവ് വിഭവങ്ങളും   ,കടുമാങ്ങ ,ചെത്തുമാങ്ങ,നാരങ്ങ ,നെല്ലിക്ക എന്നീ അച്ചാറുകൾക്കൊപ്പം അടച്ചുറപ്പുള്ള ഭരണകളിൽ ഇടം പിടിച്ചിട്ടുണ്ടാകും. 

അമ്മയുടെ മേൽനോട്ടത്തിൽ ഉണ്ടാക്കുന്ന ഇത്തരം കൃഷി വിഭവങ്ങൾ  വീട്ടിലേക്ക് മാത്രമല്ല, അയലക്കങ്ങളിലേക്കും, പണിക്കാർക്കും മറ്റു ആശ്രിതർക്കും കൂടി വിതരണം  ചെയ്‌ത്‌ കഴിയുമ്പോൾ മാത്രമെ അമ്മക്ക് പൂർണ്ണസംതൃപ്തി വരികയുള്ളൂ ... 


ഇത്തരത്തിലുള്ള  പുഴുങ്ങലരിയും  തൊടിയിലെ പച്ചക്കറിത്തോട്ടങ്ങളിൽ നിന്നും പറിച്ചെടുത്ത വിഭങ്ങളാൽ വെച്ചുവിളമ്പുന്ന സമൃദ്ധമായ ഓണ സദ്യകൾക്ക് അമ്മൂമ്മയുടെയും അച്ഛമ്മയുടെയും അമ്മയുടെയും  വലിയമ്മമാരുടെയും ഇളയമ്മമാരുടെയും അമ്മായിമാരുടെയുമൊക്കെ ആ കൈ പുണ്യം പെൺമക്കൾക്കും പുത്രവധുക്കൾക്കുമൊക്കെ ഒട്ടും രുചിഭേദങ്ങളില്ലാതെ പകർന്നുകിട്ടിയതിനാലാവാം വീട്ടിലുണ്ടാക്കുന്ന ഓരൊ ആഘോഷ പരിപാടികൾക്കും ഒരുക്കുന്ന സദ്യകൾക്കുമൊക്കെ അന്നും ഇന്നും അതെ സ്വാദും രുചിയും ചിട്ടവട്ടങ്ങളുമൊക്കെ  തുടിച്ചുനിൽക്കുന്നത്  ... 


ഇടവപ്പാതി മുതൽ കണിമംഗലത്തുള്ള  ഒട്ടുമിക്ക വീടുകളിലും വീട്ടമ്മമാരുടെ അടുക്കളത്തോട്ടങ്ങൾ മുഴുവൻ ശരിക്കും ഒരു ഹരിത വൃന്ദാവനമായി മാറുന്ന കാഴ്ച്ചകൾ കണ്ടാണ് ഞങ്ങൾ  ബാല്യം  മുതൽ കൗമാരകാലം വരെ വളർന്നു വന്നത്...

അന്നൊക്കെ  ആടുമാടുകളും, തൊഴുത്തും ,ആട്ടിൻ കൂടും ,കോഴിയും, കോഴിക്കൂടും താറാവുമൊക്കെ മേഞ്ഞുനടക്കുന്ന കൊച്ചുകൊച്ചു പുരയിടങ്ങളുമുള്ള നാടായിരുന്നു ഞങ്ങളുടെ ഗ്രാമം ...

മൂന്ന് ദശാബ്‌ദം മുമ്പ് തൃശ്ശൂർ കോർപ്പറേഷന്റെ ഭാഗമായി, പട്ടണത്തിന്റെ കുപ്പായം അണിഞ്ഞതോടുകൂടി ഇത്തരം കഴ്ചവട്ടങ്ങളൊക്കെ മെല്ലെമെല്ലെ അവിടെനിന്നും ഇല്ലാതായി തുടങ്ങി ... 

പക്ഷെ നാലഞ്ചുകൊല്ലമായി കണിമംഗലത്തും പരിസര പ്രദേശങ്ങളിലും വീണ്ടും മുറ്റത്തും ,ടെറസ്സിലുമൊക്കെയായി ധാരാളം അടുക്കള തോട്ടങ്ങളും ,വളർത്തുമൃഗപരിപാലനവുമൊക്കെ കുറേശ്ശെയായി തിരിച്ചുവന്നുകൊണ്ടിരിക്കുന്നത് കാണുമ്പോൾ വളരെയധികം സന്തോഷം തോന്നുന്നുണ്ട് ...

ഇങ്ങനെ വീണ്ടും സ്വയം പര്യാപ്തത കൈവരിച്ചു നമ്മുടെ നാട്ടിലെ ഓരൊ ദേശങ്ങളും മലയാള നാടിന്റെ അഭിമാനങ്ങളായി വളർന്നുവരുന്നത് തന്നെയാണ് രാജ്യത്തിന്റെ ഏറ്റവും വലിയ ഐശ്വര്യം ...!

  


Wednesday, 5 August 2020

Bilatthipattanam / ബിലാത്തിപട്ടണം : കോവിഡാനന്തരം മാറുന്ന ചട്ടങ്ങളും ,പുതിയ ജീവിത ക്രമങ...

Bilatthipattanam / ബിലാത്തിപട്ടണം : കോവിഡാനന്തരം മാറുന്ന ചട്ടങ്ങളും ,പുതിയ ജീവിത ക്രമങ...: ഇപ്പോൾ  കോവിഡാനന്തര  ലോകത്തെ പറ്റിയുള്ള അനേകം  പഠനങ്ങൾ    ആഗോളതലത്തിൽ നടന്നു കൊണ്ടിരിക്കുകയാണ് .     ഇതുവരെ  ശീലിക്കാത്ത ഓരൊ അനുഭവങ്ങളും ,അത...

Monday, 20 July 2020

കോവിഡാനന്തരം മാറുന്ന ചട്ടങ്ങളും ,പുതിയ ജീവിത ക്രമങ്ങളും ... / Kovidanantharam Marunna Chattangalum , Puthiya Jeevitha Kramangalum ...

ഇപ്പോൾ  കോവിഡാനന്തര 
ലോകത്തെ പറ്റിയുള്ള അനേകം പഠനങ്ങൾ   ആഗോളതലത്തിൽ നടന്നു കൊണ്ടിരിക്കുകയാണ് .    
ഇതുവരെ  ശീലിക്കാത്ത ഓരൊ അനുഭവങ്ങളും ,അതിൽ നിന്നും ഉരുത്തിരിഞ്ഞു വന്ന  പുതിയ പാഠങ്ങളായി പുതുപുത്തൻ ശീലങ്ങളായി മാറിക്കൊണ്ടിരിക്കുന്ന ജീവിത രീതികളായി തീർന്നിരിക്കുന്ന ഒരു കാലഘട്ടത്തിലൂടെയാണ് ലോകം മുഴുവൻ ഇപ്പോൾ ചലിച്ചുകൊണ്ടിരിക്കുന്നത് .
ഇത്രകാലമായിട്ടും  മറുമരുന്നു പോലും കണ്ടുപിടിക്കുവാൻ സാധിക്കാത്ത വല്ലാത്ത വ്യാപനവ്യാപ്‌തിയുള്ള കാണാമറയത്തുള്ള കൊറോണ വൈറസുകൾ പരത്തി കൊണ്ടിരിക്കുന്ന 'കോവിഡ് - 19'  എന്ന മഹാമാരി ക്ക്  മുന്നിൽ പകച്ചു നിന്ന ഭരണകൂടങ്ങളും ലോക ജനതയും ഈ  വൈറസുമായി പൊരുത്തപ്പെട്ട് ജീവിക്കുവാനുള്ള നടപടികളുമായി മുന്നിട്ടിറങ്ങിയിരിക്കുകയാണ് ഇപ്പോൾ ...
ഏതാണ്ട് ആഗോള തലത്തിലുള്ള  ഒട്ടുമിക്ക രാജ്യങ്ങളിലും അടച്ചുപൂട്ടൽ വേളയിൽ ഗതാഗത വിനോദ സഞ്ചാര കാർഷിക വ്യവസായ വിദ്യാഭ്യാസ  മേഖലകൾ  ശരിക്കും നിശ്ചലാവസ്ഥയിലായപ്പോൾ ഏറ്റവും കോട്ടങ്ങൾ സംഭവിച്ചത്  അതാതിന്റെ തൊഴിലിടങ്ങൾക്കാണ് . 
പല രാജ്യങ്ങൾക്കും ഇതിൽ നിന്നുമൊക്കെയുള്ള സാമ്പത്തിക 
ബാധ്യതകളിൽ നിന്നും കരകയറുവാൻ കുറെ മാസങ്ങൾ വേണ്ടി വരുമെന്നാണ് പറയുന്നത് .

അനേകം തൊഴിൽ നഷ്ട്ടങ്ങൾ അടക്കം പല മേഖലകളും നഷ്ടത്തിൽ നിന്നും രക്ഷപ്പെടുവാൻ സാധിക്കാതെ വലയും .
ഇത്തരം പല കാരണങ്ങളാലും  വീണ്ടും ലോക വ്യാപകമായ നീണ്ടുനിൽക്കുന്ന ഒരു സാമ്പത്തിക മാന്ദ്യം  അനുഭവപ്പെടുമെന്നാണ് ഈ പഠനങ്ങൾ ഇപ്പോൾ വ്യക്തമാക്കുന്ന ഒരു സംഗതി . 
അതുകൊണ്ട് ആഗോള പരമായി പല ജനതയുടെയും നിത്യ ജീവിതങ്ങൾ  കുറെയേറെ  ക്ലേശകരമായി തന്നെ മുന്നോട്ട് പോകുമെന്നും പറയുന്നു .
'കോവിഡ്- 19' ന് മുമ്പും ഭൂമിയിൽ അനേകം മഹാമാരികളും ,  വംശീയവും വർഗ്ഗീയവുമായ ലഹളകളും ,ലോക മഹായുദ്ധങ്ങളടക്കം മറ്റനേകം ദുരന്തങ്ങളും വന്നുപോയിട്ടുണ്ടെങ്കിലും ആയതെല്ലാം ഒരു നിശ്ചിത പ്രദേശങ്ങളിൽ മാത്രം ഒതുങ്ങി നിന്നവയായിരുന്നു .
അതുമൂലം ഉണ്ടായിരുന്ന പട്ടിണിയും , പാലായനവും , സാമ്പത്തിക മാന്ദ്യങ്ങളുമൊക്കെ അതിജീവിച്ച് അതാതു ജനതകൾ എന്നുമെന്നോണം ശാസ്ത്രീയമായും സാങ്കേതികമായും പുരോഗതികൾ കൈവരിച്ച് ജീവിത നിലവാരം മെച്ചപ്പെടുത്തി , ഏറ്റവും ആധുനികമായ ആഡംബര ജീവിതം   നയിച്ചു വരുന്ന കാലഘട്ടത്തിലാണ്  ഇപ്പോൾ ഭൂമിയിലുള്ള ഭൂരിഭാഗം ആളുകളും  ജീവിച്ചു കൊണ്ടിരിക്കുന്നത് . 
പക്ഷെ ഇന്നത്തെ   തലമുറയിലെ മാത്രമല്ല , ലോകത്തിൽ ഇതുവരെ   ജീവിച്ച ഒരു ജനതയും ഇങ്ങനെയുള്ളൊരു ആഗോള പരമായ  'ലോക്-ഡൗൺ' പ്രതിഭാസത്തിൽ കൂടി കടന്നുപോയിട്ടില്ല  എന്നത് ഒരു വാസ്തവമാണ് .
ലോകവ്യാപകമായുണ്ടായ  അടച്ചു പൂട്ടലിൽ അവസ്ഥയിൽ കഴിയുന്ന സമയത്ത് ഓരൊ രാജ്യങ്ങളിലേയും പൊതുജങ്ങങ്ങൾക്ക്  ഏറ്റവും സന്തോഷവും സമാധാനവും വിനോദങ്ങളും നൽകിയത് ഇന്നുള്ള 'സോഷ്യൽ മീഡിയ' തട്ടകകങ്ങളും, സാങ്കേതികതയുടെ മികവിൽ പ്രവർത്തിക്കുന്ന 'ഇന്റർനെറ്റ്' ഇടങ്ങളുമാണ്  . 
'മൊബൈൽ ഫോണുകളും ,ഇന്റർനെറ്റു'മൊന്നും പ്രചുരപ്രചാരമാകാതിരുന്ന ഒരു കാൽ നൂറ്റാണ്ട് മുമ്പാണ് 
ഇത്തരം ഒരു മഹാമാരി വന്ന്  ഇന്നുള്ള 'ലോക്ക് ഡൗൺ' അവസ്ഥ വന്നിരുന്നുവെങ്കിൽ വീട്ടിലിരുന്നുകൊണ്ട് ഇത്രമാത്രം 
കാര്യങ്ങൾ ആർക്കും തന്നെ നടപ്പാക്കുവാൻ സാധിക്കില്ലായിരുന്നു എന്നാണ് പുതിയ പഠനങ്ങൾ വെളിവാക്കുന്ന സംഗതികൾ. 
ഇപ്പോൾ വന്ന 'കോവിഡ് -19'  നെ പോലുള്ള ഒരു മഹാമാരി ഒരു കാൽ നൂറ്റാണ്ടിന്  മുമ്പാണ്   വന്നിരുന്നുവെങ്കിൽ  വീട്ടിലിരുന്ന് ആളുകൾ വിഷാദ രോഗം  മുതൽ പല മാനസിക പിരിമുറുക്കങ്ങളും, കുടുംബ കലഹങ്ങളുമൊക്കെയായി ധാരാളം പ്രശ്‌നങ്ങൾ ഉടലെടുത്തേനെ   എന്നാണ് പറയുന്നത് .
എങ്കിലും ലോകത്തിൽ അങ്ങോളമിങ്ങോളമായി കൊറോണമൂലം കോട്ടമുണ്ടായത് തൊഴിൽ മേഖലകൾക്കാണ് .
അതിഥി തൊഴിലാളികളായി പല ദേശങ്ങളിലും എത്തിപ്പെട്ടപ്പെട്ടവർക്കാണ് ഇതിന്റെയെല്ലാം ദുരിതങ്ങൾ അനുഭവിക്കേണ്ടിവന്നത് . തൊഴിലില്ലായ്‌മയും പട്ടിണിയും മൂലം പല തൊഴിലാളികൾക്കും കുടുംബങ്ങൾക്കും അടച്ചുപൂട്ടൽ കാലത്തെ വളരെ പരിമിതമായ യാത്ര വിലക്കുകൾ ജന്മനാട്ടിലേക്കുള്ള തിരിച്ചുപോക്കുകളിൽ അനേകം ദുരന്തങ്ങൾ ഉണ്ടായി .
പക്ഷെ ആഗോളപരമായി മനുഷ്യജീവിതം പലദേശങ്ങളിലും ദുരിതപൂർണ്ണമായ ഇത്തരം സന്ദർഭങ്ങളിൽ  ലോകമെങ്ങും  ധാരാളം സേവനസന്നദ്ധപ്രവർത്തങ്ങൾക്ക് മുന്നിട്ടിറങ്ങി പല ജനതകളും ഏവർക്കും മാതൃകയായി തീർന്നതും വളരെ ശ്ലാഘനീയമായ സംഗതികൾ തന്നെയാണ് .
 
  
ഈ കൊറോണക്കാലം  ഒരുപാട് പേരെ വല്ലാതെ തളർത്തി കഴിഞ്ഞെങ്കിലും , അതിന്റെ പത്തിരട്ടി ആളുകൾക്ക് ഗുണങ്ങളും ഉണ്ടാക്കിയിട്ടുണ്ടെന്നാണ് ഈ പുതിയ പഠനങ്ങൾ വെളിവാക്കുന്ന വേറെ ചില വസ്‌തുതകൾ .
വീടിനുള്ളിലൊ , ഒരു റൂമിനുള്ളിലൊ  ഒതുങ്ങി കൂടിയപ്പോൾ മനുഷ്യസഹജമായ പല  സർഗവാസനകളും അവർക്ക് പുറത്തെടുക്കുവാനും , ആയതെല്ലാം പരിപോക്ഷിക്കുവാനും 
സാധിച്ചു എന്ന ഒരു മേന്മയും ഈ കൊറോണക്കാലത്ത് ഉണ്ടായിട്ടുണ്ട് . 
അടച്ചുപൂട്ടലിൽ അകപ്പെട്ടപ്പോൾ  പലരും താമസ സ്ഥലത്തിരുന്നുകൊണ്ട്   അവരവരുടെ നൈപുണ്യത്തിലുള്ള 
ചില രംഗങ്ങളിക്ക് ശ്രദ്ധ തിരിക്കുകയും ആയതിൽ നിന്നും 'ക്രിയേറ്റിവായും പ്രോഡക്റ്ററ്റീവാ'യും ധാരാളം ഉൽപ്പന്നങ്ങൾ 
ഉത്പാദിപ്പിച്ചുകൊണ്ടിരുന്നു  . 
അതിൽ  ധാരാളം തരത്തിലുള്ള കലാപ്രവർത്തനങ്ങളടക്കം , വളർത്തുമൃഗ പരിപാലനവും , മുറ്റത്തുള്ള കൃഷിയും , 
പാചക  പരീക്ഷണകളും,  'ഹാൻഡിക്രാഫ്റ്റ്' ഉൽപ്പന്നങ്ങളുമൊക്കെയായി ധാരാളം വിഭവങ്ങൾ പുറത്തിറങ്ങി.
ഇതെല്ലാം 'ഓൺ-ലൈൻ' വിപണങ്ങൾ വഴി സമൂഹത്തിലേക്ക് ആകർഷിക്കപ്പെട്ടു . 
സിനിമാ ശാലകളിലെ റിലീസിന് പകരം  ടി.വി ചാനലുകളിൽ റിലീസാവുന്ന പുതിയ സിനിമകളും , കാണികളില്ലാതെ കളിക്കളങ്ങളിൽ അരങ്ങേറുന്ന ഫുട്‍ബോൾ, ക്രിക്കറ്റ് മുതലായ മത്സര കളികളൊക്കെ തത്സമയം വീട്ടിലിരുന്ന് കാണാവുന്ന സ്ഥിതി വിശേഷങ്ങൾ വരെ സംജാതമായി .
ഒട്ടുമിക്ക രാജ്യങ്ങളിലും 'ഓൺ-ലൈൻ' മുഖാന്തിരം ,വിദ്യാഭ്യാസവും ഓഫീസിനുള്ളിലെ തൊഴിലിടങ്ങളും താമസസ്ഥലത്തേക്കും, മറ്റും തൽക്കാലം മാറ്റപ്പെട്ടു .
ഒപ്പം നിത്യോപയോഗ സാധനങ്ങളും , ധാരാളം  വാണിജ്യ വസ്തുക്കളുടെ കച്ചവടങ്ങളും 'ഇന്റർനെറ്റ് ' 
മുഖാന്തിരവും പ്രാപ്‌തമാക്കാവുന്ന സംഗതികൾ ഇതെല്ലാം നടക്കാതിരുന്ന പ്രദേശങ്ങളിലും നിലവിൽ വന്നു . 
ഇങ്ങനെയുള്ള പുതിയ ശീലങ്ങളിലേക്ക് കുറെയേറെ ജനങ്ങൾ ആകർഷിക്കപ്പെട്ടതിനാൽ - കൊറോണാനന്തരം  
ആഗോള പരമായി തന്നെ കലാ കായിക രംഗങ്ങളിലും തൊഴിലിടങ്ങളിലും കച്ചവട രംഗത്തും വിദ്യാഭ്യാസ രംഗത്തുമൊക്കെ ഒരു പുതിയ വഴിത്തിരിവുകൾ ഉണ്ടാകാൻ സാധ്യതയുണ്ടെന്നുമാണ് ഇത്തരം പുതിയ പഠനങ്ങൾ വെളിവാക്കുന്ന സംഗതികൾ  .

അതെ കോവിഡാനന്തരം ഇതുവരെ 
ശീലിച്ച പല ചിട്ടവട്ടങ്ങളും പുതിയ ചട്ടങ്ങളായി മാറ്റപ്പെടുവാൻ പോകുകയാണ് ...!
എല്ലാം കാത്തിരുന്ന് തന്നെ കാണാം...


PS 
ഈ ആർട്ടിക്കിൾ  കഴിഞ്ഞ ദിവസം 
പ്രസിദ്ധീകരിച്ചിരുന്നു .
നന്ദി ബ്രൈറ്റേഷ കൈരളി ടീം ..






Saturday, 6 June 2020

Bilatthipattanam / ബിലാത്തിപട്ടണം : 'ഓൺ - ലൈൻ' വിദ്യാഭ്യാസം - മാറുന്ന ചട്ടങ്ങൾ പുതിയ പ...

Bilatthipattanam / ബിലാത്തിപട്ടണം : 'ഓൺ - ലൈൻ' വിദ്യാഭ്യാസം - മാറുന്ന ചട്ടങ്ങൾ പുതിയ പ...: ഇതുവരെ  ശീലിക്കാത്ത ഓരൊ അനുഭവങ്ങളും നമുക്ക് പുതിയ പാഠങ്ങളായി പുതുപുത്തൻ ശീലങ്ങളായി മാറിക്കൊണ്ടിരിക്കുന്ന ജീവിത രീതികളായി തീർന്നിരിക്കുന്ന   ...

Friday, 5 June 2020

'ഓൺ - ലൈൻ' വിദ്യാഭ്യാസം - മാറുന്ന ചട്ടങ്ങൾ പുതിയ പാഠങ്ങൾ...! / 'On-Line' Vidyabhyaasam - Marunna Chattangal Puthiya Patangal ...!


ഇതുവരെ  ശീലിക്കാത്ത ഓരൊ അനുഭവങ്ങളും നമുക്ക് പുതിയ പാഠങ്ങളായി പുതുപുത്തൻ ശീലങ്ങളായി മാറിക്കൊണ്ടിരിക്കുന്ന ജീവിത രീതികളായി തീർന്നിരിക്കുന്ന   ഒരു കാലഘട്ടത്തിലൂടെയാണ് ലോകം മുഴുവൻ ഇപ്പോൾ ചലിച്ചു കൊണ്ടിരിക്കുന്നത് .

കോവിഡ് -19 ന് മുമ്പും ഭൂമിയിൽ അനേകം മഹാമാരികളും ,  വംശീയവും വർഗ്ഗീയവുമായ ലഹളകളും , ലോകമഹായുദ്ധങ്ങളടക്കം മറ്റനേകം ദുരന്തങ്ങളും വന്നുപോയിട്ടുണ്ടെങ്കിലും ആയതെല്ലാം ഒരു നിശ്ചിത പ്രദേശങ്ങളിൽ മാത്രം ഒതുങ്ങി നിന്നവയായിരുന്നു . 

അതുമൂലം ഉണ്ടായിരുന്ന പട്ടിണിയും  , പാലായനവും , സാമ്പത്തിക മാന്ദ്യങ്ങളുമൊക്കെ അതിജീവിച്ച് അതാതു ജനതകൾ എന്നുമെന്നോണം ശാസ്ത്രീയമായും സാങ്കേതികമായും പുരോഗതികൾ കൈവരിച്ച് എന്നുമെന്നോണം  ജീവിത നിലവാരം മെച്ചപ്പെടുത്തി വന്നിരുന്നു .  
അവരവർ കാര്യങ്ങൾ മാത്രം ശ്രദ്ധിച്ച് , പ്രകൃതിയെ ഒട്ടും മാനിക്കാതെ ‌ ഏറ്റവും ആധുനികമായ ആഡംബര ജീവിതം  നയിച്ചുവരുന്ന  മാനവ സമൂഹത്തിനിടയിലേക്കാണ് അവിചാരിതമായി ഇപ്പോൾ ഒരു  മഹാമാരിയായി കൊറോണ വൈറസുകൾ കയറി വന്നത് .
കരയിലും , കടലിലും ,ആകാശത്തുമുള്ള ഒട്ടുമിക്ക ഗതാഗത സംവിധാനങ്ങളും പലപല രാജ്യങ്ങളിലും തൽക്കാലത്തേക്ക് നിറുത്തി വെച്ചു.


കോവിഡ് പടർന്ന രാജ്യങ്ങളിൽ സ്ഥിരമായി ചലിച്ചുകൊണ്ടിരുന്ന മനുഷ്യസമൂഹം മുഴുവൻ ഏറ്റവും അത്യാവശ്യ കാര്യങ്ങൾക്കല്ലാതെ പുറത്തിറങ്ങുവാൻ പറ്റാത്ത  അവസ്ഥയിലായി മാറി . . 
ഇന്നത്തെ   തലമുറയിലെ മാത്രമല്ല , ലോകത്തിൽ ഇതുവരെ   ജീവിച്ച ഒരു ജനതയും  ഇങ്ങനെയുള്ളൊരു ആഗോളപരമായ  അടച്ചുപൂട്ടൽ പ്രതിഭാസത്തിൽ കൂടി കടന്നുപോയിട്ടില്ല  എന്നത് ഒരു വാസ്തവമാണ് 

ഈ കൊറോണക്കാലം വരെ ഓരോരുത്തരും പരിപാലിച്ചിരിക്കുന്ന പല ചിട്ടവട്ടങ്ങൾക്കും  മാറ്റങ്ങൾ  സംഭവിച്ചുകൊണ്ടിരിക്കുകയാണ് .

അതെ ഇപ്പോൾ നമ്മുടെ നാട്ടിലും വിദ്യാഭ്യാസ രംഗം മുതൽ പല സംഗതികൾക്കും ഇത്തരം വിപ്ലവകരമായ ഒരു മാറ്റങ്ങൾക്ക് തുടക്കം കുറിച്ചിരിക്കുകയാണ് 
ഒരു പക്ഷെ വല്ലാത്ത വ്യാപന വ്യാപ്‌തിയുള്ള കാണാമറയത്തുള്ള കൊറോണ വൈറസുകൾ പരത്തുന്ന ഈ മഹാമാരി   വന്നില്ലായിരുന്നുവെങ്കിൽ നമ്മുടെ നാട്ടിൽ ഇപ്പോഴും 'ഓൺ - ലൈൻ' പഠനവും  , 'വീഡിയോ ക്‌ളാസു'കളുമൊന്നും ഇത്ര വേഗം  പ്രാബല്യത്തിൽ വരികയില്ലായിരുന്നു .

ഏതാണ്ട് ഒന്നൊര പതിറ്റാണ്ട് മുമ്പ് തന്നെ നാം മലയാളികൾ സൈബർ ലോകത്തേക്ക് മുന്നിട്ടിറങ്ങി വന്നെങ്കിലും ഏറ്റവും അടിസ്ഥാനപരമായ പല കാര്യങ്ങളിലും സൈബർ ഇടപെടലുകൾ നടത്തുവാൻ വിമുഖത പ്രകടിപ്പിക്കുന്ന കൂട്ടത്തിലായിരുന്നു നാം ഭൂരിഭാഗം കേരളീയരും .


ഏറ്റവും കൂടുതൽ പേരും ആധുനികമായ വിവര വിജ്ഞാന  സാങ്കേതിക വിദ്യാ തട്ടകങ്ങളെയും മറ്റും വെറും വിനോദോപാധി സൈറ്റുകൾ മാത്രമായി നോക്കി കണ്ടത് കൊണ്ടാണ് നമ്മൾ പല ഇന്റർനെറ്റ് മുഖാന്തിരം പ്രവർത്തിക്കുന്ന മിക്ക ഘടകങ്ങളിലും , മറ്റു പാശ്ചാത്യ രാജ്യങ്ങളെപോലെയൊന്നും മുന്നിട്ട് നിൽക്കാതെ പല മേഖലകളിലും പിന്നിലേക്ക് പോയത് .

ഒരു പതിറ്റാണ്ട് മുമ്പുണ്ടായിരുന്ന  മലയാളം ബ്ലോഗുകളുടെ സുവർണ്ണ കാലഘട്ടത്തിൽ പോലും കേരളത്തിലെ ഒരു  വിദ്യാഭ്യാസ സ്ഥാപനങ്ങൾക്കും  അവിടങ്ങളിലുള്ള അദ്ധ്യാപകർക്കുമൊന്നും  യാതൊരുവിധ വിദ്യാഭ്യാസപരമായ ബ്ലോഗുകളും , ഓൺ-ലൈൻ സൈറ്റുകളും ഇല്ലാത്ത ഒരു കാലമായിരുന്നു .

അതേസമയം അന്നിവിടെ  ലണ്ടനിൽ ഓരൊ വിദ്യാർത്ഥികൾക്കും   
പ്രൈമറി ക്ലാസ്സ്‌ മുതൽ  അവരുടെ ടീച്ചേഴ്സിന്റേയും ,  സ്‌കൂളിന്റെയും ബ്ലോഗുകളിലൊ ,വെബ് സൈറ്റുകളിലൊ പോയുള്ള പഠനം സാധ്യമായിരുന്നു . 
വീട്ടിലിരുന്ന് പോലും ലോഗിൻ ചെയ്‌ത്‌ അവരുടെ സ്‌കൂളും, ടീച്ചേഴ്‌സുമായി എന്ത് ഡൗട്ട്കളും മറ്റും തീർപ്പ് കൽപ്പിക്കുവാനും , അനേകം സിനാറിയോകൾ ഉദാഹരണ സഹിതം കാണുവാനും കേൾക്കുവാനുമടക്കം സാധിക്കുന്ന ലിങ്കുകൾ സഹിതമുള്ള പഠനങ്ങൾ .

ഇപ്പോൾ ഇവിടെയുള്ള പുതു തലമുറയിലെ കൊച്ചു പിള്ളേർ വരെ എന്തെങ്കിലും കാര്യങ്ങളിൽ സംശയ നിവാരണം വരുത്തണമെങ്കിൽ പോലും , അപ്പപ്പോൾ ഗൂഗിളിനോടൊ  (wiki/Google_Assistant ) അത്തരം സമാനമായ ലേണിങ് സൈറ്റുകളോടൊ  (siri/apple , alexa.com ) അവരവരുടെ ഡിവൈസുകൾ മുഖേന ചോദിച്ച് മനസ്സിലാക്കിയാണ് അറിവുകൾ നേടുന്നത് .

അതെ , ലോകത്താകമാനം എല്ലാ അറിവുകളും വിവര സാങ്കേതിക വിദ്യയിൽ കൂടി വിരൽത്തുമ്പൊന്നമർത്തിയാൽ   കണ്ടും കേട്ടും  അറിയാവുന്ന വിധത്തിൽ  നമ്മുടെ വിവര വിജ്ഞാന സാങ്കേതിക മേഖല വളർന്നു വലുതായി പന്തലിച്ചു കഴിഞ്ഞു .

ആയതിനെല്ലാം കഴിഞ്ഞത് വിവിധ വിഷയങ്ങളിൽ  പ്രാവീണ്യമുള്ള നിപുണരായ ബ്ലോഗേഴ്‌സും , വ്ലോഗേഴ്സുമൊക്കെ എന്നുമെന്നോണം അവരുടെ അറിവുകൾ 'ഇന്റർനെറ്റ്' ലോകത്തെ സൈബർ ഇടങ്ങളിൽ പങ്കുവെക്കുന്നത് കൊണ്ടാണ് .


ഇനിയുള്ള കാലം സൈബർ ഇടങ്ങളിൽ കൂടിയുള്ള  എഴുത്തുകളും , സ്ക്രോൾ വായനകളും , വീഡിയോകളും മറ്റും   മുഖാന്തിരമുള്ള കണ്ടറിവുകളും കേട്ടറിവുകളുമായിരിക്കും ഏറ്റവും കൂടുതൽ ആളുകൾ  വിനോദത്തിനും,  വിജ്ഞാനത്തിനും വേണ്ടി ഉപയോഗിക്കുക എന്നാണ് പുതിയ പഠനങ്ങൾ വെളിവാക്കുന്ന വസ്‌തുതകൾ . 

ആയതിനാൽ എഴുതാനും പറയാനും കഴിവുള്ളവർ മുഴുവൻ സൈബർ ഇടങ്ങളിൽ കൂടി അവരവരുടെ അറിവുകൾ പങ്കുവെക്കുകയാണെങ്കിൽ , ഇത്തരം അറിവുകളെ കുറിച്ച്  മറ്റാരെങ്കിലും തെരഞ്ഞു നോക്കുമ്പോൾ അവർക്കൊക്കെ ആ അറിവുകൾ സൈബർ ഇടങ്ങളിൽ മനസ്സിലാക്കുവാനും കഴിയും .

ഇത്തരം ടീച്ചിങ് ബ്ലോഗുകളും , വ്ലോഗുകളും , വീഡിയൊ ചാനലുകളും ,ലേണിങ് ആപ്പുകളും തിങ്ങിനിറഞ്ഞ  സൈബർ ഇടങ്ങൾ നമ്മുടെയെല്ലാം കൈയെത്തും ദൂരത്തുള്ള കാലമാണിത് ...!
നോക്കൂ... 
താഴെയുള്ളത് യു.കെയിലുള്ള twinkl.co.uk സൈറ്റിൽ മാത്രം ഫ്രീയായി കാണാനും ഡൌൺ ലോഡ് ചെയ്യുവാനും പറ്റുന്ന ചില ടീച്ചിങ് ബ്ലോഗുകളാണ് . 


ഇതുപോലെ നമ്മുടെ നാട്ടിലെ ഓരൊ വിദ്യഭ്യാസ സ്ഥാപനങ്ങൾക്കും അദ്ധ്യാപകർക്കും അവരുടേതായ ബ്ലോഗുകളൊ, യൂട്യൂബ് ചാനലുകളൊ പഠനത്തിന് വേണ്ടി തുടക്കം കുറിക്കാവുന്നതാണ് .

ഓരൊ വിദ്യാലയങ്ങളും , അവിടെയുള്ള 'പേരന്റ് ടീച്ചേഴ്‌സ് അസോസ്സിയേഷനുകളും (PTA )' , ആ  നാട്ടിലെ സേവനസന്നദ്ധ സംഘടനകളും കൂടി ഇന്റർനെറ്റ് സംവിധാനങ്ങളും ,ആയത് പ്രാപ്‌തമാക്കുവാനുമുള്ള ഉപകരണങ്ങളും സാമ്പത്തികമായി പിന്നിട്ടുനിൽക്കുന്ന വിദ്യാർത്ഥികളിലും സാധ്യമാക്കുന്ന രീതിയിൽ സംഗതികൾ നടപ്പാക്കേണ്ടതാണ് .

വിദ്യാലയങ്ങൾ വീണ്ടും പഴയപടി തുറന്നു പ്രവർത്തിക്കുമ്പോഴും ഓരോ വിദ്യാർത്ഥികൾക്കും അവരുടെ അദ്ധ്യാപകരും വിദ്യാലയങ്ങളുമായി  ഇതുപോലുള്ള ഓൺ-ലൈൻ പഠന സൗകര്യങ്ങൾ തുടർന്നും നടപ്പാക്കുകയാണെങ്കിൽ പല സംശയനിവാരണങ്ങളും അപ്പപ്പോൾ തന്നെ വിശകലനം നടത്തി പഠനം സുഖമമാക്കുവാനുള്ള സംവിധാനങ്ങൾ ഉണ്ടാക്കുവാൻ വളരെ എളുപ്പത്തിൽ സാധിക്കാവുന്നതാണ് .
  
ഏതൊരു പുതിയ തലമുറക്കും വിവേകവും വിജ്ഞാനവും വിളമ്പിക്കൊടുത്ത് അറിവിന്റെ ലോകത്തിലേക്ക് ഇക്കൂട്ടരെ മുന്നോട്ട് നയിക്കുന്നതിൽ മുഖ്യപങ്കുവഹിക്കുന്നത് നേഴ്‌സറി ക്ലാസ്സു മുതൽ ബിരുദ പഠനം  വരെ  അവരെ പഠിപ്പിക്കുന്ന അദ്ധ്യാപകരാണ് .

നമ്മുടെ നാട്ടിൽ പ്രൈമറി ക്‌ളാസുമുതൽ കോളേജ് വിദ്യാഭ്യാസം  വരെയുള്ള പഠന രംഗത്ത് വളരെ കുറച്ച് അദ്ധ്യാപകരെ ഇപ്പോൾ സൈബർ ഇടങ്ങളിൽ കൂടി അവരുടെ വിദ്യാഭ്യാസ ചിന്തകൾ പങ്കുവെക്കുന്നൂള്ളൂ . 

നല്ല ചിന്തകളുമായി പ്രാവീണ്യമുള്ള അനേകം അദ്ധ്യാപകർ ഇനിയും 'ബ്ളോഗു'കളും , 'വ്ലോഗു'കളുമായി പഠന രംഗത്തേക്ക് വരേണ്ട സമയം അതിക്രമിച്ചിരിക്കുകയാണിപ്പോൾ. 

ഇത്തരം നല്ല ടീച്ചർമാരിൽ കൂടിയായിരിക്കണം എന്തിലും ഏതിലും പ്രാപ്‌തരായ ഏറ്റവും പുതിയ സാങ്കേതിക നിലവാരമുള്ള ഒരു നല്ല നവ തലമുറയെ രാജ്യത്തിന്റെ അഭിമാനങ്ങളായി വാർത്തെടുക്കേണ്ടത് .


ഇനി ഇപ്പോൾ മലയാളത്തിലുള്ള  മൂന്നാല് ടീച്ചിങ് ബ്ലോഗുകളെ പരിചയപ്പെടുത്താം 


2009 ൽ തുടക്കം കുറിച്ച തീർത്തും പഠന പദ്ധതികൾക്കായി സമർപ്പിച്ച മലയാളത്തിലെ ആദ്യത്തെ വിദ്യാഭ്യാസ  ബ്ലോഗാണ് ബയോവിഷൻ  (biovisions.in / ബയോവിഷൻ ).
എല്ലാ വിഷയങ്ങളെക്കുറിച്ചുമുള്ള പാഠ്യ പദ്ധതികൾ ഉൾക്കൊള്ളിച്ച ഈ തട്ടകമാണ്  പുതിയ അധ്യായന വർഷം മുതൽ   നമ്മുടെ സംസ്ഥാനത്തെ സ്‌കൂൾ കുട്ടികൾക്ക് സാങ്കേതികമായ സൗകര്യങ്ങൾ പ്രയോജനപ്പെടുത്തി കൊണ്ട് 'KITE VICTERS'  എന്ന ചാനലിലൂടെ 'ഫസ്റ്റ് ബെൽ'  എന്ന പേരിൽ തയ്യാറാക്കിയ 'വീട്ടിലൊരു ക്‌ളാസ് മുറി' എന്ന പാഠ്യപദ്ധതി  'ഓൺ ലൈൻ വീഡിയൊ'കളിലൂടെ കേരള വിദ്യാഭ്യാസ വകുപ്പിന് വേണ്ടി ഇപ്പോൾ നടപ്പാക്കികൊണ്ടിരിക്കുന്നത് .

ഈ ബയോവിഷന്റെ തട്ടകത്തിൽ പോയാൽ എല്ലാ ക്‌ളാസുകളിലെയും ,എല്ലാ ദിവസത്തേയും അദ്ധ്യാപനങ്ങൾ  വീഡിയൊ ക്ലിപ്പുകൾ സഹിതം കാണാവുന്നതാണ് .

ഉദാഹരണമായി ഒന്നാം സ്റ്റാൻഡേർട് കാർക്കുള്ള   ആദ്യ ദിനത്തിലെ 
'ഓൺ -ലൈൻ വീഡിയൊ'യാണ് താഴെയുള്ളത്.


മലയാള ബ്ലോഗുകളിൽ 2009 -ൽ ആദ്യമായി തുടക്കം 
കുറിച്ച ബ്ലോഗാണ്  മാത്ത്സ് ബ്ലോഗ് mathematicsschool.blogspot.com/ എന്ന പ്രഥമ വിദ്യാഭ്യാസ ബ്ലോഗ് തട്ടകം. 

2010 മുതൽ തുടർച്ചയായി മലയാളത്തിൽ  വിദ്യാഭാസ വിശേഷങ്ങൾ പങ്കുവെക്കുന്ന ഒരു ബ്ലോഗാണ് 'ചൂണ്ടുവിരൽ' (learningpointnew.blogspot.com/ചൂണ്ടുവിരൽ ).

ചൂണ്ട് വിരലിന് ശേഷം  വിദ്യാഭ്യാസ രംഗത്തുള്ള പലവിഷയങ്ങളെ കുറിച്ചും പ്രതിപാദിക്കുന്ന 2016 -ൽ  ആരംഭിച്ച പാഠ്യ വിഷയങ്ങളെ കുറിച്ചുള്ള നല്ലൊരു ബ്ലോഗാണ്  'മെന്റെർസ് കേരള ' (mentorskerala.blogspot.com / മെന്റെർസ് കേരള) 

അതുപോലെ തന്നെ ഇക്കൊല്ലം കോവിഡ് കാലത്ത് തുടക്കം കുറിച്ച ഏറ്റവും പുതിയ വിദ്യാഭ്യാസ വാർത്തകൾ വരെ രേഖപ്പെടുത്തുന്ന , കുറെയധികം അധ്യാപകരുടെ  പാഠ്യ പദ്ധതികളും ,
നവീനമായ വീഡിയോ ക്‌ളാസുകളും ഉൾപ്പെടുത്തിയ  'അധ്യാപകക്കൂട്ടം' (https://adhyapakakkoottam.blogspot.com/അധ്യാപകക്കൂട്ടം) എന്ന മലയാളം ടീച്ചിങ് ബ്ലോഗും ഇതിൽ സുപ്രധാനപ്പെട്ട ഒരു തട്ടകമാണ് .

കൂടാതെ ഫ്രീയായി തന്നെ കാണാവുന്ന നേഴ്‌സറി കുട്ടികൾക്ക് വേണ്ടിയുള്ള ക്രിയേറ്റിവ് കിഡ്‌സ്  , കളിക്കാം പഠിക്കാം  എന്നീ യൂട്യൂബ്  ചാനലുകളും,  പിന്നെ സ്പോക്കൺ ഇംഗ്ലീഷ് കലക്കനായി പഠിക്കാവുന്ന രമേഷ് വോയ്‌സ്  , ജാഫേഴ്‌സ്‌  ഇംഗ്ലീഷ്  എന്നീ 
ആയിരകണക്കിന്  ഫോളോവേഴ്‌സുള്ള ലേണിങ് ചാനലുകളും മറ്റനേകം അറിവുകൾ പകരുന്ന ടെക് ചാനലുകളും ഇപ്പോൾ മലയാള സൈബർ ഉലകങ്ങളിൽ ഉണ്ട് .


ഒപ്പം പ്രൈവറ്റായി ലേണിങ് നടത്താവുന്ന  ബൈജൂസ്‌ ആപ്പ് 
മുതലായ കുറച്ച് വമ്പൻ ലേണിങ് ചാനലുകളും നമുക്കുണ്ട് .

എന്തും  എവിടെയിരുന്നും കണ്ടും കേട്ടും പഠിക്കാവുന്ന  പാഠങ്ങൾ ഉൾക്കൊള്ളുന്ന ഇത്തരം അനേകം  വെബ് തട്ടകങ്ങളാണ് ഇപ്പോൾ ഇന്റർനെറ്റ് ഇടങ്ങളിൽ ഉള്ളത് ...! 


ആഗോളതലത്തിലുണ്ടായ ഈ ലോക്ക് ഡൗൺ 
കാലത്തെ കഴിഞ്ഞ മൂന്ന് മാസത്തിനിടയിൽ , ഇന്റർനെറ്റ് ഇടങ്ങളിലെ  അനേകം സോഷ്യൽ മീഡിയ പ്ലാറ്റ് ഫോമുകളിൽ ലോകത്തിലുള്ള വിവിധ ഭാഗങ്ങളിൽ നിന്നും അനേകായിരം പേർ സ്വന്തം പ്രൊഫൈലുകളുമായി രംഗപ്രവേശം നടത്തിയെന്നാണ്  സൈബർ ലോകത്തിലെ ഏറ്റവും പുതിയ കണ്ടെത്തലുകൾ ...

ആയതിനാൽ മലയാളത്തിലെ സൈബർ 
ഇടങ്ങളിലും ഇനി ധാരാളം പുതുമുഖങ്ങളെ കണ്ടെത്താം .

മലയാളം നവമാധ്യമ ലോകത്ത് 
'ബ്ലോഗു'കളുടെയും ,'വ്ലോഗു'കളുടെയും 
ഒരു വസന്തകാലം വീണ്ടും മൊട്ടിട്ടു നിൽക്കുകയാണ് .

അവയെല്ലാം വിടർന്നു വലുതായി അതിമനോഹരമായ 
സൗര്യഭ്യവും സൗന്ദര്യവും പരത്തുന്ന  അറിവിന്റെ വായനയുടെ എഴുത്തിന്റെ ഒരു  പൂക്കാലം ...😍 


വാലറ്റം :-

ഈ കുറിപ്പുകൾ 'ബ്രിട്ടീഷ് കൈരളി'യിൽ പ്രസിദ്ധീകരിച്ചതിന്റെ ലിങ്ക് 
ക്‌ളാസ് റൂമുകൾ ഓൺ -ലൈൻ ആകുമ്പോൾ; മാറുന്ന ചട്ടങ്ങളും പുതിയ പാഠങ്ങളും
 നന്ദി ബ്രിട്ടീഷ് കൈരളി ടീം 🙏

Friday, 8 May 2020

Bilatthipattanam / ബിലാത്തിപട്ടണം : പെണ്ണുകാണൽ അപാരതകൾ ... ! / Pennukaanal Aparatha...

Bilatthipattanam / ബിലാത്തിപട്ടണം : പെണ്ണുകാണൽ അപാരതകൾ ... ! / Pennukaanal Aparatha...: എന്റെ ജീവിതത്തിലുണ്ടായ ഏറ്റവും സന്തോഷം നൽകിയ ചില സംഗതികളാണ് ബന്ധുമിത്രാദികൾക്ക് വേണ്ടി ഞാൻ നടത്തിയിട്ടുള്ള പെണ്ണുകാണൽ അപാരതകൾ ....

Wednesday, 29 April 2020

പെണ്ണുകാണൽ അപാരതകൾ ... ! / Pennukaanal Aparathakal ... !



എന്റെ ജീവിതത്തിലുണ്ടായ ഏറ്റവും സന്തോഷം നൽകിയ ചില സംഗതികളാണ് ബന്ധുമിത്രാദികൾക്ക് വേണ്ടി ഞാൻ നടത്തിയിട്ടുള്ള പെണ്ണുകാണൽ അപാരതകൾ ...!
അതെ ,രണ്ട് വ്യത്യസ്ഥ ചിന്താഗതിക്കാരെ കൂട്ടിയോജിപ്പിച്ച് ഒരു കുടുംബമായി വാഴിക്കുമ്പോഴുള്ള ആ ആനന്ദം ഒന്ന് വേറെ തന്നെയായിരുന്നു ...! 

 ഇപ്പോഴുള്ള ന്യൂ-ജെൻ പിള്ളേരെ പോലെയുള്ള 'ചാറ്റിങ്ങും' , 'ചീറ്റിങ്ങും', 'ഡേറ്റിങ്ങു' മൊന്നുമില്ലാതെ തന്നെ , പ്രഥമ ദർശനത്തിൽ തന്നെ ജീവിത പങ്കാളികളായവർ ...!

അവർ ഇപ്പോഴും തട്ടി മുട്ടി കോട്ടം കൂടാതെ പരസ്‌പരം പിരിയാതെ തന്നെ   മരണം വരെ ജീവിതം മുട്ടത്തട്ടെത്തിച്ചത് കാണുമ്പോഴുണ്ടാകുന്ന സംതൃപ്‌തി - ഇന്നത്തെ ഈ പുത്തൻ തലമുറയുടെ ഇപ്പോൾ ചുറ്റുപാടും നടക്കുന്ന ധാരാളം വിവാഹ മോചനങ്ങൾ കാണുമ്പോൾ കിട്ടുന്നില്ല എന്നത് വാസ്തവമാണ് ...

എന്റെ ആദ്യ പെണ്ണുകാണൽ  കഴിഞ്ഞതു മുതൽ ആയതിന്റെ വർക്കത്ത് കാരണം പല കൂട്ടുകാർക്കും , അടുത്ത ബന്ധുക്കളുടെ മക്കൾക്കുമൊക്കെ പെണ്ണുകാണാനും,  ആണു  കാണാനുമൊക്കെയായി അക്കാലത്ത് എല്ലാ വീക്കെന്റുകളും മാറ്റിവെച്ചവനായിരുന്നു ഞാൻ ...


സ്വന്തമായി ഒരു പെണ്ണിനെ കണ്ട് ഇത്തിരി കിഞ്ചന വർത്തമാനം പറഞ്ഞു അവളെ കെട്ടിപ്പൂട്ടി ഭാര്യസ്ഥാനത്ത് പ്രതിഷ്ഠിക്കുവാൻ യോഗമില്ലാത്തവനായിരുന്നു ഞാനെങ്കിലും , മറ്റുള്ളവർക്ക് വേണ്ടി പെണ്ണുകാണൽ ചടങ്ങുകളിൽ പങ്കെടുത്ത് സെഞ്ച്വറി  കടന്നവനാണ് ഞാൻ ...!

അതിന് സ്വന്തമായിട്ട് ഒരുപെണ്ണു കാണുവാൻ  എനിക്കൊക്കെ എങ്ങിനെ പറ്റാനാണ് ...?

കൗമാരം തൊട്ടേ ഒരു പ്രണയവല്ലഭനായി കാമിനിമാരുടെ ചുറ്റും റോന്തു ചുറ്റി നടക്കുന്ന ശീലഗുണം കൊണ്ട് വീട്ടുകാരും , നാട്ടുകാരും കൂടി 24 വയസ്സിലെ തന്നെ അതിലൊരുത്തിയെ കൊണ്ട് - ഇടഞ്ഞു നിൽക്കുന്ന ഒരു കാളക്കൂറ്റനെ മെരുക്കുവാൻ  എന്ന പോലെ - എനിക്ക് മൂക്ക് കയറിടീപ്പിച്ച് , അവളാരത്തിയെ എന്റെ പെർമനന്റ് യജമാനത്തിയായി  ഏൽപ്പിച്ചു കൊടുത്തു  ..!


എന്റെ കൗമാരകാലത്ത് പൊട്ടിമുളച്ച  ആദ്യാനുരാഗ കഥയിലെ നായികയായ പ്രിയയെ (ഒരു കടിഞ്ഞൂൽ പ്രണയത്തിൻ പുതുപുത്തൻ പഴങ്കഥ ) , ജാതിയുടെ അതിർവരമ്പുകൾ ഭേദിക്കുവാൻ കഴിയാതിരുന്നത് കൊണ്ട് , അവളുടെ മുറ ചെക്കനായ   എന്റെ മിത്രം കൂടിയായിരുന്ന ഹരി (യേട്ടൻ)  ഗൾഫിൽ നിന്നും വന്ന് കല്യാണിച്ച്, അവളേയും കൂട്ടി ദുബായിലേക്ക് പറന്നകന്ന കാലം ..!

ഏതാണ്ട് ഒരു ദശകക്കാലം നീണ്ടുനിന്ന പ്രിയയുടെയും, എന്റെയും  ഇമ്പമാർന്ന ആ പ്രണയ കാലം മറക്കുവാൻ വേണ്ടിയാണ് 
പിന്നീട് ഞാൻ സമയമുണ്ടാക്കി , 'മാജിക് ഷോ'യും  , പിന്നെ  പല  കൂട്ടുകാരുടെയും പ്രണയ ദൂതുമായും മറ്റും  സെൻറ് .മേരീസ് കോളേജിന്റെ ഇടവഴിയിലും , വിമല 'കേളേജ് ബസ്സിന്റെ പിക്കപ് പോയന്റു'കളിലും , കേരളവർമ്മയിലെ ഊട്ടി പറമ്പിലുമൊക്കെ  ചുമ്മാ റോന്ത് ചുറ്റി നടന്നിരുന്നത്  ...!

പോരാത്തതിന് പ്രീഡിഗ്രിക്ക് പഠിക്കുമ്പോൾ നടരാജന്മാഷുടെ ട്യൂഷ്യൻ ക്‌ളാസിൽ വെച്ച് എന്നോട് അടുപ്പത്തിലായ സുമം വർഗീസ് ഡിഗ്രിക്ക്  വിമലയിൽ പഠിക്കുന്ന കാലവും ...

അന്നെനിക്ക് സ്വന്തമായി ഒരു പ്രണയിനി ഉള്ളതിനാൽ സുമത്തിനെ (ബെർക്‌ഷെയറിൽ ഒരു പ്രണയകാലം ) ഇഷ്ട്ടപ്പെടുന്ന - കൂട്ടുകാരൻ സുധന്  വേണ്ടി എല്ലാ ഒത്താശകളും ചെയ്‌ത്‌ കൊടുക്കുന്ന 
ഒരു ഉദാര മനസ്‌കനും കൂടിയായിരുന്നു ഞാൻ  എന്നതിനാൽ അവളേയും കൂട്ടുകാരികളെയും, കോളേജ് ബസ് കയറ്റി വിട്ട ശേഷമെ ഞങ്ങൾ സ്വന്തം ക്യാംപസുകളിലേക്ക് തിരിച്ച് പോകുമായിരുന്നുള്ളൂ...

ആ സമയത്ത്  വിരഹം മൂലം പ്രേമം മുട്ടി നിന്ന എന്നുടെ മനസ്സിനുള്ളിലേക്ക് പിന്നീട് കയറി വന്ന ഒരു ചുള്ളത്തിയായിരുന്നു അനിത ... 


ഞാനും എന്റെ കൂട്ടുകാരും കൂടി ഞങ്ങളുടെ ബിരുദ പഠന കാലത്ത് തുടക്കം കുറിച്ച - 'ഫീനിക്‌സ് ട്യൂട്ടോറിയൽ   ട്യൂഷൻ സെന്ററി'ൽ ഇംഗ്ലീഷ്  പഠിപ്പിക്കുവാൻ വന്നവളായിരുന്നു ഇഷ്ട്ടത്തി ...

എന്റെ ഇളയച്ഛൻറെ ഭാര്യയുടെ ചേച്ചിയുടെ മകളായ വലപ്പാട് സ്വദേശിയായ അനിത ,  ആ  സമയത്ത് തൃശൂരിൽ വന്ന് 'ബിഎഡ്'  പഠിക്കുവാൻ വേണ്ടി എന്റെ വീടിന്റടുത്തുള്ള ഇളയച്ഛന്റെ വീട്ടിൽ വന്ന് താമസിക്കുന്ന കാലമായത് കൊണ്ട് - അനിതക്ക്   ടീച്ചിങ്ങ് പരിശീലനത്തിന് വേണ്ടി ഞങ്ങളുടെ 'ട്യൂഷൻ സെന്ററൽ  ഒരു  അദ്ധ്യാപികയായി സ്ഥാനവും കൊടുത്തു ...

അതിനുശേഷം മൂന്നാലു മാസത്തിനിടയിൽ   ഞാൻ അനിതക്ക് കുറച്ച് പ്രണയ പരിശീലനം കൂടി കൊടുത്ത് , ഇളയമ്മയും മറ്റും അറിയാതെ ഞങ്ങളുടെ 'ട്യൂഷൻ സെന്ററി'ലും , 'ഡിലൈറ്റ് ഐസ്ക്രീം പർലറി' ലിലും ,ടൗണിലെ ചില മാറ്റിനിക്ക് പോക്കുമൊക്കെയായി  അത്യാവശ്യം 'ലൈൻ' നല്ല 'സ്‌മൂത്താ'യി വന്ന അവസരത്തിൽ , എങ്ങിനെയോ  നാട്ടിൽ മുഴുവൻ പാട്ടായിരുന്ന  എന്റെ പ്രഥമാനുരാഗ കഥയുടെ ആഴം - അനിത അറിഞ്ഞപ്പോൾ ആ പ്രേമോം   പൊട്ടിപ്പൊളിഞ്ഞു പാളീസായി പോയി ...


എന്റെ പതിനെട്ടാം വയസ്സിൽ അകാലത്തിൽ എന്റെ അച്ഛൻ ഞങ്ങളെ വിട്ട് പോയപ്പോൾ മുതൽ  'ഓട്ടോമറ്റിക്കാ'യി ഞാൻ വീട്ടു കാരണവരായി മാറിയിരുന്നു  ...!

ആയതിനാൽ മാതാപിതാക്കളുടെ സഹോദരീ സഹോദരന്മാരുടെ വീടുകളിലെല്ലാം എന്ത് ചടങ്ങുകൾ ഉണ്ടായാലും , അവിടെയൊക്കെ പോയി തലകാണിക്കേണ്ട ചുമതലയും എന്നിൽ നിഷിപ്തമായ കാലങ്ങളായിരുന്നു അപ്പോൾ ...


അച്ഛൻ മരിച്ച ശേഷം , തൃശ്ശൂർ അങ്ങാടിയിലുള്ള കടയുടെ  ചുമതല എന്റെ രണ്ടാമത്തെ അമ്മാവനും ഞാനും കൂടി ഏറ്റെടുത്ത് നടത്തിയപ്പോൾ പോലും , കടയിൽ നിന്നും സമയമുണ്ടാക്കി അല്പസൽപ്പം പ്രേമ സല്ലാപങ്ങൾക്ക് സമയം കണ്ടെത്തി മനസ്സിനെന്നും ഉന്മേഷം കൊടുത്തിരുന്നവനായിരുന്നു ഞാൻ ...

ശനിയാഴ്ച്ചകളിലെ സെക്കന്റ് ഷോ സിനിമകൾക്ക് ശേഷം, പാതിരാവിലെ 'ഡബിൾക്‌സ്  ഹോട്ടലി'ലെ ഫുഡടിയും, മറ്റും കഴിഞ്ഞു വീട്ടിലെത്തുമ്പോൾ സാധാരണ കോഴി കൂവിയിട്ടുണ്ടാകും ...

സമീപ പ്രദേശങ്ങളിൽ പൂരമോ, പള്ളിപ്പെരുന്നാളൊ വരുന്ന ഉത്സവ സീസണുകളിൽ നാടകമൊ , കഥാപ്രസംഗമൊ , ബാലെയോയുള്ള ദിനങ്ങളിൽ ഇതൊക്കെത്തന്നെയായിരുന്നു ഞങ്ങൾ കൂട്ടുകാരുടെ രാത്രിയിലെ സ്ഥിരം കളിവിളയാട്ടങ്ങൾ ...

ആകെ കിട്ടുന്ന ഒഴിവു ദിവസമായ ഞായാറാഴ്ചകളിൽ കല്യാണങ്ങൾക്കും മറ്റു വിരുന്നുകൾക്കും മറ്റും പങ്കെടുത്ത്  , ചിലപ്പോൾ ബന്ധുമിത്രാധികളുടെ വീടുകളിലെയും,  റിക്രിയേഷൻക്ലബ്ബ്കളിലേയും സന്ദർശനങ്ങളൊക്കെ പൂർത്തിയയായി വരുമ്പോഴേക്കും   ആ ദിനങ്ങളും  കഴിഞ്ഞു കിട്ടും.

അതൊക്കെ പോട്ടെ ഇനി എന്റെ ആദ്യ 
പെണ്ണുകാണൽ അനുഭവത്തെ കുറിച്ച് ചുമ്മാ ഒന്ന് ചൊല്ലിയാടാം...


എന്റെ ചടപ്പരത്തി 'ലാംബി സ്‌കൂട്ടർ' വിറ്റ് പുത്തൻ 'ചേതക് 'എടുത്ത അവസരത്തിലാണ്  , എനിക്ക് ആദ്യമായി  ഒരു പെണ്ണുകാണൽ ചടങ്ങിന് ക്ഷണം കിട്ടിയത് ...
എനിക്കായിട്ടല്ല.  ഞങ്ങളുടെ തലമുറയിലെ മുതിർന്ന പയ്യനായ അമ്മായിയുടെ മകൻ വിനോദേട്ടന് വേണ്ടിയായിരുന്നു ...

കല്യാണ ബ്രോക്കർ 'നമസ്‌കാരം അശോകൻ' കൊണ്ടുവന്ന പെണ്ണിന്റെ ഫോട്ടോ അവർക്ക് 
ഇഷ്ട്ടപ്പെട്ടപ്പോൾ കുറിപ്പടി  വാങ്ങി ഒത്ത് നോക്കിയപ്പോൾ നല്ല ജാതക പൊരുത്തവും ഉണ്ട് .

ഇനി ചെക്കനും പെണ്ണും പരസ്‌പരം കണ്ട് ഇഷ്ട്ടപ്പെട്ടാൽ കാര്യങ്ങൾ പ്രൊസീഡ് ചെയ്യാം ...

വാചകമടി കുറച്ചേറെയുണ്ടെങ്കിലും ,  നല്ല വകതിരുവുള്ള മുകുന്ദ മാമന്റെ  മോൻ മുരളിയും, നീയും കൂടി പോയി പെണ്ണിനെ കണ്ട് വന്നാൽ അവരെ കുറിച്ചുള്ള സകലമാന ഡാറ്റയും - നല്ല ഡീറ്റൈയ്ൽസ്  ആയി അവൻ വിവരിച്ചു  തരും എന്ന് പറഞ്ഞാണ് അമ്മായിയും , മാമനും കൂടി ഈ ചുമതല എനിക്കായി ഒഴിച്ചിട്ടത് ...

അങ്ങനെ അന്നൊരു  ഞായറാഴ്ച്ച , അമ്മായിയുടെ വീട്ടിൽ നിന്നും 'ലഞ്ച്' കഴിച്ച ശേഷം വിനോദേട്ടന് വേണ്ടി ഒരു പെൺ  ക്ടാവിനെ  കാണുവാനായി തൃപ്രയാർ ഭാഗത്തേക്ക് ഞങ്ങൾ വണ്ടി വിട്ടു ...

ബ്രോക്കർ 'നമസ്‌കാരം അശോകൻ' മൂന്ന്  മണിക്ക്  തൃപ്രയാർ അമ്പലനടയിൽ നിന്നും, ഇടത്തോട്ട് പോകുന്ന വഴിയിൽ ഒരു കിലോമീറ്റർ കഴിഞ്ഞാൽ കാണുന്ന ആൽത്തറയിൽ കാത്ത് നിൽക്കാമെന്നാണ് പറഞ്ഞിരിക്കുന്നത് .


പറഞ്ഞ സമയത്തിന് മുമ്പെ  ഞങ്ങളവിടെ എത്തിയ ശേഷം , അശോകൻ ചൂണ്ടി കാണിച്ച  ഇടത്തെ വഴിയിലുള്ള വീടിന് മുമ്പിൽ ഗാർഡനുള്ള , മൂന്നാമത്തെ ടെറസ് വീട്ടിലെത്തിയപ്പോഴേക്കും , അതിന് പിന്നാലെ ബ്രോക്കറും അവിടെ എത്തി ചേർന്നു ...

പെൺ കുട്ടിയുടെ അച്ഛൻ ഗൾഫിൽ ആയത് കാരണം അവിടെ ഞങ്ങളെ വരവേറ്റത് കുട്ടിയുടെ വല്യച്ഛനായിരുന്നു .

മൂപ്പർ ഞങ്ങളെ വീട്ടിൽ കയറുന്നതിന് മുമ്പ്  വീടിൻറെ വടക്ക് വശത്ത് കൊണ്ടുപോയി ആദ്യം പറമ്പ്‌ കാണിക്കുകയാണ് ചെയ്‌തത്‌ ...

'ഞങ്ങൾ സ്ഥല കച്ചോടത്തിനല്ല, പെണ്ണ്കാണുവാനാണ് വന്നതെന്ന്' 
എനിക്ക് പറയണമെന്നുണ്ടായിരുന്നു ...



എന്നാൽ   ജാതിമരങ്ങളും , കായ്ച്ചു നിൽക്കുന്ന വലിയ ഒരു കുടംമ്പുളി മരവും , കടച്ചക്ക പ്ലാവും , പുളിമരവും , കുറെ തെങ്ങുകളുമൊക്കെയായി നല്ല പച്ചപ്പു നിറഞ്ഞുനിൽക്കുന്ന പുരയിടത്തിൽ അസ്സലൊരു ഇരുനില വീട് നിൽക്കുന്ന ദൃശ്യ ഭംഗി വേറെ ഒന്ന് തന്നെയായിരുന്നു ...! 


കൂടാതെ പിന്നാമ്പുറത്ത് ഒരു  കൊച്ചു കുളം , വിറകുപുര കം കയ്യാലയടക്കം ഒരു ടോയ്‌ലറ്റ് , അതിന്റെയടുത്ത് 'നെറ്റ'ടിച്ച  ഒരു കോഴിക്കൂടും നേരെ അപ്പുറത്ത്  ഒരു പട്ടി കൂടും...

അതിൽ ഞങ്ങളെ കണ്ട്  കുരച്ചു കൊണ്ടു നിൽക്കുന്ന ഒരു അൾസേഷൻ നായയും , പിന്നെ അടുക്കള ജനലിൽ കൂടിയുള്ള ചില ഒളിഞ്ഞു  നോട്ടങ്ങളും മറ്റും കണ്ടപ്പോൾ ഞങ്ങൾക്കാണ് അപ്പോൾ ശരിക്കും നാണം വന്നത് ...


പിന്നീട് വീട്ടിൽ കയറി സിറ്റൗട്ടിൽ ഇരുന്നുള്ള വർത്തമാനത്തിൻ ഇടയിൽ പെൺ കുട്ടിയുടെ നാട്ടിക കോളേജിൽ ഡിഗ്രിക്ക് പഠിക്കുന്ന ആങ്ങള ചെക്കനെ എവിടെയൊ  നല്ല കണ്ടു പരിചയം ..?

വല്ല്യച്ഛൻ കാർന്നോർ - മാലപ്പടക്കത്തിന്  തീ പിടിച്ച മാതിരി നിർത്താതെ ബന്ധുക്കളായ പലരെയും , അവരുടെ വീട്ടുംപേരും മറ്റും പറഞ്ഞ് അതിന്റെ ബന്ധം വിശദീകരിച്ച് , വിനോദേട്ടനെ ശ്വാസം മുട്ടിച്ചു കൊണ്ടിരിക്കുമ്പോൾ , ഞാനതെല്ലാം കേൾക്കുന്ന ഭാവത്തിൽ പെൺകുട്ടിയോട് ചോദിക്കേണ്ട 'ഇന്റർവ്യൂ ' ചോദ്യങ്ങൾ മനസ്സിലിട്ട് 'റിവ്യൂ' ചെയ്യുകയായിരുന്നു ...

കുറച്ച് കഴിഞ്ഞപ്പോൾ  'ഹോം മെയ്‌ഡ്'‌ പരിപ്പുവടയും ,പ്ലം കേക്കും , കായ വറുത്തതുമൊക്കെ ഒരുക്കി വെച്ചിരിക്കുന്ന അകത്തുള്ള ഡൈനിങ് ടേബിളിലേക്ക് വല്യച്ഛൻ ഞങ്ങളെ ആനയിച്ചു ...

ഞാനൊരു പരിപ്പുവട എടുത്ത് കടിച്ചു കൊണ്ടിരിക്കുന്നതിനിടയിൽ വല്യച്ഛൻ 
''മോളെ അനൂ ..ചായ കൊണ്ടു വാ '' 
എന്നതിന്  പിന്നാലെ ചായക്കോപ്പയുമായി പെൺകുട്ടിയും ,ഒപ്പം  അവളുടെ അമ്മയും എത്തി .

പെൺകുട്ടിയെ കണ്ടതും പെട്ടെന്ന് എന്റെ വായിൽ നിന്നും ഒരു വല്ലാത്ത ശബ്ദം പുറപ്പെട്ടു ..

''സോറി ..പരിപ്പുവടക്കുള്ളിലെ മുളക് കടിച്ചതാണെന്ന് ''
പറഞ്ഞ് ഞാൻ അവിടെ സ്‌തംഭിതനായി ഇരുന്നു പോയി ....!

ഒരിക്കൽ കുറച്ചു കാലം എന്റെ പ്രണയിനിയായിരുന്ന അനിതയായിരിന്നു , മഞ്ഞയിൽ നീല പൂക്കളുള്ള സാരിയുടുത്ത് അടുത്ത് വന്നു നിന്ന ആ പെൺകിടാവ്  ...!

എല്ലാവർക്കും അനു , ചയ പകർന്നു തന്നിട്ട് , ചുമ്മാ ചിരിച്ചുകൊണ്ടവിടെ നിന്നു ... 


ഇതിനിടയിൽ വിനോദേട്ടൻ അനിതയോട് എന്തൊക്കൊയൊ  ചോദിക്കുന്നതും, ആയതിനെല്ലാം ചൂണ്ടാണി വിരലിൽ സാരീടെ കോന്തല ചുറ്റിയും, അഴിച്ചും അവൾ ഉരുവിടുന്ന  ഉത്തരങ്ങളും  കേട്ടു  ...


എന്റെ ചോദ്യാവലികൾ മുഴുവൻ ഇറങ്ങിപ്പോയ 
കാരണം  , അവളുടെ അമ്മ കണിമംഗലത്തെ ഇളയമ്മയുടെയും , ഞങ്ങളുടെയുമൊക്കെ  വിശേഷങ്ങൾ ചോദിച്ച് എന്നെ അവിടെ ശരിക്കും  ഇരുത്തി കളഞ്ഞു .... 
ഇതിനിടയിൽ അന്നവിടെ സന്നിഹിതരായിരുന്ന  മറ്റുള്ളവരെയൊക്കെ പരിചയപ്പെടുത്തി .

തിരിച്ചുപോകേണ്ട നേരത്ത് അനിത എന്നോട്  ഒരു ചോദ്യം... 

''എന്താ ഈ മുരളി മാഷ്ക്ക് ..പറ്റീ ത്  ..? പണ്ടത്തെ പോലത്തെ ഉഷാറൊന്നും  കാണാനില്ലല്ലോ ..?''

'' ഞാനെന്തുട്ട് പറയാനാ .., ഇന്ന് വിനോദേട്ടനല്ലേ 'കാൻഡിഡേറ്റ് ..ആള് കേറി ഗോളടിച്ചോട്ടെന്ന് ..വച്ചു..'' 
എന്ന് പറഞ്ഞ് ,'ബൈ ' ചൊല്ലി തിരിച്ചു പോന്നു ..!

മടക്കയാത്രയിൽ സ്‌കൂട്ടറിൽ പിന്നിലിരുന്ന് വിനോദേട്ടൻ 
'' എനിക്ക് കുട്ടീനേം ,വീട്ടുകാരേം ,പരിസരോം മൊക്കെ നന്നായി ഇഷ്ടപ്പെട്ടൂട്ടാ ..., നിനക്കോടാ..മുർല്ല്യേ ..? '' 

''എനിക്കും എല്ലാം കൊണ്ടും ബോധ്യായി ... അസ്സല് കേസാ..ത് '' എന്ന് മാത്രം  പറഞ്ഞു . 

അല്ലാണ്ട്  അനിതേനെ മൂന്നാല് കൊല്ലം മുമ്പ് മുതലേ   എനിക്കും പെരുത്ത്   ഇഷ്ട്ടായിരുന്നൂന്ന് പറയാൻ പറ്റോ ...ല്ലെ ... !

എന്തിന് പറയുവാൻ മൂന്ന് മാസത്തിനുള്ളിൽ  വിരുന്നും , ജാതകം വാങ്ങലും ,
കെട്ടു കല്യാണവും , റിസപ്‌ഷനുമൊക്കെയായി വിനോദേട്ടന്റെ കല്യാണം കെങ്കേമമായി നടന്നു ...

അനിത എനിക്ക് അനിതേടത്തിയായി മാറി ...!


പിന്നീട് അനിതേടത്തിക്ക് ഒരു കൊല്ലത്തിനുള്ളിൽ   വിനോദേട്ടന്റെ വീടിനടുത്തുള്ള   ഒരു  'എയ്‌ഡഡ്‌ സ്‌കൂളി'ൽ 
കൊഴ കൊടുത്തിട്ടാണെങ്കിലും ടീച്ചറുദ്യോഗം കിട്ടി ...
ശേഷം രണ്ട് മക്കളുടെ  മാതാവായി , ഇപ്പോൾ അമ്മായിയമ്മയും ,ആ സ്‌കൂളിലെ തന്നെ ഹെഡ്‌മിസ്‌ട്രസുമാണ് എന്റെ ഈ ആദ്യ പെണ്ണുകാണലിലെ നായിക ...

വിനോദേട്ടൻ രണ്ട് കൊല്ലം മുമ്പ് ഇറിഗേഷൻ വകുപ്പിലെ സൂപ്രണ്ടുദ്യോഗത്തിൽ നിന്നും റിട്ടയറായി കൃഷിയിലും ,അല്പ്പം പൊതുകാര്യങ്ങളിലും ഇടപ്പെട്ട് നടക്കുന്നു.

ഒന്നൊര വർഷം മുമ്പ് ഞങ്ങൾ നാട്ടിലെത്തിയപ്പോൾ - വിനോദേട്ടന്റെ മകന്റെ കല്യാണത്തിന് മുന്നോടിയായി നടക്കുന്ന വിരുന്നു കഴിച്ചിലിന്റന്ന് ഞങ്ങൾ എല്ലാ വീട്ടുകാരുടെ മുന്നിൽ വെച്ചാണ് എന്റെയും, അനിത ടീച്ചറുടെയും - പഴയ കാല  പ്രണയ കഥകൾ -  ഞാൻ വെളിവാക്കിയത് ...!

ആയതെല്ലാം കേട്ട് അന്നവിടെയുള്ളവർക്കെല്ലാം  പൊട്ടി ചിരിക്കുവാൻ ഒരു വകയായി എന്നുമാത്രം...!

ഇത് കേട്ടപ്പോൾ 
എന്റെ ഭാര്യ അനിതേടത്തിയോട് 
'' ഇങ്ങോരെ അന്ന് തേച്ചിട്ട് പോയത് കൊണ്ട് അനിതേച്ചി രക്ഷപ്പെട്ടു ,കഷ്ടപ്പാട് മുഴുവൻ എനിക്കല്ലേ കിട്ടീത് ''
എന്ന് പരിതപിക്കുന്നത് കേട്ടു...

'എന്ത് ചെയ്യാനാ കഷ്ടപ്പാടും,  ദുരിതവും ആർക്കാണെന്ന് 

മ്ള് കെട്ട്യോൻമാർക്ക് മാത്രമല്ലെ അറിയൂ  ...അല്ലെ കൂട്ടരെ' ... ! !


PS:-
ഈ അനുഭവ കഥ ഇന്നത്തെ ബ്രിട്ടീഷ് മലയാളി പത്രത്തിൽ പ്രസിദ്ധീകരിച്ചിട്ടുണ്ട് കേട്ടോ .നന്ദി ബ്രിട്ടീഷ് മലയാളി ടീം ...
പെണ്ണുകാണൽ അപാരതകൾ britishmalayali.co.uk 

ഇതിലെ കാർട്ടൂൺ ചിത്രം 'ചായില്യം' വക .


Wednesday, 15 April 2020

കൊറോണക്കാലം @ ലണ്ടൻ...! / Koronakkalam @ London ... !


കോറോണേച്ചി കോവിഡ് -19  
എന്ന അവതാരമെടുത്ത് ചൈനേലെ വ്യൂഹാൻ 
പട്ടണത്തിന്റെ മോളിൽ  കയറി നിന്ന് താണ്ഡവ നൃത്തം ആടിത്തുടങ്ങിയപ്പോൾ -  അവളാരത്തി , ചൈനയുടെ വൻ മതിൽ ചാടിക്കടന്ന്    മറ്റ് രാജ്യക്കാരെയൊന്നും വശീകരിക്കുവാൻ പോകില്ല എന്നാണ് ഏവരും കരുതിയിരുന്നത് ...

അഥവാ ചീനയുടെ അയലക്കക്കാരെ കെട്ടിപ്പിടിച്ചുമ്മവെച്ച  ശേഷം, എങ്ങാനും ഈ കൊറോണപ്പെണ്ണ് പടിഞ്ഞാറൻ നാടുകളിലേക്ക്  ചുമ്മാ ലെപ്പടിക്കുവാൻ വന്നാലും, ജൈവായുധങ്ങൾ വരെ തടുത്ത് നിറുത്തുവാൻ കെൽപ്പുള്ള പാശ്ചാത്യ നാടുകളിൽ ഒന്നായ ബ്രിട്ടനിൽ ജീവിക്കുന്നത് കൊണ്ട്, കോറോണേച്ചിയെ  ഞങ്ങൾക്കാർക്കും  ആ സമയത്ത് , ഒട്ടും പേടിയും ഇല്ലായിരുന്നു ...

ഇനിയിപ്പോൾ  കൊറോണയല്ല ;അവളുടെ വല്ലേച്ചി വരെ വന്നാൽ അതിനെയൊക്കെ ഓടിക്കാനുള്ള വാക്‌സിനുകൾ ചടുപിടുന്നനെ ഉണ്ടാക്കാൻ വരെ കഴിവുള്ള - പുതിയ രോഗങ്ങൾ ഉണ്ടാക്കിച്ച് അതിന് മറുമരുന്നു വരെയുണ്ടാക്കി ജനങ്ങളെ തീറ്റിച്ച് - 'മൾട്ടി മില്ലനേഴ്സായ അതി ഭീമന്മാരായ  മരുന്ന് മാഫിയ കമ്പനി'കൾ  വരെയുള്ള നാടുകളാണിത് ...!

പക്ഷിപ്പനിയും ,പന്നിപ്പനിയുമടക്കം മറ്റനേകം വൈറസ് /  ബാക്റ്റീരിയൻ വ്യാപന രോഗങ്ങളെ വറുതിയിലാക്കിയ 
ക്രെഡിറ്റും സമീപ ഭൂതകാലങ്ങളിൽ ഇവരുടെ ചരിത്രങ്ങളിൽ ഉണ്ടുതാനും ...

അതുകൊണ്ട് ഏത്  വ്യാപന വ്യാപ്തിയുള്ള വൈറസേട്ടൻ വന്നാലും , മ്ളൊക്കെ  എന്തുട്ടിന് പേടിക്കണം എന്ന ധൈര്യത്തിൽ ഇരിക്കുമ്പോഴാണ്, രണ്ട് മാസം മുമ്പ് കോറോണേച്ചി മന്ദം മന്ദം ലാസ്യവിന്യാസത്തോടെ അടിവെച്ചടിവെച്ച്‌ ബിലാത്തിയിലും ആട്ടം തുടങ്ങിയത് ... !

ആ സമയത്ത് പാശ്ചാത്യ നാട്ടിൽ കോവിഡ് -19 നെ കുറിച്ചുണ്ടായ  പുതിയ മെഡിക്കൽ പഠനങ്ങൾ പ്രവചിച്ച സംഗതികൾ - മാധ്യമങ്ങൾ വഴിയും മറ്റും  മാളോകരെയെല്ലാം അറിയിച്ചിട്ടുള്ള കാര്യം  എന്തെന്ന് വെച്ചാൽ  - മാർച്ച്മാസം അവസാനത്തോടെ മഹാഭൂരിപക്ഷം ലണ്ടൻകാരടക്കം , പലപല പടിഞ്ഞാറൻ രാജ്യങ്ങളിലെ  ,ഒട്ടുമിക്കവരെയും  മഹാമാരിയായ 'കൊറോണേ'ച്ചി വന്ന്  മാറോടണക്കി ഉമ്മവെച്ച് പോകുമെന്നാണ്... 
മഹാദുരന്തമൊന്നും ആകില്ലെങ്കിലും 
മരണങ്ങൾ നിരവധി ഇത് ഉണ്ടാക്കുമെത്രെ ...!
മഹാനഗരമായ ലണ്ടനിലിരുന്ന് ഇതെല്ലാം കാണുകയും
കേൾക്കുകയും മറ്റും ചെയ്‌തപ്പോൾ , മതിവരുവോളം ഇത്രകാലം
സുഖിച്ചു മദിച്ചു ജീവിച്ചിട്ടും - മരണഭയം കൊണ്ട് വീർപ്പുമുട്ടി കഴിയുകയാണ് 'മെഡിക്കൽ അണ്ടർ ലൈനി'ൽ പെട്ട തനി മണ്ടന്മാരായ എന്നെപ്പോലെയുള്ളവർ ...
എന്താല്ലേ ..മരണ ഭയത്തോടുള്ള ഈ ഭയങ്കര പേടി ...!

എന്തായാലും ദിനംപ്രതി ഇവിടെയൊക്കെ  'കൊറോണേ'ച്ചിയുടെ
കളി വേറെ ലെവലായി മാറുകയായിരുന്നു ...

പടിഞ്ഞാറൻ നാടുകളിലെ  പല ചിട്ടവട്ടങ്ങളും മെല്ലെ മെല്ലെ മാറ്റിമറിക്കപ്പെട്ടു ...
പരസ്‌പരം കാണുമ്പോൾ കൈ പിടിച്ച് കുലുക്കലില്ല , കെട്ടിപ്പിടിച്ചുള്ള ആശ്ലേഷമില്ല, കവിളിൽ കൊടുക്കുന്ന മുത്തമില്ല.
പിന്നെ കമിതാക്കൾ എവിടെയും എപ്പോഴും പബ്ലിക്കായി നടത്തിക്കൊണ്ടിരുന്ന ചുണ്ട് ചുണ്ടോടോട്ടിപ്പിടിപ്പിക്കുന്ന നെടുനീളൻ ചുടു ചുംബനങ്ങളില്ല ..! 
ഇപ്പോൾ പരസ്‌പരം നേരിട്ട് കാണുമ്പോൾ  ഏവരും ആദ്യം 
ചെയ്യുന്നത് കൈ കൂപ്പി നമസ്‌തെ പറഞ്ഞു കൊണ്ടുള്ള നമസ്കാരം മാത്രം ...

മരുന്നില്ലാത്ത  ഈ പരമാണുവിന്റെ അദൃശ്യമായ ആക്രമണത്തിൽ 
നിന്നും ഒഴിഞ്ഞുമാറുവാൻ വേണ്ടി ,ശരീരത്തിന് പ്രതിരോധ ശക്തി വർദ്ധിപ്പിക്കുവാൻ വേണ്ടി മഞ്ഞൾ ,വെള്ളുള്ളി,ചെറുനാരങ്ങ,ഇഞ്ചി മുതലായ മിശ്രിതങ്ങൾ ചേർത്തുള്ള വെള്ളം കുടിയും ,യോഗയും, ആവികൊള്ളലും ,വെയിലു കായലും  മറ്റുമായി ശരീരത്തിന് വിറ്റാമിൻ 'C' യും , 'D' യും വേണ്ടുവോളം ഉണ്ടാക്കുവാനുള്ള ശ്രമങ്ങൾ ഏവരും തുടങ്ങി വെച്ചു ...
ഒപ്പം എവിടെയും സ്വയം ,സാമൂഹ്യ 
അകലങ്ങൾ പരിപാലിച്ചുകൊണ്ടുള്ള എടവാടുകൾ മാത്രം ...

ഇതിനിടയിൽ കോറോണേച്ചി ഇറ്റലിയിൽ ഉഗ്രൻ  രൗദ്ര ഭാവത്തോടെ നിറഞ്ഞാടിയപ്പോഴും , അയലക്കക്കാരായ ബ്രിട്ടനും ,ഫ്രാൻസും, ജർമ്മനിയും ബെൽജിയവും , സ്പെയിനുമൊന്നും ആയതത്ര കാര്യമാക്കിയില്ല ...  

'ഏയ് ആരും പേടിക്കാനില്ല , ഇത് വയസ്സായോരെ  മാത്രമേ 
ആഞ്ഞു പിടിക്കുകയുള്ളുവെന്നും , പടമാവുകയാണേൽ  അവരിൽ  
ചിലർ മാത്രമെ പെടുകയുള്ളൂ എന്നുമുള്ള അധികൃതരുടെ ഭാഷ്യം' ശ്രവിച്ചവർക്കൊക്കെ അസ്സൽ എട്ടിന്റെ പണികിട്ടിയിരിക്കുകയാണിപ്പോൾ... 

എന്തൊക്കെയായിരുന്നു വീരവാദം മലപ്പുറം കത്തി,  
അമ്പും വില്ലും , മിഷ്യൻ ഗൺ , ബയോളജിക്കൽ  വീപ്പൺ  ,
റാപ്പിഡ് ടെസ്റ്റ് ,കോവിഡ് വാക്‌സിൻ , ഒലക്കേന്റെ  മൂഡ് ഒടുവിൽ 
ബ്രിട്ടണും പവനായി പോലെയായി ...!


എല്ലായിടത്തും അനിശ്ചിതകാലത്തേക്ക്  അടച്ചുപൂട്ടൽ പ്രഖ്യാപിച്ചു ...!

അന്തർദ്ദേശീയമായി മികച്ചു നിൽക്കുന്ന ജനനിബിഡമായ രാവും പകലും കണ്ണഞ്ചിപ്പിക്കുന്ന വിസ്മയങ്ങൾ വാരിവിതറുന്ന പത്ത് തെരുവുകളിൽ  പെട്ട ലണ്ടനിലെ 'ഓക്സ്ഫോർഡ് സ്ട്രീറ്റും' ,'റീജണ്ട് സ്ട്രീറ്റും' ഏതാണ്ട് ഒരു മാസത്തോളമായി   വിജനമാണ് ...

ലണ്ടൻ മാത്രമല്ല - പാരീസും , ന്യൂയോർക്കും , മിലാനും ,
ബെർലിനും , ട്യോക്കിയോവും ,മോസ്‌കോയും , സിങ്കപ്പൂരും,
സിഡ്‌നിയും , ഹോങ്കോങ്ങും, മൂംബൈയും, സയപ്പോളായും , ലാഗോസും, കെയ്‌റോവും ,ദുബായിയുമടക്കം അനേകമനേകം ലോകത്തിലുള്ള   വമ്പൻ പട്ടണങ്ങളെല്ലാം അടച്ചു പൂട്ടിയിരിക്കുകയാണിപ്പോൾ  ...!


അതെ,  ആഗോളതലത്തിലെ എല്ലാ പട്ടണങ്ങളും 
ഇപ്പോൾ പൂർണ്ണമായോ, ഭാഗികമായോ നിശ്ചലമാണ്...

നൂറ്റാണ്ടുകളായി അനേകം പണിയാളുകളുടെ ശിൽപ്പ 
വൈവിദ്ധ്യത്താലും ,അദ്ധ്വാനത്താലും അവരുടെയൊക്കെ 
ചോരയും നീരും വറ്റിച്ച് പലപല തവണകളായി പൊളിച്ചും പണിതും പടുത്തുയർത്തിയ കൊട്ടാര സമുച്ചയങ്ങളും,  അംബര ചുംബികളും,  പുഴയോരങ്ങളും , പുകൾപെറ്റ പാലങ്ങളും,  വീമാന താവളങ്ങളും , തുറമുഖങ്ങളും , ഭക്ഷണശാലകളും, രംഗമണ്ഡപങ്ങളും, കലാലയങ്ങളും , സിനിമാശാലകളും , വ്യവസായ സ്ഥാപനങ്ങളും, കലാകായിക സംഗീത സാംസ്കാരിക കേന്ദ്രങ്ങളടക്കം ഒട്ടുമിക്ക സംഗതികളും ആളുകളൊന്നുമില്ലാതെ നിശ്ചലമായിരിക്കുന്ന  ഇങ്ങിനെയുള്ള ഒരു സ്ഥിതി വിശേഷം ആഗോളതലത്തിൽ ഉണ്ടായിട്ടില്ല എന്നത് വാസ്തവമാണ് ...!


ഇന്നിപ്പോൾ മഹാമാരിയായ കൊറോണക്ക് മുമ്പിൽ തോറ്റ് തൊപ്പിയിട്ട് ഒരു അനങ്ങാപ്പാറയെ പോലെ നിൽക്കുകയാണ് ലോകത്തിലെ സകലമാന വമ്പൻ നഗരങ്ങളും , ഓരൊ കൊച്ചു പട്ടണങ്ങളും,  എല്ലാ ചെറിയ കവലകളും ...!

ലോകത്തിന്റെ സാംസ്കാരിക പട്ടണമായ ലണ്ടൻ മുതൽ നമ്മുടെ കൊച്ചുകേരളത്തിലെ സാംസ്‌കാരിക പട്ടണമായ തൃശൂർ വരെ ഇതിൽ പെടും ...! 

പണവും പകിട്ടും പ്രതാപവുമെല്ലാം പകർച്ചവ്യാധിയായ 
'കോവിഡി'ന് മുന്നിൽ പകച്ചുനിൽക്കുന്ന കാഴ്ചകളാണ് ചുറ്റും . 

പഞ്ചഭൂതങ്ങളെ എന്നും മലിനമാക്കി പടുത്തുയർത്തിയ പുതു ലോകത്തിന് പടച്ചു വിട്ടവൻ തന്നെ അസ്സൽ എട്ടിന്റെ പണി കൊടുത്തിരിക്കുകയാണ് ഇപ്പോൾ... 
പലതും ഇതിൽ നിന്നും ഗുണപാഠമായി നാം പഠിക്കേണ്ടിയിരിക്കുന്നു ...!

ലോക്ക് ഡൗൺ ആണെങ്കിലും ലണ്ടനിൽ പബ്ലിക് 
ട്രാൻസ്‌പോർട്ടുകളടക്കം എല്ലാ 'കീ വർക്ക് ജോബു'കളും 
ആയതിന്റെ സ്ഥാപനങ്ങളും ഇപ്പോഴും സുഖമമായി നടക്കുന്നുണ്ട് . 
എന്നും എപ്പോഴും യാതൊരുകോട്ടവും കൂടാതെ സുലഭമായി ലഭിക്കുന്ന 
5 ജി ഇന്റർനെറ്റ് മുഖാന്തിരം ഓൺ -ലൈനായി എന്തും പ്രാപ്‌തമാക്കുവാനുള്ള സംവിധാനങ്ങൾ .ഹോട്ടായാലും,കോമഡിയായാലും, സിനിമയായാലും ,സ്പോർട്സായാലും ,ഡോക്യുമെന്ററിയായാലും അപ്പപ്പോൾ വിരൽ തുമ്പിൽ റെഡി...


പിന്നെ ഈ അടച്ചുപൂട്ടലിൽ അടിമപ്പെട്ട ആഗോള ജനത വിഷാദരോഗത്തിൽ ഇന്ന് അകപ്പെടാതിരിക്കുന്നതിന് മുഖ്യ കാരണം ഇന്നുള്ള  നവ മാധ്യമങ്ങളിലൂടെ കാഴ്ച്ചവെക്കുന്ന
ഉഗ്രൻ കലാ പ്രകടനങ്ങളാണ് - ദേശവും ഭാഷയും ഊരുമൊന്നും - ഇത്തരം കലാ സാഹിത്യ സംഗീത ഉപാസനകൾക്ക് മുമ്പിൽ ഒരിക്കലും  വിഘ്നങ്ങൾ ആകാത്തതാണ്  സോഷ്യൽ മീഡിയ തട്ടകങ്ങളിലൂടെയുള്ള ഇത്തരം ആശ്വാസങ്ങളാണ്  ...

ഇതൊക്കെ തന്നെയാണ്  കഠിനമായ ഈ
കൊറോണക്കാലത്തെ ഇവിടെയുള്ളവരുടെ കൊച്ചുകൊച്ചു സന്തോഷങ്ങൾ ...!

എന്തൊക്കെയാണേലും വിഷുക്കണിയില്ലാത്ത 
വിഷുക്കൊന്നയില്ലാത്ത വിഷുവും , ഈസ്റ്ററുമൊക്കെ 
വിഷാദത്തിലാണ്ട് ; ഇത്രയേറെ വിഷമഘട്ടത്തോടെ താണ്ടിയൊരു വിഷുക്കാലമെൻ ജീവിതത്തിലാദ്യമാണെന്ന് 
ഇപ്പോൾ ഉറപ്പിച്ചു പറയാവുന്ന ഒരു സംഗതിയാണ് ...

പിന്നെ ഇവിടെ ആർക്കെങ്കിലും കൊറോണയുടെ ലക്ഷണങ്ങൾ കണ്ടുതുടങ്ങിയാൽ ഒരു  ഡോക്റ്ററെ കാണുവാനൊ ,ആശുപത്രിയിൽ പോകുവാനൊ  സാധിക്കുകയില്ല എന്നതാണ് ഏറ്റവും വലിയ ഡ്രോബാക്സ്. എല്ലാം 'ഓൺ -ലൈൻ അപ്പോയ്മെന്റു'കൾ മാത്രം ...

രോഗബാധിതരും , വീട്ടുകാരും
പാരസെറ്റമോൾ മാത്രം കഴിച്ച് 14  ദിവസം വീട്ടിലിരിക്കുക ...


അത്യാസന്ന നിലയിലാവുമ്പോൾ മാത്രമേ ബ്രിട്ടനിൽ കൊറോണ രോഗികളെ ആശുപത്രിയിലേക്ക് കൊണ്ട് പോകുകയുള്ളൂ ...

അവിടെയും പ്രായക്കുറവും ,മറ്റും പ്രയോറിട്ടി നോക്കിയാണ് , ഉള്ള വെന്റിലേറ്റർ സംവിധാനങ്ങളിലൂടെ മരുന്നില്ലാത്ത ഈ രോഗത്തിൽ നിന്നും ഒരാൾക്ക്  ജീവിതത്തിലേക്ക് തിരിച്ചുവരുവാൻ ഒരു ചാൻസ് കിട്ടുന്നുള്ളൂ എന്നതും ഒരു വിരോധോപസമായി തോന്നാം - പക്ഷെ അതിന് മാത്രമെ ഇത്ര ആധുനിക ആരോഗ്യ മേഖല സാങ്കേതിക വിദ്യകൾക്കും ഉപകരണങ്ങൾക്കും  പ്രാപ്‌തിയുള്ള ലോകത്തിലെ വമ്പൻ രാജ്യങ്ങൾക്ക് പോലും  സാധിക്കുന്നുള്ളൂ എന്നതാണ് വാസ്‌തവം ...!

അതുകൊണ്ട് എന്നെപ്പോലെയുള്ള അണ്ടർ 
മെഡിക്കൽ കണ്ടീഷൻ ഉള്ളവരെല്ലാം എത്ര ജാഗ്രതയുണ്ടെങ്കിലും 
പേടിച്ചെ മതിയാകൂ ...

മെയ് മാസം പകുതിക്കുള്ളിൽ ലണ്ടനിലുള്ള 95 ശതമാനം 
ആളുകളേയും കോറോണേച്ചി വന്ന് തടവിപ്പോകും എന്നാണ് 
പഠനങ്ങൾ പറയുന്നത് ...

ഇതിൽ മുക്കാൽ ഭാഗം ആളുകൾക്കും 
ഒരു ജലദോഷപ്പനി മാതിരിയൊ , ഒരു വിധ രോഗാവസ്ഥകൾ പ്രകടിപ്പിക്കാതെയും ഈ രോഗം വന്ന് കടന്ന് പോകുമെങ്കിലും , ബാക്കിയുള്ളവരെ ശരിക്കും പീഡിപ്പിച്ചും - അതിൽ ഒരു ചെറിയ ശതമാനത്തെ യമലോകത്തേക്കും ആനയിച്ചു  കൊണ്ടുപോകുമെന്നാണ് പറയുന്നത് ...! 
അവസാനം ആശുപത്രിയിലെത്തി രക്ഷപ്പെടാനാകാതെ കൊറോണ കൊണ്ടുപോയവരുടെ മരണനിരക്കുകൾ  മാത്രമെ ഇപ്പോൾ ചിത്രഗുപ്‌തൻ ഔദ്യോഗികമായി പുറത്ത് വിട്ടിട്ടുള്ളൂ  എന്ന അരമന രഹസ്യം -  ഇപ്പോൾ ചുറ്റുപാടും എന്നും  സംഭവിച്ചു കൊണ്ടിരിക്കുന്ന അനേകം ആകസ്‌മിക മരണങ്ങളുടെ കണക്കുകൾ  കൂടി പുറത്താകുമ്പോൾ ഇപ്പോഴുള്ള  'ഒഫീഷ്യൽ ഡെത്ത് സ്‌കോർ'  ഇരട്ടിയിലധികമായി അങ്ങാടിപ്പാട്ടാകുമെന്നാണ് പറയുന്നത് ...!

കണ്ടക ശനി വന്ന്  പോകുമ്പോൾ 
കൊണ്ടേ പോകൂ  എന്നുള്ളത് 
കോവിഡ് വന്നാലും  കൊണ്ട് പോകും എന്നുറപ്പാക്കി  കഴിയുന്ന ഒരു ലഘു വിഭാഗം ജനതയും , കിണ്ണത്തിൻറെ വക്കത്തെ കടുക് മണി പോലെ ഇവിടങ്ങളിൽ ഇപ്പോൾ ഉണ്ടെന്ന് പായാതെ വയ്യ... 

എവിടെ  പോയി ഒളിച്ചാലും 
തക്ഷകൻ തീണ്ടുമെന്ന അവസ്ഥാവിശേഷം ...!

പണം, പദവി, പെരുമയൊന്നുമല്ല
പേടിയാണ് പെരുത്ത സാധനം... അല്ലെ.
ഒരു പക്ഷെ ഇവിടെ വായന രസകരമായിരിക്കാം 
എന്നാൽ യാഥാർത്ഥ്യം പേടിപ്പെടുത്തുന്നത് തന്നെയാണ് ...! 

എന്തായാലും
കൊറോണക്ക് ശേഷം

കുറെ പാടുപെടേണ്ടി വരും

നേരാവണ്ണം ലോകത്തിനും ആയതിലെ ജനതക്കും 

നേരെയൊന്ന് നിവർന്ന് നിൽക്കുവാനും പിന്നീട് ജീവിക്കുവാനും ...!


പിന്നാമ്പുറം :- 
'ബ്രിട്ടീഷ് മലയാളി'പത്രത്തിൽ  പ്രസിദ്ധീകരിച്ച 
ഒരു പ്രതികരണ കുറിപ്പുകളാണിത്  .നന്ദി ..ബ്രിട്ടീഷ് മലയാളി .
കൊറോണക്കാലം @ ലണ്ടൻ britishmalayali.co.uk

ഒരു പുതിയ അമ്മൂമ്മയും മുത്തശ്ശനും ...! / Oru Puthiya Ammoommayum Mutthasshanum ...!

ഒരു മഹാമാരിയായ വ്യാപനവ്യാപ്‌തിയോടെ  പടർന്നുപിടിച്ച 'കോവിഡ് -19'  എന്ന കൊറോണ വൈറസുകൾ കാരണം ലോക ജനത മുഴുവൻ  ഇക്കൊല്ലം തുടക്കം മുതൽ ഇന്...